Join with Health.com.kh on Telegram

ឆៃថាវក្រហមជាបន្លែមើមមួយប្រភេទដែលភាគច្រើននៃពួកយើងធ្លាប់ស្គាល់រួចមកហើយ ប៉ុន្តែទោះជាចូលចិត្តទទួលទានក៏ដោយ ក៏ប្រហែលមិនចាប់អារម្មណ៍ដល់អត្ថប្រយោជន៍របស់បន្លែមើមនេះចំពោះសុខភាពឡើយ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីឥទ្ធិពលវិជ្ជមានដ៏ប្រសើរនៃការទទួលទានឆៃថាវក្រហម ៖

១. បញ្ចុះសម្ពាធឈាម

ចូរបន្ថែមទឹកមើមឆៃថាវក្រហមក្នុងរបបអាហារប្រចាំថ្ងៃ ប្រសិនបើអ្នកចង់បញ្ចុះសម្ពាធឈាមតាមបែបធម្មជាតិ។ ក្រុមអ្នកវិទ្យសាស្ត្រនិយាយថា ប្រសិទ្ធភាព​នេះ​បាន​មក​ដោយសារ​មើម​ឆៃថាវ​ក្រហម​មាន​កម្រិត​សារធាតុ​នីត្រាត​ខ្ពស់។ ការ​ទទួលទាន​អាហារ​ដែល​សម្បូរ​ដោយសារ​ធាតុ​នីត្រាត​អាច​នាំ​ឱ្យ​មាន​ប្រតិកម្ម​គីមី​ជា​បន្តបន្ទាប់​ក្នុង​ឈាម ដែល​បញ្ហា​នេះ​អាច​បង្កើន​បរិមាណ​អុក​ស៊ី​សែន​នៅ​កន្លែង​ដែល​រាង​កាយ​ខ្វះ។ លើសពីនេះទៅទៀតទឹកមើមឆៃថាវក្រហមក៏ជួយធ្វើអោយសសៃឈាមរីកធំ ហើយសម្ពាធឈាមនឹងថយចុះ។

២. កាត់បន្ថយហានិភ័យនៃជំងឺបេះដូង

នោះក៏ព្រោះតែមើមឆៃថាវក្រហមមានផ្ទុកសម្បូរទៅដោយសារធាតុប្រឆាំងអុកស៊ីតកម្ម tannins សារធាតុ anthocyanins សារធាតុ quercetin ជាតិសសៃ និងសារធាតុចិញ្ចឹមផ្សេងទៀតដែលជួយកម្ចាត់កូឡេស្តេរ៉ូលមិនល្អបានយ៉ាងប្រសើរទប់ស្កាត់ហានិភ័យនៃជំងឺបេះដូង។

៣. ទប់ស្កាត់ជំងឺមហារីកពោះវៀនធំ

តើអ្វីទៀតទៅដែលអ្នកអាចទទួលបានពីការទទួលទានមើមឆៃថាវក្រហម? ចម្លើយនោះ គឺជៀសផុតពីហានិភ័យនៃជំងឺមហារីកពោះវៀនធំដោយសារធាតុ anthocyanins ដែលមានវត្តមានក្នុងមើមឆៃថាវក្រហមផ្ដល់ឥទ្ធិពលយ៉ាងខ្លាំងក្លាប្រយុទ្ធប្រឆាំងនឹងជំងឺមហារីកប្រភេទនេះ។

៤. កម្ចាត់ជាតិពុលក្នុងរាងកាយ

ឆៃថាវក្រហម គឺជាអាហារដ៏មានឥទ្ធិពលបំផុតមួយដែលជួយក្នុងការកម្ចាត់ជាតិពុលចេញពីក្នុងរាងកាយ។ វាមានផ្ទុកនូវសារធាតុ pectin និង betaine ដែលជួយការពារប្រព័ន្ធរំលាយអាហារនិងថ្លើម។ សារធាតុគីមីទាំងនេះក៏អាចជួយសម្អាតក្នុងរាងកាយផងដែរ ដោយកាត់បន្ថយបរិមាណនៃជាតិពុលដែលរាងកាយកំពុងផ្ទុក។ បន្លែមើមនេះក៏ជាប្រភពដ៏សម្បូរបែបនៃជាតិម៉ាញ៉េស្យូម ជាតិដែក កាល់ស្យូម និងជាតិស័ង្កសីដែលរាងកាយត្រូវការចាំបាច់ដើម្បីដំណើរការកម្ចាត់ ឬបន្សាបជាតិពុលចេញពីក្នុងរាងកាយ។ លើសពីនេះទៅទៀតបរិមាណខ្ពស់នៃជាតិសសៃក្នុងឆៃថាវក្រហមជួយធ្វើឱ្យការរំលាយអាហារមានភាពប្រសើរឡើងនិងជួយរាងកាយកម្ចាត់កាកសំណល់។

៥. ប្រយុទ្ធប្រឆាំងការរលាកក្នុងរាងកាយ

នោះក៏ព្រោះតែមើមឆៃថាវក្រហមមានផ្ទុក Polyphenols ជាសារធាតុប្រឆាំងអុកស៊ីតកម្មដ៏មានឥទ្ធិពលមួយជួយកម្ចាត់រ៉ាឌីកាល់សេរីដែលធ្វើឱ្យខូចកោសិកានិងបង្កការរលាកផ្សេងៗក្នុងរាងកាយ។

៦. ទប់ស្កាត់បញ្ហាខ្វះគ្រាប់ឈាមក្រហម

មើមឆៃថាវក្រហមជាប្រភពដ៏ប្រសើរនៃជាតិដែកដែលជួយបង្កើនកោសិកាគ្រាប់ឈាមក្រហមដឹកនាំអុកស៊ីសែន។ ដូច្នេះកុំភ្លេចបន្ថែមឆៃថាវក្រហមក្នុងរបបអាហារប្រចាំថ្ងៃរបស់អ្នក ប្រសិនបើចង់ទប់ទល់នឹងបញ្ហាខ្វះគ្រាប់ឈាមក្រហម៕