ងាយៗ! ចង់រក្សាភាពក្មេងជាងវ័យគ្មានអ្វីពិបាកឡើយ កុំរំលងអត្ថបទនេះ

ជាធម្មតាស្បែកយារធ្លាក់ រួមជាមួយបញ្ហានៃភាពចាស់ជាងវ័យ គឺបណ្ដាលមកពីការចុះខ្សោយនិងបាត់បង់ភាពបត់បែនធម្មជាតិ ក៏ដូចជាកូឡាជែន។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) វ័យកាន់តែជ្រេស្បែកក៏ប្រែជាយារតាមនោះដែរ ជាពិសេសប្រសិនបើអ្នកចេះថែរក្សា។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗ ប៉ុន្តែប្រសិទ្ធិភាពខ្ពស់ជួយទប់ស្កាត់ស្បែកយារធ្លាក់ ​និងភាពចាស់តាមវ័យ ៖

• អ្វីដែលគួរចៀសវាង ៖

១. អាហារផ្អែមនិងភេសជ្ជៈកំប៉ុង

ការទទួលទានអាហារ និងភេសជ្ជៈផ្អែមៗ ឬមានជាតិស្ករខ្ពស់ច្រើនពេកអាចបង្កើនល្បឿននៃភាពចាស់តាមវ័យនៃស្បែកគួរឱ្យកត់សម្គាល់។ នោះក៏ព្រោះតែជាតិស្ករតែងផ្សារភ្ជាប់ជាមួយប្រូតេអ៊ីនក្នុងរាងកាយតាមរយៈដំណើរការមួយហៅថា glycation បង្កការរលាកក្នុងរាងកាយដែលជះឥទ្ធិពលដល់កូឡាជែន និងភាពបត់បែននៃស្បែកបណ្ដាលឱ្យស្នាមជ្រីវជ្រួញលេចឡើងឆាប់រហ័ស រួមជាមួយបញ្ហាស្បែកយារធ្លាក់ផងដែរ។

២. អាហារកែច្នៃ

អាហារកែច្នៃ គឺជាសត្រូវលេខមួយនៃសុខភាពស្បែកល្អប្រសើររក្សាបាននូវភាពក្មេងជាងវ័យ។ ដូច្នេះចូរកាត់បន្ថយ ឬជៀសវាងទទួលទានអាហារទាំងនេះ ហើយជ្រើសរើសការទទួលទានបន្លែផ្លែឈើស្រស់ឱ្យច្រើនជំនួសវិញ។

៣. មិនធ្វើលំហាត់ប្រាណ

ការធាត់លើសទម្ងន់អាចធ្វើឱ្យស្បែកមុខយារបាត់បង់ភាពតឹងណែន ក៏ដូចជាភាពបត់បែនគួរឱ្យព្រួយបារម្ភ។ ដូច្នេះការធ្វើលំហាត់ប្រាណជាប្រចាំនឹងជួយឱ្យអ្នករក្សាបាននូវទម្ងន់ត្រឹមត្រូវសមស្រប រួមជាមួយស្បែកស្រស់ស្អាតក្មេងជាងវ័យផងដែរ។

៤. ជក់បារី

ប្រសិនបើអ្នកជក់បារី ចូរបញ្ឈប់ទម្លាប់មិនល្អនេះភ្លាម! ការជក់បារីយ៉ាងហោចណាស់ ២០ ដើមជាប្រចាំអាចធ្វើឱ្យស្បែកចាស់ជាងវ័យដល់ទៅ ១០ដងឯណោះ។

៥. ឧស្សាហ៍ត្រូវពន្លឺព្រះអាទិត្យខ្លាំងពេក

ពន្លឺព្រះអាទិត្យល្អសម្រាប់សុខភាពស្បែក ប៉ុន្តែក៏បង្កផលប៉ះពាល់ដល់ស្បែកគួរឱ្យព្រួយបារម្ភ។ ហើយការត្រូវកម្ដៅព្រះអាទិត្យច្រើនពេកអាចបង្ករោគសញ្ញានៃភាពចាស់មុនវ័យ និងបង្កើនហានិភ័យនៃជំងឺមហារីកស្បែកផងដែរ។ ដូច្នេះដើម្បីជាការប្រសើរ ចូរស្ថិតនៅក្នុងម្លប់ចន្លោះម៉ោង ១១ ព្រឹក ដល់ ២ ល្ងាច ឬនៅពេលពន្លឺព្រះអាទិត្យក្ដៅខ្លាំង។ យ៉ាងហោចណាស់ ក៏ចេះបិតបាំងមុខ និងកុំភ្លេចលាបឡេការពារកម្ដៅថ្ងៃដែលមាន SPF ៣០ ឬខ្ពស់ជាងនេះដើម្បីការពារស្បែកពីកម្ដៅខ្លាំងនៃព្រះអាទិត្យរាល់ពេលចេញទៅក្រៅក្រោមកម្ដៅថ្ងៃ។

