គ្រាប់ជី ជាអាហារសុខភាពបំផុតមួយដែលមានផ្ទុកសម្បូរទៅដោយសារធាតុចិញ្ចឹមសំខាន់ៗសម្រាប់រក្សាសុខភាពរាងកាយល្អប្រសើរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ភាគច្រើននៃពួកយើងសុទ្ធតែធ្លាប់ស្គាល់ ក៏ដូចជាចូលចិត្តទទួលទានគ្រាប់ជី ប៉ុន្តែប្រហែលជាមិនបានចាប់អារម្មណ៍អំពីអត្ថប្រយោជន៍ដ៏អស្ចារ្យ
របស់វាក្នុងការទប់ស្កាត់ និងដោះស្រាយបញ្ហាសុខភាពផ្សេងៗ។ ខាងក្រោមវេបសាយសុខភាព
Health.com.kh នឹងបង្ហាញឱ្យដឹងពីផលវិជ្ជមាននៃការទទួលទានគ្រាប់ជី ៖
១. ព្យាបាលបញ្ហាច្រាលទឹកអាស៊ីតក្រពះ
គ្រាប់ជីមានប្រសិទ្ធិភាពបំផុតដោះស្រាយបញ្ហាក្រហាយទ្រូងដោយវាជាប្រភពដ៏ប្រសើរនៃប្រូតេអ៊ីន
អាស៊ីតខ្លាញ់អូមេហ្គា ៣ ម៉ាញ៉េស្យូម ជាតិសសៃ ជាតិដែក និងសេលេញ៉ូម។ គ្រាន់តែយកគ្រាប់ជី ១ ស្លាបព្រាបាយពេញលាយជាមួយទឹកធម្មតាហើយទទួលទានជាការស្រេច។
២. ផ្ដល់សារធាតុចិញ្ចឹមសំខាន់ៗ
គ្រាប់ជីមានផ្ទុកសម្បូរទៅដោយសារធាតុចិញ្ចឹមសំខាន់ៗដែលចាំបាច់ចំពោះសុខភាពរាងកាយ រួមបញ្ចូលទាំងប្រូតេអ៊ីន ជាតិសសៃ អាស៊ីតខ្លាញ់អូមេហ្គា ៣ កាល់ស្យូម ម៉ង់កាណែស ម៉ាញ៉េស្យូម
ផូស្វ័រ វីតាមីន B3 ស័ង្កសី វីតាមីន B1 ប៉ូតាស្យូម និងវីតាមីន B2។ អ្វីដែលសំខាន់នោះ គឺវាមានផ្ទុកជាតិកាឡូរីដែលអាចបង្កហានិភ័យនៃបញ្ហាសុខភាពផ្សេងៗទាបបំផុត។
៣. ព្យាបាលអាការៈហើមពោះ
មានផ្ទុកសម្បូរទៅដោយជាតិម៉ាញ៉េស្យូម ប៉ូតាស្យូម និងជាតិសសៃ រួមទាំងវីតាមីន B6 ដែលជួយទប់ស្កាត់ដោះស្រាយបញ្ហាហើមពោះបានយ៉ាងប្រសើរ។
៤. បង្កើនការរំលាយអាហារ និងបន្សាបជាតិពុល
អាហារដែលមានផ្ទុកទៅដោយជាតិសសៃគ្រប់គ្រាន់ជួយទប់ស្កាត់បញ្ហាពិបាកក្នុងការរំលាយអាហារ ក៏ដូចជាអាការៈទល់លាមក រួមទាំងបង្កើនសុខភាពប្រព័ន្ធរំលាយអាហារបានយ៉ាងប្រសើរ។ ចលនាពោះវៀនត្រឹមត្រូវប្រក្រតី គឺសំខាន់ណាស់ដើម្បីកម្ចាត់ជាតិពុលផ្សេងៗចេញពីរាងកាយតាមរយៈការបន្ទោរបង់។
៥. កាត់បន្ថយហានិភ័យនៃជំងឺបេះដូង
គ្រាប់ជី មានផ្ទុកអាស៊ីតខ្លាញ់អូមេហ្គា ៣ ច្រើនជាងត្រីសាម៉ុនដល់ទៅ ៨ដងឯណោះ។ ហើយអាស៊ីតខ្លាញ់អូមេហ្គា ៣ មានប្រសិទ្ធិភាពខ្ពស់ជួយទប់ស្កាត់កាត់បន្ថយហានិភ័យនៃជំងឺសសៃឈាមបេះដូង។
៦. ជួយឱ្យស្រកទម្ងន់
គ្រាប់ជី ជាប្រភពដ៏ប្រសើរនៃជាតិសសៃ អាស៊ីតខ្លាញ់អូមេហ្គា ៣ និងអាស៊ីត alpha-linoleic ដែលមានប្រយោជន៍ជួយឱ្យស្រកទម្ងន់បានឆាប់រហ័ស។
៧. សុខភាពឆ្អឹងរឹងមាំ
ជាតិកាល់ស្យូមដែលមានផ្ទុកក្នុងគ្រាប់ជីជួយពង្រឹងសុខភាពឆ្អឹងបានយ៉ាងប្រសើរ។ កាល់ស្យូម គឺចាំបាច់ចំពោះសុខភាពឆ្អឹងដោយជួយរក្សាម៉ាស និងភាពរឹងមាំ។ គ្រាប់ជី ក៏ជាប្រភពនៃសារធាតុ boron ដែលសំខាន់សម្រាប់រក្សាសុខភាពឆ្អឹងល្អប្រសើរផងដែរ។ Boron ជួយក្នុងការរំលាយម៉ាញ៉េស្យូម, កាល់ស្យូម, ផូស្វ័រ និងម៉ង់កាណែសសម្រាប់ការលូតលាស់នៃសាច់ដុំ និងឆ្អឹងដែលមានសុខភាពល្អជៀសផុតពីជំងឺពុកឆ្អឹង។
៨. គ្រប់គ្រងជាតិស្ករក្នុងឈាម
ជាតិអន្ធិលនៃគ្រាប់ជីជួយពន្យឺតការរំលាយជាតិស្ករ ដោយបង្កើតរបាំងការពាររវាងជាតិកាបូអ៊ីដ្រាត និងអង់ស៊ីមរំលាយអាហារ។ ជាលទ្ធផលក្នុងការបញ្ចេញថាមពលប្រកបដោយស្ថេរភាពជំនួសការបញ្ចេញជាតិស្ករខ្ពស់ទៅក្នុងឈាមដែលល្អសម្រាប់អ្នកជំងឺទឹកនោមផ្អែម៕