Join with Health.com.kh on Telegram

តើអ្នកធ្លាប់ដឹងទេថាគ្រាប់អាល់ម៉ុនអាចផ្ដល់អត្ថប្រយោជន៍ជាច្រើនចំពោះសុខភាពទប់ស្កាត់ជំងឺសាហាវៗ? គ្រាប់ធញ្ញជាតិនេះជាអាហារសម្រន់ដ៏សាកសមបំផុតមួយដែលអ្នកគួររួមបញ្ចូលក្នុងរបបអាហារប្រចាំថ្ងៃ ប្រសិនបើចង់រក្សាបាននូវសុខភាពល្អប្រសើរ។ ទោះជាយ៉ាងណាមិនគួរទទួលទានលើសពីមួយក្ដាប់ដៃក្នុងមួយថ្ងៃឡើយ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរទទួលទានគ្រាប់ធញ្ញជាតិអាល់ម៉ុនជាប្រចាំ ៖

១. ទប់ស្កាត់ជំងឺភ្លេចភ្លាំង

នោះក៏ព្រោះតែគ្រាប់ធញ្ញជាតិអាល់ម៉ុនជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ ដែលចាំបាច់សម្រាប់បង្កើនសុខភាពខួរក្បាល។ ជាតិខ្លាញ់អូមេហ្គា ៣ ក៏ជួយបង្កើតកោសិកាខួរក្បាល រួមទាំងសសៃប្រសាទផងដែរ។ គ្រាប់ធញ្ញជាតិនេះក៏ផ្ដល់អោយខួរខ្បាលនូវសារធាតុចិញ្ចឹមចាំបាច់ផ្សេងទៀតផងដែរ។

២. កាត់បន្ថយកូឡេស្តេរ៉ូលមិនល្អ

គ្រាប់អាល់ម៉ុនមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ និងអាស៊ីតខ្លាញ់ល្អ monounsaturated ដែលជួយកាត់បន្ថយកម្រិតនៃជាតិកូឡេស្តេរ៉ូលទប់ស្កាត់ហានិភ័យនៃជំងឺដាច់សសៃឈាមខួរក្បាល ជំងឺស្ទះសសៃឈាមបេះដូង គាំងបេះដូងគួរឱ្យកត់សម្គាល់។ គ្រាប់ធញ្ញជាតិនេះក៏មានប្រសិទ្ធិភាពកាត់បន្ថយការរលាកនិងធ្វើអោយមុខងារសសៃឈាមក្នុងរាងកាយកាន់តែមានលក្ខណៈប្រសើរឡើងផងដែរ។

៣. បន្សាបជាតិពុលក្នុងថ្លើម

គ្រាប់អាល់ម៉ុនក៏មានផ្ទុកនូវសារធាតុចិញ្ចឹមដែលមានប្រយោជន៍សម្រាប់សុខភាពថ្លើមផងដែរ។ ក្រៅពីអាស៊ីតខ្លាញ់អូមេហ្កា ៣ គ្រាប់អាល់ម៉ុនជាប្រភពដ៏ល្អបំផុតមួយនៃសារធាតុ glutathione និងធាតុចាំបាច់ច្រើនទៀត ក៏ដូចជាសារធាតុប្រឆាំងអុកស៊ីតកម្មដែលជួយធ្វើអោយថ្លើមមានសុខភាពល្អរឹងមាំ។

៤. រក្សាតុល្យភាពអ័រម៉ូន

គ្រាប់អាល់ម៉ុនបង្កើនអ័រម៉ូន adiponectic ដែលរក្សាជាតិស្ករក្នុងឈាមឲ្យស្ថិតនៅកម្រិតអប្បបរិមាមួយ។ ស្ថានភាពនេះនាំឲ្យកម្រិតនៃអ័រម៉ូនបុរសអង់ដ្រូហ្សែនថយចុះ។ ការស្រាវជ្រាវជាច្រើនបានរកឃើញផងដែរថា ការទទួលទានគ្រាប់ធញ្ញជាតិជួយកាត់បន្ថយកម្រិតនៃអ័រម៉ូនបុរសផ្សេងៗទៀតដែលធ្វើស្បែកស្ងួត និងស្ដើង។ អ្នកជំនាញធ្វើការណែនាំឲ្យទទួលទានគ្រាប់អាល់ម៉ុនចំនួន ១១ គ្រាប់ជាប្រចាំ ដើម្បីរក្សាបាននូវសុខភាពស្បែកល្អប្រសើរ និងជៀសផុតពីបញ្ហាអតុល្យភាពនៃអ័រម៉ូន។

៥. ទប់ស្កាត់ជំងឺពុកឆ្អឹង

គ្រាប់អាល់ម៉ុនជាប្រភពដ៏ល្អបំផុតមួយនៃជាតិកាល់ស្យូម រួមទាំងអាស៊ីតខ្លាញ់អូមេហ្គា ៣ ដែលជួយពង្រឹងសុខភាពឆ្អឹង និងសន្លាក់គួរឱ្យកត់សម្គាល់។ អ្នកជំនាញជាច្រើននិយាយថា គ្រាប់អាល់ម៉ុន ១ ពែង មានផ្ទុកជាតិកាល់ស្យូមច្រើនជាងទឹកដោះគោស្រស់ ១ កែវទៅទៀត។

៦. ល្អសម្រាប់អ្នកជំងឺលើសសម្ពាធឈាម

នោះក៏ព្រោះតែគ្រាប់អាល់ម៉ុនមានផ្ទុកជាតិម៉ាញ៉េស្យូមខ្ពស់ដែលជួយបញ្ចុះសម្ពាធឈាមបានយ៉ាងប្រសើរ៕