ងាយៗ! ចង់ស្អាតកុំភ្លេច “ខ្ទិះដូង”

តើអ្នកធ្លាប់ដឹងទេថាផលិតផលសម្រស់ភាគច្រើនមានផ្ទុកខ្ទិះដូង? ទោះជាយ៉ាងណាដើម្បីកាត់បន្ថយចំណាយអ្នកអាចសាកល្បងរូបមន្តថែរក្សាសម្រស់បែបធម្មជាតិដោយប្រើខ្ទិះដូងដោយខ្លួនឯងនៅផ្ទះបាន។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអត្ថប្រយោជន៍ រួមជាមួយរបៀបងាយៗក្នុងការប្រើប្រាស់ខ្ទិះដូងថែសម្រស់ ៖

១. បំបាត់សញ្ញានៃភាពចាស់តាមវ័យ

ស្នាមខ្សែនិងស្នាមជ្រីវជ្រួញនៅលើផ្ទៃមុខជាសញ្ញាទូទៅបំផុតនៃភាពចាស់តាមវ័យនៃស្បែក។ ប៉ុន្តែកុំបារម្ភ! បញ្ហានេះអាចត្រូវបានដោះស្រាយនិងទប់ស្កាត់បានដោយគ្រាន់តែអ្នកប្រើប្រាស់ខ្ទិះដូងលាបលើផ្ទៃមុខដូចធម្មតា។ ខ្ទិះដូងមានផ្ទុកសម្បូរទៅដោយវីតាមីន C និង E ដែលជួយកម្ចាត់រូបរាងនៃស្នាមខ្សែ ឬស្នាមជ្រីវជ្រួញបានយ៉ាងប្រសើរ។

២. ផ្ដល់សំណើមដល់ស្បែក

អ្វីដែលអ្នកត្រូវធ្វើ គឺគ្រាន់តែលាបខ្ទិះដូងលើស្បែកដូចពេលប្រើប្រាស់ផលិតផលផ្ដល់សំណើមដទៃទៀត។ អ្នកអាចលាងសម្អាតស្បែកចេញជាមួយទឹកធម្មតារយៈពេលប៉ុន្មាននាទីក្រោយលាបរួច ឬមិនបាច់លាងចេញក៏បាន។ ស្បែកងាយនឹងស្រូបយកជាតិសំណើមពីខ្ទិះដូងបំផុតសូម្បីតែស្រទាប់ដែលជ្រៅជាងគេ។

៣. ព្យាបាលស្បែកដែលរលាកដោយសារកម្ដៅថ្ងៃ

ការលាបខ្ទិះដូងលើស្បែកដែលទទួលរងការរលាកដោយកម្ដៅថ្ងៃ គឺជាវិធីពន្លឿនការជាសះស្បើយដ៏មានប្រសិទ្ធភាពបំផុតមួយ។ នោះក៏ព្រោះតែខ្ទិះដូងមានផ្ទុកសម្បូរទៅដោយជាតិខ្លាញ់និងប្រេងល្អដែលផ្ដល់សំណើមគ្រប់គ្រាន់ដល់ស្បែក។

៤. កម្ចាត់ស្នាមអ៊ុចខ្មៅនិងស្នាមជាំលើស្បែក

អ្វីដែលអ្នកត្រូវធ្វើ​ គឺគ្រាន់តែលាយខ្ទិះដូង ២ ស្លាបព្រាបាយ ជាមួយម្ស៉ៅរមៀត ១ ស្លាបព្រាកាហ្វេនិងទឹកឃ្មុំ ១ ស្លាបព្រាកាហ្វេ ចូលគ្នាឱ្យសព្វ។ លាបល្បាយលើស្បែកដែលទទួលរងផលប៉ះពាល់និងទុកចោលសម្រាប់រយៈពេលប្រហែល ១៥ នាទីសឹមលាងសម្អាតចេញជាមួយទឹកធម្មតា។ អនុវត្តជាប្រចាំរហូតទទួលបានលទ្ធផលគាប់ចិត្ត។

៥. បន្ទន់សក់និងផ្ដល់សំណើមដល់ស្បែកក្បាល

អ្នកអាចប្រើប្រាស់ខ្ទិះដូងជំនួសក្រែមបន្ទន់សក់បានយ៉ាងប្រសើរ។ អ្វីដែលត្រូវធ្វើ គឺគ្រាន់តែម៉ាស្សាខ្ទិះដូងចូលស្បែកក្បាលក្រោយពេលកក់សក់រួច ហើយលាងសម្អាតចេញជាមួយទឹកធម្មតា៕