ប្រព័ន្ធភាពស៊ាំរាងកាយរឹងមាំ គឺចាំបាច់ណាស់ដើម្បីរក្សាបាននូវសុខភាពល្អប្រសើរចៀសផុតពីជំងឺផ្សេងៗ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ភាគច្រើននៃពួកយើងសុទ្ធតែបានដឹងហើយថា ការទទួលទានបន្លែអាចផ្ដល់អត្ថប្រយោជន៍ប្រសើរយ៉ាងណាចំពោះសុខភាព។ អ្វីដែលសំខាន់នោះ គឺបន្លែមួយចំនួនដូចខាងក្រោមមិនត្រឹមតែជួយពង្រឹងប្រព័ន្ធភាពស៊ាំនៃរាងកាយចៀសផុតពីបញ្ហាឆ្លងមេរោគប៉ុណ្ណោះទេ ប៉ុន្តែក៏អាចជួយកាត់បន្ថយហានិភ័យនៃជំងឺមួយចំនួនដូចជា មហារីក និងជំងឺបេះដូងផងដែរ។ ថាតើបន្លែទាំងនោះមានអ្វីខ្លះទៅ? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីបន្លែដែលមានប្រយោជន៍ជួយពង្រឹងប្រព័ន្ធភាពស៊ាំនៃរាងកាយ ៖

១. ស្ពៃក្ដោប

ជាប្រភពដ៏ប្រសើរនៃវីតាមីន C ដែលជាសារធាតុចិញ្ចឹមមួយជួយធ្វើឲ្យប្រព័ន្ធភាពស៊ាំមានលក្ខណៈកាន់តែប្រសើរឡើង។

២. ផ្សិត

មានប្រសិទ្ធិភាពបង្កើនសកម្មភាពកោសិកា NTKs។ NTKs ជាកោសិកាដែលជួយកម្ចាត់និងវាយប្រហារលើកោសិកាណាដែលឆ្លងមេរោគដោយពពួកវីវុស។ ការបង្កើនសកម្មភាពនៃកោសិកានេះក៏ជួយពន្យឺតការវិវត្តន៍នៃជំងឺមហារីក ឬការលូតលាស់នៃដុំសាច់មហារីក ទប់ស្កាត់ការបំផ្លាញ DNA និងដុំសាច់ពីការទទួលបានការផ្គត់ផ្គង់ឈាម។

៣. ទឹកដូង

អ្នកអាចជៀសផុតពីជំងឺដោយគ្រាន់តែទទួលទានទឹកដូងជាប្រចាំ។ នោះក៏ព្រោះតែទឹកដូងជួយពង្រឹងប្រព័ន្ធភាពស៊ាំនៃរាងកាយបានយ៉ាងប្រសើរដោយវាមានផ្ទុកសម្បូរទៅដោយអាស៊ីត lauric ដែល
ជួយប្រយុទ្ធប្រឆាំងបាក់តេរីនិងពពួកវីរុស។ វាមានប្រសិទ្ធិភាពកម្ចាត់រាល់បាក់តេរីមិនល្អក្នុងរាងកាយដែលបង្កជំងឺអញ្ចាញនិងមេរោគឆ្លងក្នុងផ្លូវទឹកនោម។ ទឹកដូងក៏ជួយទប់ស្កាត់វីរុសដែលបង្កជំងឺផ្ដាសាយ និងមេរោគឆ្លងផ្សេងៗផងដែរ។

៤. ទំពាំងបារាំង

បន្លែនេះមានសមត្ថភាពពិសេសម្យ៉ាងជួយរាងកាយក្នុងការបញ្ចេញ និងកម្ចាត់ចោលនូវជាតិពុលផ្សេងៗ។ វាមានផ្ទុកនូវសារធាតុ glutathione ដែលជាសារធាតុប្រឆាំងអុកស៊ីតកម្មម្យ៉ាងជួយក្នុងការកាត់បន្ថយហានិភ័យនៃជំងឺមហារីក និងជំងឺបេះដូង។ លើសពីនេះទៅទៀត ទំពាំងបារាំង ក៏ជួយសម្អាតក្នុងរាងកាយ ហើយប្រឆាំងនឹងការរលាកផងដែរដូចជាជំងឺរលាកពោះវៀន រួមទាំងជំងឺរលាកសន្លាក់។

៥. ខ្ញី

ខ្ញីជាប្រភពដ៏ប្រសើរនៃសារធាតុប្រឆាំងមេរោគបាក់តេរីដែលជួយប្រយុទ្ធប្រឆាំងនឹងរាល់បាក់តេរីបង្កគ្រោះថ្នាក់។ ប្រសិនបើអ្នកទទួលទានខ្ញីរាល់ថ្ងៃ អ្នកនឹងមិនងាយកើតជំងឺផ្ដាសាយឡើយ។ ខ្ញីក៏មានផ្ទុកសារធាតុប្រឆាំងអុកស៊ីតកម្ម និងលក្ខណៈសម្បត្តិប្រឆាំងការរលាកដែលជួយកម្ចាត់ការរលាកផ្សេងៗក្នុងប្រព័ន្ធប្រសាទនៃប្រព័ន្ធភាពស៊ាំ រួមបញ្ចូលទាំងសមាសធាតុសកម្មបំផុតហៅថា gingerols ជួយកាត់បន្ថយហានិភ័យនៃការឆ្លងមេរោគ។

៦. ការ៉ុត

ជាបន្លែដ៏ប្រសើរជួយក្នុងការទប់ស្កាត់ជំងឺផ្ដាសាយធំ និងគ្រុនផ្ដាសាយ។ វាមានផ្ទុកសម្បូរទៅដោយសារធាតុ beta-carotene ដែលជួយពង្រឹងប្រព័ន្ធភាពស៊ាំ។ អ្នកនឹងទទួលបានលទ្ធផលកាន់តែប្រសើរ ប្រសិនបើឧស្សាហ៍ទទួលទានការ៉ុតឆៅ។

៧. ខ្ទឹមស

មានផ្ទុកនូវធាតុផ្សំសកម្មមួយហៅថា allicin ដែលជួយរក្សាសុវត្ថិភាពកោសិកាពីការបំផ្លាញដោយសារជំងឺរ៉ាំរ៉ៃណាមួយ។ ខ្ទឹមសក៏ត្រូវបានគេចាត់ទុកថាជាថ្នាំសម្លាប់មេរោគធម្មជាតិប្រយុទ្ធប្រឆាំងនឹងមេរោគឆ្លង ទប់ស្កាត់ជំងឺមហារីក និងផ្ដាសាយ។

៨. ប៉េងប៉ោះ

ជាប្រភពដ៏ប្រសើរនៃសារធាតុប្រឆាំងអុកស៊ីតកម្ម lycopene ជួយទប់ស្កាត់ជំងឺមហារីក។ វាក៏មានផ្ទុកសារធាតុ beta carotene កម្រិតខ្ពស់ដែលជួយរក្សាពង្រឹងប្រព័ន្ធភាពស៊ាំនៃរាងកាយផងដែរ៕