គួរអាន! ធ្វើបែបនេះបានស្បែកនឹងមិនឆាប់យារធ្លាក់ឡើយ

ជាធម្មតា ស្បែកយារធ្លាក់ គឺបណ្ដាលមកពីការចុះខ្សោយ និងបាត់បង់ភាពបត់បែនធម្មជាតិ ក៏ដូចជាកូឡាជែន។ វ័យកាន់តែជ្រេ ស្បែកក៏ប្រែជាយារតាមនោះដែរ ជាពិសេសប្រសិនបើអ្នកចេះថែរក្សា។ មិនដឹងដោះស្រាយទប់ស្កាត់បញ្ហាស្បែកយារធ្លាក់តាមវិធីណាមែនទេ? ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗ ប៉ុន្តែប្រសិទ្ធិភាពខ្ពស់ជួយទប់ស្កាត់ស្បែកយារធ្លាក់ឆាប់រហ័ស ៖

១. ចៀសវាងអាហារផ្អែម និងភេសជ្ជៈកំប៉ុង

ការទទួលទានអាហារ និងភេសជ្ជៈផ្អែមៗ ឬមានជាតិស្ករខ្ពស់ច្រើនពេកអាចបង្កើនល្បឿននៃភាពចាស់តាមវ័យនៃស្បែកគួរឱ្យកត់សម្គាល់។ នោះក៏ព្រោះតែជាតិស្ករតែងផ្សារភ្ជាប់ជាមួយប្រូតេអ៊ីនក្នុងរាងកាយតាមរយៈដំណើរការមួយហៅថា glycation បង្កការរលាកក្នុងរាងកាយដែលជះឥទ្ធិពលដល់កូឡាជែន និងភាពបត់បែននៃស្បែកបណ្ដាលឱ្យស្នាមជ្រីវជ្រួញលេចឡើងឆាប់រហ័ស រួមជាមួយបញ្ហាស្បែកយារធ្លាក់ផងដែរ។

២. គេងឱ្យបានគ្រប់គ្រាន់

ការគេងបានគ្រប់គ្រាន់ គឺសំខាន់ណាស់សម្រាប់សុខភាពរាងកាយទាំងមូល រួមទាំងស្បែកតឹងណែន។ វាចាំបាច់ក្នុងការគេងឱ្យបានពី ៧ ទៅ ៨ ម៉ោងក្នុងមួយយប់ដើម្បីផ្ដល់ពេលគ្រប់គ្រាន់ឱ្យស្បែកជួសជុលខ្លួនឯងនិងស្ដារភាពរឹងមាំឡើងវិញ។

៣. ចៀសវាងអាហារកែច្នៃ

អាហារកែច្នៃ គឺជាសត្រូវលេខមួយនៃសុខភាពស្បែកល្អប្រសើររក្សាបាននូវភាពក្មេងជាងវ័យ។ ដូច្នេះចូរកាត់បន្ថយ ឬជៀសវាងទទួលទានអាហារទាំងនេះ ហើយជ្រើសរើសការទទួលទានបន្លែផ្លែឈើស្រស់ឱ្យច្រើនជំនួសវិញ។

៤. ធ្វើលំហាត់ប្រាណទៀងទាត់

ការធាត់លើសទម្ងន់អាចធ្វើឱ្យស្បែកមុខយារបាត់បង់ភាពតឹងណែន ក៏ដូចជាភាពបត់បែនគួរឱ្យព្រួយបារម្ភ។ ដូច្នេះការធ្វើលំហាត់ប្រាណជាប្រចាំនឹងជួយឱ្យអ្នករក្សាបាននូវទម្ងន់ត្រឹមត្រូវសមស្រប រួមជាមួយស្បែកស្រស់ស្អាតក្មេងជាងវ័យផងដែរ។

៥. ឈប់ជក់បារី

ប្រសិនបើអ្នកជក់បារី ចូរបញ្ឈប់ទម្លាប់មិនល្អនេះភ្លាម! ការជក់បារីយ៉ាងហោចណាស់ ២០ ដើមជាប្រចាំអាចធ្វើឱ្យស្បែកចាស់ជាងវ័យដល់ទៅ ១០ដងឯណោះ។

