ក្រោយពីការបង្ហាញរួចមកហើយនូវ មូលហេតុដែលនាំឲ្យកូនកើតមកមិនគ្រប់ទម្ងន់ ក៏មានបងប្អូនយើងជាច្រើន ជាពិសេសបងៗស្រ្តីដែលធ្លាប់មានបទពិសោធន៍បង្កើតកូនមិនគ្រប់ទម្ងន់សួរខាងគេហទំព័រយើងខ្ញុំថា តើពួកគាត់គួរធ្វើយ៉ាងណាទើបអាចចៀសផុតពីរឿងនេះ?(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) តាមរយៈអត្ថបទដែលពួកខ្ញុំចុះផ្សាយកាលប៉ុន្មានថ្ងៃមុន គឺជាការបង្ហាញអំពីទង្វើររបស់ម្តាយដែលគាត់បានធ្វើក្នុងពេលមានផ្ទៃពោះទើបកូនកើតមកមិនគ្រប់ទម្ងន់។ ដូច្នេះបងៗគ្រាន់តែធ្វើយ៉ាងណាចៀសឲ្យឆ្ងាយពីមូលហេតុ ក៏ដូចជាទង្វើរទាំងអស់នោះវិញទៅគឺអាចបង្ការបានហើយ។
យ៉ាងណាមិញ សម្រាប់ទារកដែលកើតមិនគ្រប់ទម្ងន់ ឬខ្វះទម្ងន់ខ្លាំងប្រហែលជាត្រូវប្រឈមមុខនឹងភាពលំបាកច្រើនចំពោះសុខភាពពួកគេនៅថ្ងៃអនាគត។ ជាទូទៅពួកគេគឺងាយកើតជំងឺណាស់ដូចជា ជំងឺលើសសម្ពាធឈាម ជំងឺទឹកនោមផ្អែមប្រភេទទី២ និងជំងឺសរសៃឈាមបេះដូងជាដើម។ ផលវិបាកផ្សេងៗទៀតមានដូចជា ជំងឺវៀចមុខ ខ្វាក់ភ្នែកឬថ្លង់ ព្រមទាំងការលូតលាស់ខាងបញ្ញាស្មារតី និងភាពរឹងមាំរបស់រាងកាយយឺត។
ដូច្នេះដើម្បីបង្ការកុំឲ្យកូនកើតមកមិនគ្រប់ទម្ងន់បានកាន់តែមានប្រសិទ្ធភាពទៀតនោះ បងប្អូនស្រ្តីៗគ្រប់រូបគួរតែព្យាយាមធ្វើការងារដូចខាងក្រោមនេះឲ្យខានតែបាន៖
ចាប់ផ្តើមធ្វើការថែរក្សាសុខភាពក្នុងពេលមានផ្ទៃពោះភ្លាមៗ
ការថែរក្សាសុខភាពក្នុងពេលមានផ្ទៃពោះគឺជារឿងសំខាន់បំផុត ព្រោះវានឹងជួយអ្នករកឃើញបញ្ហាជំងឺផ្សេងៗបានទាន់ពេលវេលាដូចជា ជំងឺទឹកនោមផ្អែមក្នុងពេលមានផ្ទៃពោះ និងជំងឺត្រៀមក្រឡាភ្លើងជាដើម។
ក្នុងពេលទៅជួបពេទ្យ គាត់នឹងតាមដានទៅលើសម្ពាធឈាមរបស់ម្តាយ ការឡើងទម្ងន់ ការលូតលាស់របស់ទារក និងចង្វាក់បេះដូងទារក។
ផ្លាស់ប្តូររបៀបរស់នៅ
