មុខរបស់បុរសប៉ាគីស្ថានម្នាក់បានប៉ោងធំជាងធម្មតា២ដង ហើយគាត់កំពុងតស៊ូជាមួយនឹងជំងឺមហារីកមាត់យ៉ាងធ្ងន់ធ្ងរ ខណៈដែលគ្រូពេទ្យក្នុងតំបន់អះអាងថា គ្រូពេទ្យធ្មេញក្លែងក្លាយគួរតែត្រូវស្តីបន្ទោស។
លោក មូហាំម៉ាត់ ហ្វារូគ អាយុ ២១ ឆ្នាំមកពីតំបន់ឡាន់ឌី ក្រុងការ៉ាជី ក្នុងខេត្តស៊ីនរបស់ប៉ាគីស្ថាន បានឱ្យគ្រូពេទ្យធ្មេញក្លែងក្លាយដកធ្មេញ បន្ទាប់ពីគាត់ឈឺធ្មេញពេក។
មាត់របស់គាត់បានចាប់ផ្តើមហើម ៦ខែបន្ទាប់ពីដកធ្មេញ ដោយសារជំងឺមហារីកមាត់ ហើយអ្នកឯកទេសក្នុងតំបន់ជឿថាគាត់បានឆ្លងមេរោគ បន្ទាប់ពីដកធ្មេញ។
ទោះយ៉ាងណា ក្រុមវេជ្ជបណ្ឌិតអង់គ្លេសមានការសង្ស័យនិងអះអាងថា ការឈឺធ្មេញរបស់គាត់អាចជាលទ្ធផលនៃជំងឺមហារីករបស់គាត់តែម្តង។ ពួកគេក៏បានព្រមានផងដែរថាវាអាចបណ្តាលមកពីទម្លាប់ជក់បារីរបស់គាត់ ដែលជាកត្តាគ្រោះថ្នាក់បំផុតមួយ ត្រូវបានចុះបញ្ជីដោយ NHS ។
វេជ្ជបណ្ឌិតបានប្រាប់លោកហ្វារូគថាឱកាសនៃការរស់រានមានជីវិតរបស់គាត់គឺទាបខ្លាំងណាស់ ទោះបីគាត់កំពុងទទួលការព្យាបាលដោយគីមីក៏ដោយ។ គាត់បានចំណាយពេលចុងក្រោយរបស់គាត់ដេកលើគ្រែក្នុងផ្ទះរបស់គាត់ ដោយមិនអាចកម្រើកបាននោះឡើយ៕
ប្រភព៖ rasmeinews.com