នាពេលបច្ចុប្បន្នពុំសូវមានមនុស្សស្រីច្រើនប៉ុន្មានឡើយដែលសុខចិត្តជ្រើសរើសបុរសមានវ័យចំណាស់មកធ្វើជាដៃគូជីវិត។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ហេតុអ្វីទៅ? នោះក៏ព្រោះតែទំនាក់ទំនងខុសវ័យគ្នានេះច្រើនត្រូវបានមនុស្សមួយចំនួនក្នុងសង្គមរិះគន់។ ទោះជាយ៉ាងណាស្នេហាខុសវ័យគ្នាបែបនេះនៅ
តែបន្តកើតមានដោយសារមនុស្សស្រីផ្ដោតសំខាន់លើមូលហេតុខ្លះៗដែលវេបសាយសុខភាព 
Health.com.khនឹងបង្ហាញអោយដឹងខាងក្រោម ៖ 

១. បុរសវ័យចំណាស់មានភាពចាស់ទុំជាង

យើងទាំងអស់គ្នាសុទ្ធតែបានដឹងហើយថាមនុស្សស្រី គឺច្រើនមានភាពចាស់ទុំឆាប់ជាងមនុស្សប្រុស។ ដូច្នេះហើយពួកគេពុំសូវជ្រើសរើសបុរសដែលមានវ័យក្មេងជាងមកធ្វើជាដៃគូជិវិតរបស់គេឡើយ  ដោយគិតថាបុរសវ័យក្មេងចូលចិត្តសាកល្បងអ្វីថ្មីៗ ពិសេសនោះគឺមិនទាន់ត្រៀមខ្លួនរួចរាល់ក្នុងការឈានទៅរកទំនាក់ទំនងមួយដែលច្បាស់លាស់។ ផ្ទុយទៅវិញបុរសវ័យចំណាស់ហាក់ដូចជាគួរឱ្យទុកចិត្តបាន​ និងមានភាពទាក់ទាញខ្លាំងជាងចំពោះរឿងជីវិតគ្រួសារនេះ។ ក៏បុរសវ័យចំណាស់ធ្លាប់បានឆ្លងកាត់រឿងរ៉ាវស្នេហា រួមទាំងទំនាក់ទំនងផ្សេងៗ និងការលេងសប្បាយច្រើន ដូច្នេះពួកគេនឹងអាចត្រៀមរួចជាស្រេចក្នុងការកសាងគ្រួសារដ៏ប្រាកដប្រជាមួយមិនខាន។

២. បុរសវ័យចំណាស់ដឹងច្បាស់នូវអ្វីដែលគេចង់បាន

លក្ខណៈសម្បត្តិដ៏គួរអោយទាក់ទាញម្យ៉ាងទៀតរបស់បុរសវ័យចំណាស់ គឺជីវិតរបស់ពួកគេមានស្ថេរភាពមិនរញ៉េរញ៉ៃ។ ពួកគេដឹងយ៉ាងច្បាស់ថាខ្លួនឯងចង់បានអ្វី ត្រូវយកវាមកដោយរបៀបណា ហើយរបស់នោះមានតម្លៃប៉ុណ្ណាចំពោះគេ។ 

៣. ស្ថេរភាពហិរញ្ញវត្ថុ

អ្វីដែលមនុស្សស្រីភាគច្រើនចង់បានបំផុតនៅពេលដែលពួកគេចាប់ផ្តើមកសាងជីវិតគ្រួសារនោះ គឺស្ថេរភាពខាងហិរញ្ញវត្ថុ។ មនុស្សស្រីចង់បានបុរសម្នាក់ដែលមានប្រាក់គ្រប់គ្រាន់ដើម្បីទ្រទ្រង់នូវតម្រូវ
ការក្នុងគ្រួសារ ព្រមទាំងការចំណាយលើកូនៗរបស់ពួកគេ។ 

៤. បុរសវ័យចំណាស់ចេះជួយការងារផ្សេងៗក្នុងផ្ទះ

មនុស្សស្រីភាគច្រើន គឺពេញចិត្តចំពោះស្វាមីដែលចេះជួយធ្វើការងារផ្សេងៗក្នុងផ្ទះ ព្រមទាំងដឹងនូវទុក្ខធុរៈរបស់ប្រពន្ធ ហើយនៅពេលនិយាយដល់ចំនុចនេះបុរសវ័យចំណាស់ហាក់ដូចជាស័ក្តិសមបំផុត។បុរសភាគច្រើនគិតថាការងារផ្ទះជាកាតព្វកិច្ចរបស់ភរិយាដែលត្រូវតែធ្វើ! ទោះជាយ៉ាងណាមិនមែនបុរសទាំងអស់សុទ្ធតែយល់បែបនេះឡើយ។ បុរសមួយចំនួនមិនប្រកាន់ថាការងារនេះរបស់មនុស្សស្រី ឬយ៉ាងណានោះទេ ពួកគេជួយលាងចានក្រោយទទួលទានរួច និងសូម្បីតែបោកខោអាវខ្លួន
ឯងថែមទៀតពេលខ្លះ។ នេះមិនមែនមានន័យថាពួកគេចាំបាច់ត្រូវធ្វើរឿងអស់នេះគ្រប់ពេលឡើយ ប៉ុន្តែអាចជួយម្តងម្កាលនៅពេលចាំបាច់។

៥. បុរសវ័យចំណាស់អាចផ្ដល់នូវអារម្មណ៍ថាមានសុវត្ថិភាពដល់មនុស្សដែលពួកគេស្រឡាញ់

ពិតណាស់ក្រៅពីលំនឹងខាងហិរញ្ញវត្ថុ ឬការចំណាយក្នុងគ្រួសារហើយនោះ អ្វីដែលមនុស្សស្រីចង់បានបំផុតមួយផ្សេងទៀត គឺអារម្មណ៍ថាមានសុវត្ថិភាពក្នុងជីវិត។ មនុស្សស្រីត្រូវការដៃគូដែលពួកគេអាចពឹងពាក់បានដើម្បីរស់នៅជាមួយគ្នា។ ពួកគេត្រូវការអ្នកដែលច្បាស់លាស់អាចផ្ដល់នូវអារម្មណ៍ថាមានសុវត្ថិភាពទទួលបានការការពារពីមនុស្សដែលខ្លួនស្រឡាញ់។ ហើយបុរសវ័យចំណាស់ភាគច្រើន គឺអាចផ្ដល់នូវអារម្មណ៍នោះដល់ពួកគេបានយ៉ាងប្រសើរ៕