ការដែលមានអាយុច្រើន គឺជាកត្តាប្រឈមមុខដ៏ធំមួយនៃភាពភ្លេចភ្លាំង។ ដូច្នេះមនុស្សយើងចៀសមិនផុតទេពីការឆ្លងកាត់រឿងនេះ ប៉ុន្តែមិនមែនមានន័យថាយើងត្រូវតែបណ្តោយខ្លួនរងការភ្លេចភ្លាំងដែរឡើយ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ជាមួយគ្នានេះដែរ ខ្ញុំមានមធ្យោបាយមួយចំនួនដែលអាចជួយអ្នកបានតាមរបៀបដូចខាងក្រោមនេះ៖
ឈប់ជក់បារី
យោងទៅតាមការស្រាវជ្រាវតាមបែបវិទ្យាសាស្រ្តបានឲ្យដឹងថា អ្នកដែលជក់បារីគឺមានការប្រឈមនឹងភាពភ្លេចភ្លាំងខ្ពស់ជាងអ្នកមិនជក់រហូតដល់ ៥០ភាគរយឯណោះ។ នេះដោយសារតែ ការជក់បារីអាចបំផ្លាញសរសៃឈាមរួមទាំងសរសៃឈាមខួរក្បាលសម្រាប់ដឹកនាំអុកស៊ីសែនិង និងជីវជាតិតែម្តង។
ហាត់ប្រាណទៀងទាត់
ដើម្បីផ្គត់ផ្គង់ឈាមទៅខួរក្បាលបានគ្រប់គ្រាន់ យកល្អអ្នកគួរតែព្យាយាមហាត់ប្រាណឲ្យបានទៀងទាត់ ជាពិសេសយ៉ាងហោចណាស់ ២០នាទីក្នុងមួយថ្ងៃក៏បានដែរ។ ការហាត់ប្រាណដ៏ល្អបំផុតក្នុងការទប់ស្កាត់ភាពភ្លេចភ្លាំងគឺ ការដើរលឿនៗ រត់យឺតៗ រាំ ជិះកង់ និងហែលទឹក។
ហាត់ការគិត
មិនត្រឹមតែរាងកាយទេដែលអ្នកត្រូវការជំរុញឲ្យហាត់ ប៉ុន្តែចិត្តគំនិតក៏ត្រូវហាត់ដែរដើម្បីបង្កើនឱកាសនៃការមិនមានភាពភ្លេចភ្លាំងនៅថ្ងៃក្រោយ។ អ្នកអាចពង្រឹងដល់សុខភាពខួរក្បាលតាមរយៈការដោះស្រាយល្បែកល្បងប្រាជ្ញា និយាយភាសាបរទេស រៀនលេងឧបករណ៍តន្ត្រី អានសៀវភៅ ជាដើម។
ញ៉ាំបន្លែ និងផ្លែឈើឲ្យបានច្រើន
មានហេតុផលពីរយ៉ាងនៅពីក្រោយមូលហេតុនៃការញ៉ាំបន្លែ និងផ្លែឈើទៀងទាត់។ ទី១ វាផ្តល់នូវអង់ទីអុកស៊ីដង់ច្រើនសម្រាប់ជួយការពារកោសិកាខួរក្បាលពីរ៉ាឌីកាលសេរី។ ទី២ បន្លែនិងផ្លែឈើគ្មានកូឡេស្តេរ៉ុល តែមានជាតិសរសៃខ្ពស់ ដូច្នេះវាអាចជួយថែរក្សាសរសៃឈាមកុំឲ្យមានកំណកបាន។
ញ៉ាំត្រីសម្បូរខ្លាញ់
អ្នកអាចញ៉ាំត្រីរហូតដល់ពីរដងក្នុងមួយថ្ងៃបាន ជាពិសេសត្រីសាលម៉ុងតែម្តង។ នេះដោយសារតែវាសម្បូរអាស៊ីតខ្លាញ់អូមេហ្គាបី ដែលមិនត្រឹមតែជួយការពារសុខភាពខួរក្បាលទេ តែក៏ជួយការពារសរសៃឈាមឲ្យមានសុខភាពល្អ និងសរីរាង្គផ្សេងៗធ្វើការល្អដែរ។
បន្ថយស្រ្តេស និងការថប់អារម្មណ៍
ការដែលស្រ្តេស និងថប់អារម្មណ៍ច្រើនពេក និងគ្រប់ពេល អាចនាំឲ្យខូចខួរក្បាលបាន។ ហេតុដូច្នេះហើយការគ្រប់គ្រងស្រ្តេសគឺជារឿងដែលល្អដែលអ្នកគួរតែធ្វើបើសិនជាមិនចង់ឲ្យឆាប់ភ្លេចភ្លាំងទេ។ អ្នកអាចប្រើវិធីជាច្រើនដើម្បីគ្រប់គ្រង ឬបន្ថយស្រ្តេស ដូចជា ការតាំងសមាធិ ឬហាត់ប្រាណ។
គេងឲ្យបានច្រើននៅពេលយប់
ចូរប្រាកដថា អ្នកបានគេងលក់ស្កប់ស្កលពី ៧ ទៅ៩ម៉ោង និងមិនមានការរំខានអ្វីទាំងអស់។ រឿងនេះនឹងជួយឲ្យខួរក្បាលធូរស្រាលឡើងវិញពីភាពអស់កម្លាំង និងស្រ្តេសបាន។
ញ៉ាំគ្រឿងស្រវឹងក្នុងកម្រិតមធ្យម
កម្រិតមធ្យមត្រង់ចំណុចនេះគឺថា បុរសអាចញ៉ាំបាន២កែវក្នុងមួយថ្ងៃ ខណៈពេលស្រ្តីបាន ១កែវ ព្រោះកម្រិតប៉ុណ្ណេះក៏ផ្តល់ប្រយោជន៍ដល់សុខភាពដែរ។ យ៉ាងណាមិញអ្នកវិទ្យាសាស្រ្តនិយាយថា ការញ៉ាំគ្រឿងស្រវឹងច្រើនពេក មិនត្រឹមតែប៉ះពាល់ដល់សុខភាពទេ ថែមទាំងប្រឈមខ្ពស់នឹងភាពភ្លេចភ្លាំងបាន។
បន្ថយការញ៉ាំផ្អែម
យោងទៅតាមការស្រាវជ្រាវបានឲ្យដឹងថា មានទំនាក់ទំនងដ៏ខ្លាំងក្លាមួយរវាងជំងឺទឹកនោមផ្អែម និងជំងឺភ្លេចភ្លាំងពេលចាស់ជរា ដែលរឿងនេះគឺជាមូលហេតុដំបូងនៃភាពភ្លេចភ្លាំងតែម្តង។(អាន:ថ្នាំងងុយគេង ពេលអ្នកគួរប្រើ) យ៉ាងណាមិញ យកល្អគួរតែកាត់បន្ថយការញ៉ាំផ្អែមឲ្យបានបើសិនជាអ្នកមិនចង់កើតជំងឺភ្លេចភ្លាំងនៅពេលអនាគតទេ៕