ស្ត្រីម្នាក់នៅប្រទេសឥណ្ឌា កំពុងប្រឈមការកាត់ទោសប្រហារជីវិត បន្ទាប់ពីមនុស្ស ៥ នាក់បាត់បង់ជីវិតគួរឱ្យរន្ធត់ដោយសារនាងដាក់ថ្នាំពុលចូលម្ហូបអាហារក្នុងពិធីឡើងផ្ទះ ក្នុងបំណងសម្លាប់ប្តីឯង និងសាច់ថ្លៃរបស់នាង។
ប៉ូលិសនិយាយថា ស្ត្រីជាជនល្មើសឈ្មោះ ប្រានីយ៉ា សួវ៉ាស (Pradnya Survase) អាយុ ២៣ ឆ្នាំត្រូវបានចាប់ខ្លួន បន្ទាប់ពីលាយថ្នាំសម្លាប់សត្វល្អិតចូលក្នុងអាហារសម្រាប់ភ្ញៀវ ក្នុងពិធីជប់ ឡើងផ្ទះមួយ ដែលមានមនុស្សចូលរួមចំនួន ១២០ នាក់កាលពីថ្ងៃទី១៨ ខែមិថុនា។
ជាអកុសល ភ្ញៀវសរុប ៥ នាក់រួមមានបុរសម្នាក់អាយុ ៥៣ ឆ្នាំ និងក្មេង ៤នាក់ដែលមានអាយុ ចន្លោះពី ៧ ឆ្នាំដល់ ១៣ ឆ្នាំបានស្លាប់បន្ទាប់ពីបរិភោគអាហារពុលក្នុងពិធីឡើងផ្ទះនៅភូមិម៉ាហាដ (Mahad) ស្រុករ៉ៃហ្គាដ (Raigad) រដ្ឋម៉ាហារ៉ាស្ត្រា (Maharashtra) ប្រទេសឥណ្ឌា។
កាសែត Hindustan Times បានចុះផ្សាយថា នាងបានសារភាពថា តាមពិតនាងមានបំណង សម្លាប់ប្តីរបស់នាង ម្តាយក្មេករបស់នាង ប្អូនថ្លៃស្រី ២ នាក់របស់នាង ព្រមទាំងប្អូនស្រីរបស់ ម្តាយក្មេកនាងផងដែរ ដែលតែងតែស្តីបន្ទោស និងបន្តុះបង្អាប់ថានាងធ្វើម្ហូបបរិភោគមិនកើត។ ជាសំណាងល្អ ពួកគេបានបរិភោគ មុនពេលនាងលាយថ្នាំពុលចូលក្នុងម្ហូបអាហារកុំអីពួកគេច្បាស់ ជាត្រូវស្លាប់ទាំងអស់។
ការធ្វើកោសល្យវិច័យលើសំណាកអាហារ សម្រាប់ភ្ញៀវក្នុងពិធីឡើងផ្ទះខាងលើបានបង្ហាញថា មានថ្នាំសម្លាប់សត្វល្អិតនៅក្នុងនោះ ហើយក៏បានរកឃើញដានថ្នាំពុលនៅក្បែរផ្ទះរបស់សាច់ញាតិ នាងផងដែរ៕
ប្រភព៖ rasmeinews.com