កែងជើងជាឆ្អឹងដ៏ធំបំផុតមួយនៃប្រអប់ជើង។(អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប្រសិនបើអ្នករបួស ឬប្រើប្រាស់កែងជើងខ្លាំងពេកអ្នកនឹងជួបប្រទះអាការៈឈឺចាប់កែងជើងជាក់ជាមិនខាន។ ទោះជាយ៉ាងណាកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឲ្យដឹងពីរូបមន្តធម្មជាតិងាយៗ ប៉ុន្តែអាចបំបាត់អាការៈឈឺចាប់កែងជើងឆាប់រហ័ស ៖
១. ទឹកកក
អ្វីដែលអ្នកត្រូវធ្វើ គឺគ្រាន់តែស្អំទឹកកកមួយកញ្ចប់លើកែងជើង។ ប្រសិនបើគ្មានកញ្ចប់ទឹកកកទេនោះអ្នកអាចរុំដុំទឹកកកក្នុងកន្សែងជំនួសក៏បាន។
២. ស្អំលើដបទឹកកក
ជាដំបូងត្រូវបង្កកដបទឹកមួយសិន រួចប្រើប្រាស់កន្សែងរុំពីលើ បន្ទាប់មកដាក់បាតជើងលើដបទឹកកក។ ចាប់ផ្ដើមប្រើប្រាស់បាតជើងរមៀលដបទឹកយឺតៗចុះឡើងៗសម្រាប់រយៈពេលយ៉ាងហោចណាស់ ១៥ នាទី សឹមផ្លាស់ប្ដូរជើង។
៣. ត្រាំជើងជាមួយអំបិល
អ្វីដែលអ្នកត្រូវធ្វើ គឺបន្ថែមអំបិលចំនួនពី ២ ទៅ ៣ ស្លាបព្រាបាយក្នុងធុងទឹកក្ដៅឧណ្ហៗ រួចកូរឱ្យរលាយសព្វ សឹមត្រាំជើងក្នុងទឹកអំបិលនេះសម្រាប់រយៈពេលពី ១០ ទៅ ១៥ នាទី។
៤. ម៉ាស្សា
ជាវិធីដ៏ងាយនិងមានប្រសិទ្ធភាពខ្ពស់បំផុតមួយសម្រាប់បំបាត់អាការៈឈឺចាប់កែងជើង។ ការម៉ាស្សានឹងជួយសម្រួលសាច់ដុះ កាត់បន្ថយភាពឡើងរឹងតឹង បញ្ចេញសម្ពាធ និងធ្វើឱ្យចរន្តឈាមមានលក្ខណៈប្រសើរឡើង។ អ្នកអាចម៉ាស្សាកែងជើងឈឺពេលណាក៏បានមិនថាក្រោយពេលធ្វើលំហាត់ប្រាណ មុនពេលរត់ ឬមុនពេលចូលគេង។ ដើម្បីជាការប្រសើរអ្នកអាចប្រើប្រាស់ប្រេងដូង ប្រេងល្ង ឬប្រេងអូលីវយកមកលាបម៉ាស្សាលើកែងជើងសម្រាប់រយៈពេលយ៉ាងហោចណាស់ ១០ នាទី។
៥. លំហាត់ប្រាណបែបសន្ធឹង
អ្វីដែលអ្នកត្រូវធ្វើ គឺគ្រាន់តែឈរបាតជើងទទេរទល់មុខប៉ុន្តែឆ្ងាយពីជញ្ចាំងបន្តិច។ ប្រើប្រាស់ដៃទាំងសងខាងសង្កត់ទៅជញ្ចាំងទប់ខ្លួន។ ឈានជើងម្ខាងទៅមុខ ហើយចាប់ផ្ដើមទ្រេតយឺតៗទៅជញ្ចាំងរហូតមានអារម្មណ៍តឹងសន្ធឹងផ្នែកខាងក្រោយនៃកែងជើងនិងជើង។ ទប់ខ្លួនបែបនេះសម្រាប់រយៈពេលយ៉ាងហោចណាស់ ៣០ វិនាទី សឹមប្ដូរខាង។ អនុវត្តឱ្យបាន ១០ ដងសម្រាប់ជើងម្ខាង។
- នៅពេលណាទើបគួរទៅជួបពិនិត្យជាមួយគ្រូពេទ្យ?
ប្រសិនបើការឈឺចាប់មិនព្រមបាត់ទៅវិញក្នុងរយៈពេលពី ២ ទៅ ៣ សប្តាហ៍ ដោយទោះបីជាបានអនុវត្តរូបមន្តមួយចំនួនដូចបានបង្ហាញខាងលើនិងព្រមទាំងសម្រាកគ្រប់គ្រាន់ហើយនោះអ្នកគួរប្រញាប់ទៅជួបពិនិត្យជាមួយគ្រូពេទ្យជំនាញកុំស្ទាក់ស្ទើរ៕