ការចំណាយពេលក្នុងជីវិតរស់នៅជាមួយដៃគូរមានន័យថាជាការដើររួមផ្លូវដ៏សំខាន់បំផុតមួយដោយរួមសុខទុក្ខ អធ្យាស្រ័យ ចេះចែករំលែក លះបង់ ផ្តល់ឱ្យទៅវិញទៅមក និងជំនះរាល់ឧបសគ្គជាមួយគ្នា។ ភាគច្រើននៃគូស្នេហ៍ដែលមិនអាចធ្វើ ឬទទួលយករាល់ចំណុចទាំងនេះបានងាយប្រឈមមុខនឹងការ
ចែកផ្លូវគ្នាណាស់។ ការរក្សាចំណងស្នេហាយូរអង្វែង គឺទាមទារលើសពីត្រឹមតែមានអារម្មណ៍ស្រលាញ់។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗជួយរក្សាចំណងស្នេហ៍យូរអង្វែង ៖
១. រីករាយនឹងទម្លាប់រួមយ៉ាងហោចណាស់មួយដូចគ្នា
វាជារឿងល្អដែលយើងម្នាក់ៗមាននូវទម្លាប់ផ្សេងៗផ្ទាល់ខ្លួន ប៉ុន្តែសាកស្រមៃទៅមើលថាតើវាកាន់តែប្រសើរប៉ុណ្ណាប្រសិនបើអ្នកនិងដៃគូមាននូវទម្លាប់មួយរួមគ្នា? ទម្លាប់នោះអាចជាការមើលខ្សែភាពយន្ត អានសៀវភៅ ឫលេងកីឡាជាដើម។ វាជារឿងសំខាន់ដែលអ្នកទាំងពីរគួរធ្វើឱ្យសកម្មភាពណាមួយនោះក្លាយជាទម្លាប់រួមដើម្បីបង្កើនភាពរីករាយនិងអាចចំណាយពេលស្និតស្នាលបានកាន់តែច្រើនជាមួយគ្នា។
២. គោរពនិងទុកចន្លោះពេលខ្លះឱ្យគ្នា
គូស្នេហ៍មានសុភមង្គលតែងចែករំលែកភាពផ្អែមល្ហែមស្និតស្នាលនៅជាមួយគ្នាច្រើន ប៉ុន្តែក៏មិនគួរហួសព្រំដែនពេកដែរ។ ការគោរពចេះផ្ដល់ពេលវេលាខ្លះឱ្យដៃគូ គឺជាចំណុចសំខាន់បំផុតមួយក្នុងការរក្សាបាននូវចំណងស្នេហ៍រឹងមាំ។ គ្មាននរណាម្នាក់ចង់បានទំនាក់ទំនងដែលបិទជិតហាក់ដូចជាជាប់ឃុំឃាំងគ្មានសេរីភាពផ្ទាល់ខ្លួនបន្តិចសោះឡើយ។
៣. រកឱកាសសម្រាកលំហែ ឬធ្វើដំណើរកំសាន្តជាមួយគ្នា
ការសម្រាក់លំហែ ឬធ្វើដំណើកំសាន្តមិនមានន័យថាត្រូវតែនាំដៃគូទៅកន្លែងដែលអស្ចារ្យថ្លៃៗឡើយ។ ចូរធ្វើដំណើរកំសាន្តស្របតាមលទ្ធភាពអាចទៅកំសាន្តត្រឹមសមុទ្រ ឬទៅតាមខេត្តជិតៗ។ ការដើរលេងកំសាន្តរួមគ្នាមិនត្រឹមតែបង្កើនភាពស្និតស្នាលប៉ុណ្ណោះទេ ប៉ុន្តែថែមទាំងជួយរំសាយអារម្មណ៍តប់ប្រមល់ ការព្រួយបារម្ភផ្សេងៗ ក៏ដូចជាបញ្ចៀសនូវជម្លោះជាយថាហេតុផងដែរ។
៤. មិនចូលគេងទាំងនៅខឹង ឬអន់ចិត្តនឹងគ្នា
រាល់ពេលមានបញ្ហា ឬរឿងមិនសប្បាយចិត្តជាមួយគ្នា អ្នកគួរប្រញាប់ដោះស្រាយភ្លាមកុំទុកយូរ ក៏ព្រោះការព្រងើយកន្តើយអាចនឹងធ្វើឱ្យកាន់តែមានការអន់ចិត្តយល់ច្រឡំលើសដើម។ ដើម្បីជាការប្រសើរចូរព្យាយាមនិយាយគ្នាត្រង់ៗដើម្បីស្វែងរកដំណោះស្រាយប្រសើរមួយ។
៥. ប្រាប់ដៃគូថាអ្នកស្រលាញ់គេយ៉ាងហោចណាស់ម្ដងក្នុងមួយថ្ងៃ
ភាគច្រើននៃពួកយើងប្រហែលជាមិនដឹងទេថា ត្រឹមការនិយាយប្រាប់ដៃគូថាអ្នកស្រឡាញ់គេប៉ុណ្ណារាល់ថ្ងៃបន្ថែមពីលើទង្វើជាក់ស្ដែងអាចជួយធ្វើឱ្យអ្នកទាំងពីរកាន់តែមានភាពស្និតស្នាលខ្លាំងឡើងមួយកម្រិតទៀត។
៦. ញុំាអាហារជាមួយគ្នា
ដើម្បីទំនាក់ទំនងល្អប្រសើរបើទោះជាមិនអាចទទួលទានអាហារជាមួយគ្នាគ្រប់ពេល ក៏យ៉ាងហោចណាស់គួរចំណាយពេលឱ្យបានម្ដងក្នុងមួយថ្ងៃដែរ។ ហើយរីករាយនឹងពេលវេលារួមគ្នាប្រសើរជាងចំណាយពេលផ្ដោតសំខាន់លើទូរស័ព្ទរៀងខ្លួន៕