ជំងឺសសៃឈាមបេះដូងកើនឡើងជាលំដាប់មកទល់សព្វថ្ងៃនេះ ហើយកត្តាហានិភ័យចម្បងមួយនៃជំងឺនេះបណ្ដាលមកពីការកើនឡើងនូវកូឡេស្តេរ៉ូលខ្ពស់ក្នុងឈាម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែកុំបារម្ភ! ក៏ព្រោះអ្នកអាចបញ្ចុះកម្រិតកូឡេស្តេរ៉ូលដោយគ្រាន់តែទទួលទានបន្លែ និងផ្លែឈើមួយចំនួន ព្រមជាមួយការផ្លាស់ប្ដូរទម្លាប់មួយចំនួន។ ថាតើបន្លែផ្លែឈើទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអ្វីដែលអ្នកគួរទទួលទាន រួមទាំងទម្លាប់ដែលគួរបញ្ឈប់ដើម្បីទប់ស្កាត់កាត់បន្ថយកម្រិតកូឡេស្តេរ៉ូលមិនល្អ ៖
- អាហារគួរទទួលទាន ៖
១. ខ្ទឹមបារាំង និងខ្ទឹមស
មានផ្ទុកសម្បូរទៅដោយសារធាតុ flavonoid quercetin ដែលជួយទប់ស្កាត់ ក៏ដូចជាកាត់បន្ថយកម្រិតនៃកូឡេស្តេរ៉ូលមិនល្អក្នុងឈាមបានយ៉ាងប្រសើរ។ លើសពីនេះទៅទៀត ខ្ទឹមបារាំង ក៏ជាប្រភពនៃសារធាតុ sulphides ដែលជួយកាត់បន្ថយហានិភ័យនៃជំងឺមហារីកក្រពះ និងពោះវៀនធំផងដែរ។ រីឯខ្ទឹមសវិញ ជួយរក្សាសុខភាពសសៃឈាមបេះដូងល្អប្រសើរ ដោយវាមានផ្ទុកសារធាតុប្រឆាំងអុកស៊ីតកម្ម និងការរលាកដែលជួយកាត់បន្ថយបញ្ហារលាកផ្សេងៗក្នុងសសៃឈាម ក៏ដូចជាកម្រិតនៃកូឡេស្តេរ៉ូលមិនល្អ ព្រមទាំងទប់ស្កាត់ការបំផ្លាញដល់ជញ្ចាំងខាងក្នុងនៃសសៃឈាមផងដែរ។
២. ត្រីសាលម៉ុន
ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ ដែលល្អសម្រាប់សុខភាពនិងជួយកាត់បន្ថយកម្រិតនៃ
កូឡេស្តេរ៉ូលមិនល្អគួរអោយកត់សម្គាល់។ ដូច្នេះកុំភ្លេចបន្ថែមត្រីសម្បូរខ្លាញ់នេះក្នុងរបបអាហារអោយបានយ៉ាងហោចណាស់ម្ដង ឬ ពីរដងក្នុងមួយសប្តាហ៍។
៣. ក្រូច
ក្រៅពីវីតាមីន C, ជាតិសសៃ, សារធាតុ folate និងប៉ូតាស្យូម ដែលចាំបាច់ដើម្បីរក្សាសុខភាពរាងកាយរឹងមាំហើយនោះ ក្រូច ក៏ជាប្រភពនៃសារធាតុ pectin និង phytosterols ដែលជួយកម្ចាត់កូឡេស្តេរ៉ូលមិនល្អផងដែរ។
៤. សណ្ដែក
មានផ្ទុកសម្បូរទៅដោយជាតិកាល់ស្យូម, ជាតិដែក, វីតាមីន B និងសារធាតុប្រឆាំងអុកស៊ីតកម្មដែលជួយកាត់បន្ថយកម្រិតនៃកូឡេស្តេរ៉ូលមិនល្អ ហើយបង្កើនកម្រិតនៃកូឡេស្តេរ៉ូលល្អជំនួសវិញ។
៥. គ្រាប់ធញ្ញជាតិ
ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ និងអាស៊ីតខ្លាញ់ល្អ monounsaturated ដែលជួយកាត់បន្ថយកម្រិតនៃជាតិកូឡេស្តេរ៉ូលគួរអោយកត់សម្គាល់។ គ្រាប់ធញ្ញជាតិក៏មានប្រសិទ្ធិភាពកាត់បន្ថយការរលាក និងធ្វើអោយមុខងារសសៃឈាមក្នុងរាងកាយកាន់តែមានលក្ខណៈប្រសើរឡើងផងដែរ។
- ទម្លាប់គួរបញ្ឈប់ ៖
១. មិនធ្វើលំហាត់ប្រាណ
អ្នកប្រហែលជាមិនធ្លាប់ដឹងទេថាកង្វះសកម្មភាពរាងកាយអាចបង្កើនកម្រិតនៃកូឡេស្តេរ៉ូលមិនល្អគួរអោយព្រួយបារម្ភ។ ដូច្នេះដើម្បីជៀសផុតពីបញ្ហាណាមួយដែលបង្កឡើងដោយសារកម្រិតនៃកូឡេ
ស្តេរ៉ូលមិនល្អឡើងខ្ពស់ ចូរព្យាយាមធ្វើសកម្មភាពរាងកាយ ឬហាត់ប្រាណអោយបានទៀងទាត់។
២. តានតឹងក្នុងអារម្មណ៍ខ្លាំងពេក
ការតានតឹងក្នុងអារម្មណ៍ ឬស្ត្រេសគ្រប់ពេលសឹងតែរាល់ថ្ងៃអាចនឹងបង្កបញ្ហាសុខភាពជាច្រើន។ នោះក៏ព្រោះតែស្ត្រេសកាត់បន្ថយភាពរឹងមាំនៃប្រព័ន្ធភាពស៊ាំគួរឱ្យព្រួយបារម្ភ ហើយអ្នកនឹងងាយប្រឈមមុខជាមួយជំងឺ ឬបញ្ហាសុខភាពផ្សេងៗ រួមទាំងបញ្ហាកូឡេស្តេរ៉ូលមិនល្អឡើងខ្ពស់។ ដូច្នេះដើម្បីជាការប្រសើរ ចូរព្យាយាមគ្រប់គ្រងកម្រិតនៃភាពតានតឹងក្នុងអារម្មណ៍របស់អ្នក។
៣. ការជក់បារី
វាគ្មានអ្វីគួរឱ្យភ្ញាក់ផ្អើលឡើងដែលការជក់បារី គឺអាក្រក់ចំពោះសុខភាព។ ប៉ុន្តែតើអ្នកធ្លាប់ដឹងទេថា ការជក់បារីក៏កាត់បន្ថយកម្រិតនៃកូឡេស្តេរ៉ូលល្អ ឬប្រូតេអ៊ីន HDL ហើយបង្កើនកម្រិតកូឡេស្តេរ៉ូលមិនល្អខ្ពស់ដែលនឹងបង្កអោយមានគ្រោះថ្នាក់ចំពោះសសៃឈាម? ជាលទ្ធផលបញ្ហានៃការធ្លាក់ចុះនូវកម្រិតកូឡេស្តេរ៉ូលល្អបង្កើនហានិភ័យនៃជំងឺស្ទះសសៃឈាមបេះដូងគួរឱ្យព្រួយបារម្ភ។
៤. មិនគ្រប់គ្រងទម្ងន់
ការធាត់លើសទម្ងន់ គឺជាកត្តាចម្បងបំផុតមួយទៀតនៃការកើនឡើងនូវកម្រិតកូឡេស្តេរ៉ូលមិនល្អ។ នោះក៏ព្រោះតែការលើសទម្ងន់បង្កើនជាតិខ្លាញ់ទ្រីគ្លីសេរីដនិងកាត់បន្ថយកូឡេស្តេរ៉ូលល្អ ឬប្រូតេអ៊ីន HDL។
៥. រក្សារបបអាហារមិនល្អ
ការទទួលទានអាហារមានផ្ទុកជាតិខ្លាញ់ឆ្អែតច្រើនពេក ក៏បង្កបញ្ហាកម្រិតកូឡេស្តេរ៉ូលមិនល្អឡើងខ្ពស់គួរអោយកត់សម្គាល់ផងដែរ។ ដើម្បីជៀសផុតពីបញ្ហាកូឡេស្តេរ៉ូលមិនល្អឡើងខ្ពស់ ចូរកាត់បន្ថយការទទួលទានអាហារមានផ្ទុកសម្បូរទៅដោយជាតិខ្លាញ់ឆ្អែត ដោយជំនួសមកវិញនូវបន្ថែផ្លែឈើស្រស់ ត្រីសម្បូរខ្លាញ់ ព្រមទាំងធញ្ញជាតិគ្រាប់ពេញដែលមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ និងជាតិសសៃដែលល្អសម្រាប់សុខភាពបេះដូង៕