Join with Health.com.kh on Telegram

ក្បាលជង្គង់ខ្មៅអាចជាបញ្ហាគួរអោយខ្មាសអៀនមួយ ប៉ុន្តែមិនពិបាកនឹងដោះស្រាយឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ធ្លាប់ដឹងទេថាអ្នកអាចកម្ចាត់ស្នាមខ្មៅត្រង់ក្បាលជង្គង់បានយ៉ាងឆាប់រហ័សដោយមិនចាំបាច់ត្រូវចំណាយប្រាក់អស់ច្រើនជាមួយរូបមន្តបែបធម្មជាតិងាយៗ? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធភាពខ្ពស់ក្នុងការបំបាត់ស្នាមខ្មៅត្រង់ជង្គង់ ៖

១. រមៀត

អ្វីដែលអ្នកត្រូវធ្វើ គឺគ្រាន់តែលាយម្ស៉ៅរមៀតជាមួយទឹកដោះគោស្រស់ ១ ស្លាបព្រាកាហ្វេរហូតក្លាយជាល្បាយខាប់ៗ។ លាបម៉ាស្សាល្បាយម្ស៉ៅរមៀតលើក្បាលជង្គង់សម្រាប់រយៈពេលប៉ុន្មាននាទី ហើយទុកចោលរហូតដល់ស្ងួតទាំងស្រុង សឹមលាងសម្អាតចេញជាមួយទឹកក្ដៅឧណ្ហៗជាការស្រេច។ អនុវត្តម្ដងក្នុងមួយថ្ងៃជាប្រចាំ។

២. ប្រទាលកន្ទុយក្រពើ

លាបជែល ឬសាច់ប្រទាលកន្ទុយក្រពើលើក្បាលជង្គង់ និងទុកចោលសម្រាប់រយៈពេលយ៉ាងហោចណាស់ ២០ នាទី សឹមលាងសម្អាតចេញជាមួយទឹកក្ដៅឧណ្ហៗជាការស្រេច។ ដើម្បីទទួលបានលទ្ធផលកាន់តែប្រសើរ ចូរអនុវត្តអោយបាន ២ ដងក្នុងមួយថ្ងៃជាប្រចាំ។

៣. ដំឡូងបារាំងនិងក្រូចឆ្មារ

អ្វីដែលអ្នកត្រូវធ្វើ គឺស្ងោរដំឡូងបារាំង ១ មើម បន្ទាប់មកកិនវាអោយម៉ដ្ឋ រួចបន្ថែមទឹកក្រូចឆ្មារស្រសប៉ុន្មានដំណក់ចូល។ កូរអោយសព្វ សឹមលាបល្បាយលើក្បាលជង្គង់។ ទុកចោលសម្រាប់រយៈពេលពី 
២០ ទៅ ៣០ នាទីសិន សឹមលាងសម្អាតចេញ។ អនុវត្ត ២ ដងក្នុងមួយសប្តាហ៍។

៤. ក្រូចឆ្មារនិងម្ស៉ៅ Baking soda

អ្វីដែលអ្នកត្រូវធ្វើ គឺគ្រាន់តែលាយម្ស៉ៅ baking soda ជាមួយទឹកក្រូចឆ្មារស្រស់អោយក្លាយជាល្បាយខាប់ៗ រួចលាបដុសលើក្បាលជង្គង់សម្រាប់រយៈពេលប៉ុន្មាននាទី។ លាងសម្អាតចេញជាមួយទឹកធម្មតាជាការស្រេច។ អនុវត្តអោយបាន ១ ឬ ២ ដងក្នុងមួយសប្តាហ៍។

៥. ទឹកឃ្មុំ

អ្វីដែលអ្នកត្រូវធ្វើ គឺលាយទឹកឃ្មុំ ២ ស្លាបព្រាបាយជាមួយទឹកក្រូចឆ្មារស្រស់ចំនួនម្ខាង និងម្ស៉ៅ 
baking soda ១ ស្លាបព្រាកាហ្វេ។ កូរអោយសព្វ រួចលាបល្បាយលើក្បាលជង្គង់ និងទុកចោលសម្រាប់រយៈពេលពី ២០ ទៅ ៣០ នាទី សឹមលាងសម្អាតចេញជាមួយទឹកក្ដៅឧណ្ហៗ៕