៦. ប្រើប្រាស់ផលិតផលមិនត្រូវនឹងប្រភេទស្បែក

ដើម្បីការពារស្បែកពីភាពចាស់តាមវ័យនិងការបំផ្លាញពីពន្លឺព្រះអាទិត្យ អ្នកគួរដឹងច្បាស់ថាតើផលិតផលថែរក្សាស្បែកណាមួយដែលត្រឹមត្រូវសាកសមជាមួយនឹងប្រភេទនៃស្បែករបស់អ្នក។ ការប្រើប្រាស់ផលិតផលថែរក្សាស្បែកខុសប្រភេទអាចបង្កបញ្ហាគួរអោយព្រួយបារម្ភជាច្រើន។

• អ្វីដែលគួររួមបញ្ចូលក្នុងរបបអាហារ ៖

១. ផ្លែបឺរ

ផ្លែឈើនេះមានផ្ទុកសម្បូរទៅដោយជាតិខ្លាញ់ល្អៗ! ការទទួលទានផ្លែបឺរឱ្យបាន ១ ផ្លែក្នុងមួយថ្ងៃជួយកាត់បន្ថយកម្រិតនៃកូឡេស្តេរ៉ូល និងគាំទ្រដល់ដំណើរការនៃការស្តារឡើងវិញរបស់កោសិកាស្បែក។ ផ្លែបឺរផ្ដល់ឱ្យរាងកាយនូវវីតាមីន C ប៉ូតាស្យូម និងសារធាតុប្រឆាំងអុកស៊ីតកម្ម និងអាស៊ីតហ្វូលីក។

២. ការ៉ុត

មិនត្រឹមតែល្អសម្រាប់រក្សាសុខភាពភ្នែកតាមរយៈបរិមាណខ្ពស់នៃវីតាមីន A ប៉ុណ្ណោះទេ ប៉ុន្តែការ៉ុតក៏ជួយការពារស្បែកមិនឱ្យចាស់មុនវ័យដោយទប់ស្កាត់ស្នាមជ្រួញដែលបណ្ដាលមកពីការប៉ះពាល់នឹងកាំរស្មីយូវីផងដែរ។ ត្រូវចាំក្នុងចិត្តផងថា មិនគួរចម្អិនការ៉ុតឱ្យឆ្អិនពេកទេក៏ព្រោះការធ្វើបែបនេះនឹងកាត់បន្ថយបរិមាណនៃសារធាតុចិញ្ចឹម និងវីតាមីនផ្សេងៗក្នុងការ៉ុត។

៣. ផ្លែក្រូចគ្រប់ប្រភេទ

ជាប្រភពដ៏ប្រសើរនៃវីតាមីន C និងអាស៊ីតហ្វូលីក។ ក្រូចឆ្មារមានផ្ទុកវីតាមីន C ខ្ពស់ជាងក្រូចផ្សេងៗ ដូច្នេះការទទួលទានទឹកក្រូចឆ្មារនៅពេលពោះទទេរជួយសម្អាតពោះវៀនធំ និងបន្សាបជាតិពុលផ្សេងៗក្នុងរាងកាយ ក៏ដូចជាពង្រឹងសុខភាពស្បែក និងបង្កើនការផលិតកូឡាជែនផងដែរ។

៤. ខ្ទឹមស

មានគុណសម្បត្តិប្រឆាំងរោគផ្សិត និងបាក់តេរីដែលធ្វើឱ្យខ្ទឹមសជួយរក្សាសុខភាពស្បែកបានយ៉ាងប្រសើរ។ ហើយខ្ទឹមសជាប្រភពដ៏ប្រសើរនៃសារធាតុ Allicin ដែលជួយកម្ចាត់បាក់តេរីបង្ករោគមុន។ សារធាតុ Allicin ក៏មានប្រសិទ្ធិភាពជួយកាត់បន្ថយការហើម, ការរលាក និងបង្កើនចរន្តឈាមហូរផងដែរ។

៥. សូកូឡាខ្មៅ

សូកូឡាខ្មៅដែលផ្សំឡើងពីកាកាវយ៉ាងហោចណាស់ ៧៥ ភាគរយ គឺមានផ្ទុកសម្បូរទៅដោយសារធាតុប្រឆាំងអុកស៊ីតកម្មដូចជា​ flavonoids ដែលជួយដល់ស្បែកឱ្យការពារខ្លួនឯងពីការបំផ្លាញដោយពន្លឺព្រះអាទិត្យ, ប្រយុទ្ធប្រឆាំងរ៉ាឌីកាល់សេរី និងបង្កើនជាតិសំណើម ក៏ដូចជាភាពក្រាស់ផងដែរ។

៦. ប្រេងអូលីវ

ជាប្រភពនៃ alpha-linolenic acid ដែលជួយស្បែកក្នុងការរក្សាបាននូវជាតិសំណើមទប់ស្កាត់ភាពចាស់មុនវ័យ។ ដើម្បីជាការប្រសើរក្រៅពីបន្ថែមប្រេងអូលីវក្នុងរបបអាហារប្រចាំថ្ងៃហើយនោះ ចូរប្រើវាប៉ុន្មានដំណក់ម៉ាស្សាជុំវិញភ្នែកនៅពេលយប់មុនអ្នកចូលគេងដោយវិធីនេះជួយរក្សាសំណើមនៃស្បែក និងកាត់បន្ថយស្នាមជ្រួញត្រង់កន្ទុយភ្នែក៕