យោងទៅតាមសេចក្តីរាយការណ៍របស់សារព័ត៌មាន Mail Online បានឲ្យដឹងថា ការត្រឡប់ទៅការញ៉ាំគ្រឿងស្រវឹងបួនប្រាំកំប៉ុងក្នុងមួយយប់អាចធ្វើឲ្យមនុស្សវ័យជំទង់ ឬវ័យក្មេងប្រឈមនឹងជំងឺបេះដូងបាន។ អ្នកស្រាវជ្រាវអាមេរិកបានរកឃើញថា បុរសដែលញ៉ាំគ្រឿងស្រវឹងចាប់ពី ៥កំប៉ុងឡើងទៅក្នុងមួយថ្ងៃ និងច្រើនដងក្នុងមួយឆ្នាំ និងមានសម្ពាធឈាមឡើងខ្ពស់ ហើយកូឡេស្តេរ៉ុលក្នុងឈាមក៏ខ្ពស់ជាងអ្នកដែលមិនបានញ៉ាំដែរ។
ការសិក្សានេះគឺផ្អែកទៅលើការសង្កេតមួយរបស់មនុស្សពេញវ័យក្នុងសហរដ្ឋអាមេរិក ដែលមានការប្រើប្រាស់ទិន្នន័យពីស្រ្តី និងបុរសអាយុពី ១៨ ទៅ ៤៥ឆ្នាំ។ ពួកគេត្រូវបានគេសួរថា តើកាលពីឆ្នាំមុនពួកគេបានញ៉ាំគ្រឿងស្រវឹងចាប់ពី ៥កំប៉ុងឡើងទៅក្នុងមួយថ្ងៃប៉ុន្មានដង (៤កំប៉ុងសម្រាប់ស្រ្តី)។
ការញ៉ាំគ្រឿងស្រវឹងហាក់បីដូចជាមិនជាប់ទាក់ទងនឹងសម្ពាធឈាម ឬកូឡេស្តេរ៉ុលសរុបរបស់ស្រ្តីឡើយ ថ្វីបើស្រ្តីដែលញ៉ាំគ្រឿងស្រវឹងទំនងជាលើសជាតិស្ករក្នុងឈាមទៅវិញ។ ដោយសារតែធម្មជាតិនៃការសិក្សា យើងមិនអាចនិយាយបានថា ការញ៉ាំគ្រឿងស្រវឹងធ្វើឲ្យលើសសម្ពាធឈាម និងកូឡេស្តេរ៉ុលសរុបលើបុរស ឬលើសជាតិស្ករក្នុងឈាមលើស្រ្តីឡើយ។
ជាមួយគ្នានេះដែរ ដោយសារតែមនុស្សទាំងនេះមិនត្រូវបានគេតាមដានក្នុងដំណាក់កាលបន្ទាប់ផងនោះ យើងមិនអាចប្រាកដថា តើការប្រែប្រួលទាំងនេះមានឥទ្ធិពលទៅលើសុខភាពនាពេលអនាគត់របស់ពួកគេឬអត់ឡើយ។ ប៉ុន្តែចាប់តាំងពីអ្វីដែលយើងដឹងអំពីជំងឺបេះដូងមក វានឹងក្លាយទៅជារឿងភ្ញាក់ផ្អើលវិញបើសិនជាវាមិនមានកម្រិតអវិជ្ជមានណាមួយដែលបង្កឡើងដោយសម្ពាធឈាម និងកូឡេស្តេរ៉ុលក្នុងឈាមទេនោះ។
ខណៈពេលដែលលទ្ធផលនៃការសិក្សាទាំងនេះមិនទាន់មានសេចក្តីសន្និដ្ឋាននៅឡើយ ការញ៉ាំគ្រឿងស្រវឹងច្រើនៗនឹងធ្វើឲ្យប៉ះពាល់ដល់សុខភាពផ្សេងៗទៀតចាប់ពី ស្រវឹងខួប រហូតដល់ខូចថ្លើម។ យ៉ាងណាមិញ យកល្អគួរតែកុំញ៉ាំគ្រឿងស្រវឹងច្រើនជាង ១៤កំប៉ុងក្នុងមួយសប្តាហ៍អី៕