ការជក់បារី និងញ៉ាំគ្រឿងស្រវឹងត្រូវបានគេស្គាល់ថាធ្វើឲ្យប្រឈមខ្លាំងនឹងកូនកើតមកមិនគ្រប់ទម្ងន់។ ចូរបញ្ឈប់ការជក់បារី និងឈប់ញ៉ាំគ្រឿងស្រវឹង។ ការសម្របខ្លួននឹងរបៀបរស់នៅផ្សេងបន្តិចបន្តួចដូចជា ការកាត់បន្ថយស្រ្តេស និងគេងបានគ្រប់គ្រាន់អាចនឹងមានប្រយោជន៍ខ្លាំងចំពោះការលូតលាស់របស់ទារក។
គ្រប់គ្រងការត្រៀមកើតជំងឺផ្សេងៗ
សម្រាប់ស្រ្តីដែលចង់ក្លាយជាម្តាយគេ តែបែរជាមានជំងឺលើសសម្ពាធឈាម ឬជំងឺទឹកនោមផ្អែមប្រភេទទី២ទៀតនោះ ទំនងជាប្រឈមខ្លាំងនឹងធ្វើឲ្យកូនកើតមកមិនគ្រប់ទម្ងន់។ ដូច្នេះអ្វីដែលល្អ យើងគួរតែធ្វើការគ្រប់គ្រងជំងឺនេះឲ្យបានល្អ និងពិគ្រោះជាមួយគ្រូពេទ្យថា ជំងឺទាំងនេះគ្រប់គ្រងដល់កម្រិតណាទើបមានផលល្អក្នុងការយកកូន។
ថែរក្សាទម្ងន់ដែលផ្តល់សុខភាពនិងញ៉ាំជីវជាតិឲ្យបានគ្រប់គ្រាន់
ការមានផ្ទៃពោះមិនមែនជាពេលវេលាដែលត្រូវតមអាហារឡើយ។ ដូច្នេះចូរថែរក្សាការញ៉ាំជីវជាតិឲ្យបានល្អ ជាពិសេសនៅពេលចាប់ផ្តើមដឹងថាខ្លួនឯងមានផ្ទៃពោះតែម្តង តាមរយៈការបង្កើនការទទួលទានសារធាតុហ្វូលិកអាស៊ីត ឬវីតាមីន B9 ដែលមានក្នុងគ្រាប់ធញ្ញជាតិ ផ្លែឈើ និងបន្លែ។ ដោយសារតែវាពិបាកនឹងទទួលបានជីវជាតិមួយនេះគ្រប់គ្រាន់ពីរបបអាហារតែមួយមុខ ដូច្នេះត្រូវតែប្រើបន្ថែមជាមួយនឹងថ្នាំបំប៉នជីវជាតិនេះទៀតដោយមានការពិគ្រោះជាមួយគ្រូពេទ្យត្រឹមត្រូវ។ ការកង្វះជីវជាតិមួយនេះជាហេតុនាំឲ្យកូនកើតមិនគ្រប់ខែ កូនកើតមិនគ្រប់ទម្ងន់ និងកើតមកខូច ឬបាត់អវៈយវៈទៀត។ (អាន:ថ្នាំងងុយគេង ពេលអ្នកគួរប្រើ)
ក្រៅពីនេះ ការគ្រប់គ្រងទម្ងន់ពេលត្រៀមមានផ្ទៃពោះបានយ៉ាងល្អ ការពិនិត្យសុខភាពជាមួយនឹងការហាត់ប្រាណបានគ្រប់គ្រាន់ ចៀសវាងការញ៉ាំជាតិកាហ្វេអ៊ីន ព្រមទាំងប្រើថ្នាំបំប៉នដែលណែនាំដោយគ្រូពេទ្យបានត្រឹមត្រូវ ជាពិសេសការប្រើប្រាស់វីតាមីន B9 នៅពេលមានផ្ទៃពោះភ្លាមនឹងជួយធានាបាននូវការមានផ្ទៃពោះប្រកបដោយសុខភាពល្អ ហើយកូនកើតមកមានទម្ងន់ប្រកបដោយសុខភាពល្អទៀត៕