យើងទាំងអស់គ្នាសុទ្ធតែដឹងហើយថា ការពិនិត្យសុខភាពក្នុងពេលមានផ្ទៃពោះមានសារៈសំខាន់ខ្លាំងប៉ុណ្ណាហើយ ប៉ុន្តែអ្នកជំនាញភាគច្រើននាពេលបច្ចុប្បន្ននេះបានណែនាំឲ្យស្រ្តីទាំងអស់ឲ្យចាប់ផ្តើមពិនិត្យសុខភាព ជាពិសេសស្វែងរកអ្នកជំនាញខាងរោគស្រ្តីពិគ្រោះសិនមុនពេលពួកគេមានផ្ទៃពោះ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)

ស្ថិតត្រង់ចំណុចនេះ ហេតុអ្វីត្រូវចាប់ផ្តើមបារម្ភមុនពេលមានផ្ទៃពោះធ្វើអី? រឿងនេះគឺធ្វើឡើងដើម្បីឲ្យច្បាស់ថា អ្នក និងដៃគូមិនមានជំងឺអ្វីជាអាថ៌កំបាំង ដើម្បីកុំឲ្យវាប៉ះពាល់ដល់កូនក្នុងផ្ទៃ ឬអាចមានឱកាសច្រើនក្នុងការមានផ្ទៃពោះផង។ រឿងនេះមានបងប្អូនស្រ្តីច្រើនណាស់ដែលបានចោទជាសំណួរមកខាងគេហទំព័រយើងខ្ញុំថា ហេតុអ្វីបានជាពួកគាត់ឲ្យតែមានផ្ទៃពោះដឹងតែរលូតរហូតអញ្ជឹង និងមានមធ្យោបាយអ្វីអាចជួយពួកគេបាន។ ដូច្នេះហើយទើបខ្ញុំបង្កើតជាអត្ថបទមួយនេះឡើងដើម្បីអាចជា ដំណោះស្រាយបានច្រើនសម្រាប់ពួកគេពិចារណាមុននឹងសម្រេចចិត្តមានផ្ទៃពោះ។ 

ស្ថិតត្រង់ចំណុចនេះដែរ គ្រូពេទ្យក៏អាចផ្តល់ជាដំបូន្មានទាក់ងនឹងការហាត់ប្រាណ ការញ៉ាំអាហារ របៀបរស់នៅ និងការប្រើប្រាស់ថ្នាំវីតាមីន B9 ដែរ។ ការសិក្សាខ្លះបង្ហាញថា ការថែទាំសុខភាពមុនពេលមានផ្ទៃពោះអាចបង្កើនឱកាសនៃការមានផ្ទៃពោះច្រើន និងកាត់បន្ថយការប្រឈមនឹងរលូតកូន ឬកូនកើតមកខូចអវៈយវៈ។ 

គ្រូពេទ្យនឹងចាប់ផ្តើមធ្វើពិនិត្យសុខភាពមុនពេលមានផ្ទៃពោះតាមរយៈការសួរប្រវត្តិជំងឺពេញលេញមួយពីអ្នកទាំងពីរ។ គាត់ក៏អាចនឹងធ្វើតេស្តមួយចំនួនដែរដូចជា តេស្តឈាម និងតេស្តគៀមាត់ស្បូន Pap Smear ដើម្បីឲ្យប្រាកដថា អ្នកមានសុខភាពល្អបរិបូរណ៍ឬអត់។ តេស្តដែលអាចធ្វើបន្ថែមទៀតដើម្បីរកជំងឺនោះមានដូចជា៖

  • រកមើលជំងឺស្អូច
  • ជំងឺអ៊ុតស្វាយ
  • ជំងឺអេដស៍
  • ជំងឺរលាកថ្លើមប្រភេទ B
  • ជំងឺប៉េស
  • ជំងឺកាមរោគផ្សេងៗទៀតដូចជា ជំងឺប្រម៉េសទឹកថ្លា ជំងឺស្វាយ និងជំងឺកាមរោគ
  • បញ្ហាក្រពេញទីរ៉ូអ៊ីត
  • ជំងឺផ្សេងទៀតដូចជា ជំងឺ Toxoplasmosis និងជំងឺបង្កឡើងដោយវីឬុស Parovirus B19។ 
  • រកមើលជំងឺកង្វះគ្រាប់ឈាមប្រភេទ Sickle Cell Anemia 
  • ជំងឺតាឡាសេមៀ
  • ជំងឺហ្សែនមួយចំនួនទៀត

បើសិនជាអ្នករកឃើញថាមិនទាន់មានជំងឺណាមួយទេ ឬជំងឺនេះអាចបង្ការបាន អ្នកក៏អាចចាក់វ៉ាក់សាំការពារជំងឺនោះមុនពេលមានផ្ទៃពោះបានដែរ ដូចជា វ៉ាក់សាំងការពារជំងឺស្អូច កញ្ជ្រឹល ស្រាឡាទែន (MMR) ជំងឺអ៊ុតស្វាយ ឬវាក់សាំងការពារជំងឺរលាកថ្លើមប្រភេទ A។ ក្រោយពីចាក់វាក់សាំងទាំងនេះរួច អ្នកត្រូវតែរងចាំយ៉ាងហោចណាស់ ២៨ថ្ងៃដែរមុនពេលព្យាយាមមានផ្ទៃពោះ។ 

យ៉ាងណាមិញ នៅពេលរកឃើញថាមានជំងឺណាមួយហើយ អ្នកត្រូវតែព្យាបាលជំងឺនោះឲ្យបានជាសះស្បើយបរិបូរណ៍សិន ព្រោះអ្នកនឹងមិនអនុញ្ញាតិអោយប្រើថ្នាំអ្វីទាំងអស់ដើម្បីព្យាបាលជំងឺទៀតទេនៅពេលមានផ្ទៃពោះ។ ដោយយោងទៅតាម ប្រសាសន៍របស់ លោកវេជ្ជបណ្ឌិត គឹម អាង អ្នកឯកទេសខាងរោគកុមារ ដែលបម្រើការនៅមន្ទីរពេទ្យកុមារជាតិ បានឱ្យដឹងថា បើសិនជាស្រ្តីមានផ្ទៃពោះហើយ កើតជំងឺស្អូច ស្រ្តីនោះត្រូវតែរំលូតកូនជាដាច់ខាត។ នេះគឺជាដំបូន្មានដ៏ល្អ ព្រោះថា ការមានកើតជំងឺស្អូចក្នុងពេលមានផ្ទៃពោះគឺមានផលប៉ះពាល់ខ្លាំងណាស់ចំពោះកូនក្នុងផ្ទៃដូចជា កូនកើតមកខូចអវៈយវៈ មានបញ្ហាបេះដូង គ្មានខួរក្បាល ពិការរាងកាយ ឆ្អឹងលូតលាស់មិនត្រឹមត្រូវ អាចស្លាប់ក្នុងផ្ទៃ ឬអាចបណ្តាលឲ្យកើតមិនគ្រប់ខែទៀត។ (អាន:ថ្នាំងងុយគេង ពេលអ្នកគួរប្រើ)

សរុបសេចក្តីមក បើសិនជាអ្នកពិតជាចង់មានផ្ទៃពោះមែន ចូររៀបចំគម្រោងឲ្យបានត្រឹមត្រូវ ជាពិសេសស្វែងរកសេវាពិគ្រោះពីគ្រូពេទ្យជំនាញទាក់ទងនឹងសុខភាពបន្តពូជសិនមុនពេលសម្រេចចិត្តមានផ្ទៃពោះ៕