ស្នាមអ៊ុចខ្មៅលើស្បែកមិនត្រឹមតែជាបញ្ហាគួរអោយរំខានប៉ុណ្ណោះទេ ប៉ុន្តែថែមទាំងអាចធ្វើអោយអ្នកបាត់បង់នូវភាពទាក់ទាញផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប្រសិនបើអ្នកកំពុងជួបប្រទះបញ្ហានេះ ហើយមិនចង់ទទួលយកការព្យាបាលបែបទំនើប ឬការប្រើប្រាស់ផលិតផលសម្រស់ផ្សេងៗដែលមានផ្ទុកសារធាតុគីមីនោះក៏កុំបារម្ភ! ក៏ព្រោះស្នាមអ៊ុចខ្មៅលើស្បែកអាចត្រូវបានដោះស្រាយតាមរយៈរូបមន្តបែបធម្មជាតិមួយចំនួន។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធិភាពខ្ពស់កម្ចាត់ស្នាមអ៊ុចខ្មៅចេញពីស្បែកបានយ៉ាងឆាប់រហ័ស ៖
១. ដំឡូងបារាំង
អ្វីដែលអ្នកត្រូវធ្វើ គឺគ្រាន់តែហាន់ដំឡូងបារាំងមួយមើមជាចំណិតៗ រួចសឹមចាប់ផ្ដើមកិនយកទឹក។ លាបទឹកដំឡូងបារាំងលើស្បែកដែលមានស្នាមអ៊ុចខ្មៅ ហើយទុកចោលសម្រាប់រយៈពេលពី ២ ទៅ ៣ នាទី សឹមលាងសម្អាតចេញជាការស្រេច។ អនុវត្តជាប្រចាំរហូតទទួលបានលទ្ធផលគាប់ចិត្ត។
២. ទឹកខ្មេះផ្លែប៉ោម
លាយទឹកខ្មេះផ្លែប៉ោមជាមួយទឹកធម្មតាក្នុងបរិមាណស្មើគ្នា។ កូរឱ្យសព្វ សឹមលាបលើស្បែកដែលមានស្នាមអ៊ុចខ្មៅ។ អ្នកអាចបន្ថែមទឹកក្រូចឆ្មារប៉ុន្មានដំណក់ចូលដើម្បីទទួលបានលទ្ធផលកាន់តែប្រសើរ។ ទុកចោលសម្រាប់រយៈពេល ៣០ នាទី លាងសម្អាតចេញជាមួយទឹកក្ដៅឧណ្ហៗ បន្ទាប់មកសឹមលាបផលិតផលផ្ដល់សំណើមដល់ស្បែក។
៣. ប្រទាលកន្ទុយក្រពើ
ចំពោះផ្ទៃមុខ អ្វីដែលអ្នកត្រូវធ្វើ គឺយកជែល ឬសាច់ប្រទាលកន្ទុយក្រពើស្រស់មកលាបលើស្បែកមុខដែលទទួលរងផលប៉ះពាល់ ហើយម៉ាស្សាសម្រាប់រយៈពេលពី ១០ ទៅ ១៥ នាទីសិន សឹមលាងមុខចេញជាមួយទឹកធម្មតាជាការស្រេច។ អ្នកអាចលាយទឹកក្រូចឆ្មារ ជាមួយម្ស៉ៅរមៀត និងជែលប្រទាលកន្ទុយក្រពើមកលាបលើផ្ទៃមុខក៏បាន។ អនុវត្តម្ដងក្នុងមួយថ្ងៃ សម្រាប់រយៈពេលពី ២ ទៅ ៣ សប្តាហ៍។ ចំពោះស្បែកត្រង់ដៃជើង ឬខ្លួន អ្នកអាចយកជែលប្រទាលកន្ទុយក្រពើលាបលើតំបន់ស្បែកដែលទទួលរងផលប៉ះពាល់ និងទុកចោលរហូតដល់ស្ងួត សឹមលាងសម្អាតចេញជាមួយទឹកធម្មតា។ អនុវត្តជាប្រចាំរហូតទទួលបានលទ្ធផលល្អប្រសើរ។
៤. ក្រូចឆ្មារ
អ្វីដែលអ្នកត្រូវធ្វើ គឺគ្រាន់តែច្របាច់យកទឹកក្រូចឆ្មារស្រស់ ១ ផ្លែ ហើយប្រើប្រាស់សំឡីជ្រលក់លាប ឬផ្ដិតថ្នមៗលើតំបន់ស្បែកដែលទទួលរងផលប៉ះពាល់ និងទុកចោលសម្រាប់រយៈពេលពី ១ ទៅ ២ ម៉ោងសិន សឹមលាងជាមួយទឹកធម្មតា។ អនុវត្តរូបមន្តនេះ ២ ដងក្នុងមួយថ្ងៃជាប្រចាំ ហើយត្រូវប្រាកដថាអ្នកមិនចេញក្រៅត្រូវពន្លឺព្រះអាទិត្យក្រោយពីលាបទឹកក្រូចឆ្មាររួច។ សម្រាប់អ្នកដែលមានរបួសលើស្បែកមិនគួរអនុវត្តរូបមន្តនេះឡើយ។ ហើយរូបមន្តនេះក៏មិនសាកសមសម្រាប់អ្នកដែលមានស្បែកមុខស្ដើងឆាប់ប្រតិកម្មដែរ។
៥. ប្រទាលកន្ទុយក្រពើ ស្ករស និងទឹកក្រូចឆ្មារ
អ្វីដែលអ្នកត្រូវធ្វើ គឺលាយជែលប្រទាលកន្ទុយក្រពើជាមួយស្ករស ១ ស្លាបព្រាបាយ និងទឹកក្រូចឆ្មារស្រស់ ១ ស្លាបព្រាបាយចូលគ្នាឱ្យសព្វ។ លាងសម្អាតដៃឱ្យស្អាត សឹមចាប់ផ្ដើមដុសខាត់ល្បាយថ្នមៗលើស្បែកដែលមានស្នាមអ៊ុចខ្មៅសម្រាប់រយៈពេល ១០ នាទី ហើយលាងសម្អាតចេញជាមួយទឹកធម្មតាជាការស្រេច។ កុំភ្លេចប្រើប្រាស់ផលិតផលផ្ដល់សំណើមដល់ស្បែកតាមក្រោយ៕