ជំងឺសសៃឈាមបេះដូងកើនឡើងជាលំដាប់មកទល់សព្វថ្ងៃនេះ ហើយកត្តាហានិភ័យចម្បងមួយនៃជំងឺនេះបណ្ដាលមកពីការកើនឡើងនូវកូឡេស្តេរ៉ូលខ្ពស់ក្នុងឈាម។ ប៉ុន្តែកុំបារម្ភ! ក៏ព្រោះអ្នកអាចបញ្ចុះកម្រិតកូឡេស្តេរ៉ូលដោយគ្រាន់តែភេសជ្ជៈធម្មជាតិមួយចំនួន។ ថាតើភេសជ្ជៈទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីភេសជ្ជៈដែលអ្នកគួរទទួលទានដើម្បីបញ្ចុះកូឡេស្តេរ៉ូល ៖
១. ទឹកក្រូចស្រស់
ក្រៅពីវីតាមីន C ជាតិសសៃ សារធាតុ folate និងប៉ូតាស្យូមដែលចាំបាច់ដើម្បីរក្សាសុខភាពរាងកាយរឹងមាំហើយនោះ ក្រូច ក៏ជាប្រភពនៃសារធាតុ pectin និង phytosterols ដែលជួយកម្ចាត់កូឡេស្តេរ៉ូលមិនល្អផងដែរ។
២. តែខ្ញី
ក្រៅពីមានប្រសិទ្ធិភាពដោះស្រាយបញ្ហាចង្អោរចង់ក្អួត ពិបាករំលាយអាហារ ក្អួត និងរាគហើយនោះ តែខ្ញីក៏មានលក្ខណៈសម្បត្តិប្រឆាំងការរលាកដែលជួយកាត់បន្ថយកម្រិតនៃកូឡេស្តេរ៉ូលមិនល្អក្នុងចរន្តឈាមបានយ៉ាងប្រសើរទៀតផង។
៣. ទឹកល្ហុងស្រស់
ផ្លែល្ហុងអាចជួយក្នុងការគ្រប់គ្រងមូលហេតុចម្បងបំផុតនៃជំងឺបេះដូងនោះ គឺកូឡេស្តេរ៉ូល។ ការទទួលទានទឹកផ្លែល្ហុងស្រស់យ៉ាងហោចណាស់ ២ ដង ក្នុងមួយថ្ងៃ គឺអាចកាត់បន្ថយការប្រមូលផ្ដុំកូឡេស្តេរ៉ូលក្នុងរាងកាយ។ នេះ គឺដោយសារតែសារធាតុប្រឆាំងអុកស៊ីតកម្ម និងវីតាមីន C ពីផ្លែល្ហុង វាមិនអនុញ្ញាតឲ្យកូឡេស្តេរ៉ូលប្រមូលផ្ដុំក្នុងរាងកាយ។ ទឹកផ្លែល្ហុងក៏ជួយកាត់បន្ថយហានិភ័យនៃជំងឺសសៃឈាមបេះដូង និងជំងឺលើសឈាមផងដែរ។
៤. ទឹកផ្លែប៉េងប៉ោះស្រស់
ប៉េងប៉ោះជាប្រភពដ៏ប្រសើរនៃសារធាតុ lycopene ដែលជួយប្រយុទ្ធប្រឆាំងនឹងការកកើតឡើងនៃកូឡេស្តេរ៉ូលលើជញ្ជាំងសរសៃឈាមសសៃឈាមអាកទែ។
៥. ទឹកទំពាំងបាយជូរ
ទំពាំងបាយជូរក៏ជាប្រភពដ៏ប្រសើរនៃសារធាតុ quercetin ដែលជួយទប់ស្កាត់កូឡេស្តេរ៉ូលមិនឱ្យមានការកកស្ទះក្នុងសសៃឈាម៕
សម្គាល់៖ ទោះជាយ៉ាងណាភេសជ្ជៈមួយចំនួនខាងលើអាចបញ្ចុះកម្រិតកូឡេស្តេរ៉ូលប្រកបដោយប្រសិទ្ធិភាពបានលុះត្រាតែអ្នកមានរបបអាហារត្រឹមត្រូវ និងតែងធ្វើលំហាត់ប្រាណជាប្រចាំផងដែរ៕
