ឯកសារសម្ងាត់មួយបានលាតត្រដាងថាចារកម្មអង់គ្លេសបានចំណាយពេលកន្លះសតវត្សរ៍ដើម្បីព្យាយាមចាប់យកយាន UFO ដូច្នេះពួកគេអាចប្រើបច្ចេកវិជ្ជាក្រៅភពដើម្បីបង្កើតកំពូលអាវុធ។
ឯកសារសម្ងាត់នោះបានបង្ហាញថា រដ្ឋាភិបាលអង់គ្លេសព្រួយបារម្ភថាសហភាពសូវៀតឬចិនបានចាប់យកយាន UFO និងកំពុងប្រមូលយកអាថ៌កំបាំងរបស់យាននោះដើម្បីអភិវឌ្ឍយន្តហោះចម្បាំងទំនើបល្បឿនលឿន។
សំណុំឯកសារសម្ងាត់នេះបានលាតត្រដាងថា ពីឆ្នាំ ១៩៤៧ ដល់ឆ្នាំ ១៩៩៧ ទីភ្នាក់ងារស៊ើបការណ៍សម្ងាត់អង់គ្លេសបានបើកដំណើរការការិយាល័យ UFO ចំនួន២ ក្នុងនោះមានការិយាល័យមួយទុកសម្រាប់ទទួលទូរស័ព្ទពីសាធារណជន។ ការងារពិតប្រាកដត្រូវបានធ្វើឡើងជាសម្ងាត់ដោយពួកចារកម្ម ដែលគេចាត់តាំងឱ្យស៊ើបអង្កេត។
ការិយាល័យ UFO បានបិទដំណើរការក្នុងឆ្នាំ ១៩៩៧ បន្ទាប់ពីមានការព្រួយបារម្ភថា ការងាររបៀបនេះអាចនឹងរំខានដល់ចារកម្មក្នុងការបំពេញកិច្ចការសំខាន់ដទៃទៀត៕
ប្រភព៖ rasmeinews.com