៦. កុំឱ្យស្បែកត្រូវពន្លឺព្រះអាទិត្យខ្លាំងពេក

ពន្លឺព្រះអាទិត្យល្អសម្រាប់សុខភាពស្បែក ប៉ុន្តែក៏បង្កផលប៉ះពាល់ដល់ស្បែកគួរឱ្យព្រួយបារម្ភ។ ហើយការត្រូវកម្ដៅព្រះអាទិត្យច្រើនពេកអាចបង្ករោគសញ្ញានៃភាពចាស់មុនវ័យ និងបង្កើនហានិភ័យនៃជំងឺមហារីកស្បែកផងដែរ។ ដូច្នេះដើម្បីជាការប្រសើរ ចូរស្ថិតនៅក្នុងម្លប់ចន្លោះម៉ោង ១១ ព្រឹក ដល់ ២ ល្ងាច ឬនៅពេលពន្លឺព្រះអាទិត្យក្ដៅខ្លាំង។ យ៉ាងហោចណាស់ ក៏ចេះបិតបាំងមុខ និងកុំភ្លេចលាបឡេការពារកម្ដៅថ្ងៃដែលមាន SPF ៣០ ឬខ្ពស់ជាងនេះដើម្បីការពារស្បែកពីកម្ដៅខ្លាំងនៃព្រះអាទិត្យរាល់ពេលចេញទៅក្រៅក្រោមកម្ដៅថ្ងៃ។

៧. ទទួលទានប្រូតេអ៊ីននិងខ្លាញ់សុខភាពល្អ

តើអ្នកធ្លាប់ដឹងទេថាការទទួលទានខ្លាញ់និងប្រូតេអ៊ីនល្អៗជួយពង្រឹងសុខភាពសាច់ដុំ? ប្រតេអ៊ីនក៏មានកូឡាជែនដែលចាំបាច់សម្រាប់ស្បែកតឹងណែនគួរអោយកត់សម្គាល់។ បរិមាណនៃប្រូតេអ៊ីនដែលអ្នកគួរទទួលទានអាស្រ័យលើថាតើអ្នកបានហាត់ប្រាណ ឬធ្វើសកម្មភាពច្រើនប៉ុណ្ណាក្នុងមួយថ្ងៃ កម្ពស់ រួមទាំងទម្ងន់ផងដែរ។

៨. ប្រើប្រាស់ផលិតផលត្រឹមត្រូវសម្រាប់ស្បែករបស់អ្នក

ដើម្បីការពារស្បែកពីភាពចាស់តាមវ័យ និងការបំផ្លាញពីពន្លឺព្រះអាទិត្យអ្នកគួរដឹងច្បាស់ថាតើផលិតផលថែរក្សាស្បែកណាមួយដែលត្រឹមត្រូវសាកសមជាមួយនឹងប្រភេទនៃស្បែករបស់អ្នក។

៩. ទទួលទានទឹកអោយបានច្រើនគ្រប់គ្រាន់

វិធីដ៏ងាយបំផុតមួយទៀតដើម្បីរក្សាភាពតឹងណែននៃស្បែក គឺការទទួលទានទឹកអោយបានគ្រប់គ្រាន់។ វិធីនេះមិនត្រឹមជួយរក្សាជាតិទឹកក្នុងរាងកាយប៉ុណ្ណោះទេ ប៉ុន្តែក៏ល្អសម្រាប់សុខភាពនិងភាពបត់បែននៃស្បែកផងដែរ។ 

១០. ប្រើប្រាស់ផលិតផលផ្ដល់សំណើមដល់ស្បែក

ស្បែកត្រូវការជាតិសំណើមគ្រប់គ្រាន់ជាប្រចាំដើម្បីទប់ទល់ភាពចាស់តាមវ័យនិងរក្សាភាពបត់បែន។ អ្នកអាចប្រើប្រាស់ផលិតផលធម្មជាតិផ្ដល់សំណើមដល់ស្បែកដោយការបិតបន្ទះត្រសក់ ឬល្ហុង ឬក៏អាចប្រើប្រាស់ផលិតផលផ្ដល់សំណើមដែលមានដាក់លក់នៅលើទីផ្សារ ប៉ុន្តែគួរជ្រើសរើសមួយណាដែលផ្ទុកសារធាតុ retinol៕