គ្រូពេទ្យបាននិយាយថា មានមនុស្សប្រហែល ៥លាននាក់ជុំវិញពិភពលោកបានស្លាប់ដោយសារតែជំងឺដាច់សរសៃឈាមខួរក្បាលជារៀងរាល់ឆ្នាំ។ ជំងឺដាច់សរសៃឈាមខួរក្បាលអាចកើតឡើងលើមនុស្សគ្រប់គ្នា ហើយក៏ងាយនឹងបង្កឲ្យមានផលវិបាកបែបពិការភាពដែរទោះបីជាមិនស្លាប់ក៏ដោយ។ ប៉ុន្តែកុំបារម្ភអី ដោយសារតែជំងឺនេះអាចបង្ការបាន ហើយការផ្លាស់ប្តូររបបអាហារឲ្យល្អឡើងវិញគឺអាចបន្ថយការប្រឈមមុខបានហើយ។
ជាមូលដ្ឋានដើម្បីបន្ថយការប្រឈមមុខជំងឺនេះបានទាល់តែ អ្នកអាចបញ្ចុះសម្ពាធឈាមដែលកំពុងតែខ្ពស់មកធម្មតា និងខ្លាញ់អាក្រក់ដែលខ្ពស់ក្នុងឈាមមកធម្មតាសិន តាមរយៈការជ្រើសរើសអាហារដែលត្រឹមត្រូវ បូករួមជាមួយនឹងការហាត់ប្រាណទៀងទាត់ ព្រមទាំងឈប់ជក់បារី បន្ថយស្រ្តេស និងញ៉ាំគ្រឿងស្រវឹងក្នុងកម្រិតមធ្យម។ ចូរប្រាកដថា អ្នកបានញ៉ាំអាហារខាងក្រោមនេះជាទៀងទាត់ផងដើម្បីបន្ថយការប្រឈមមុខ៖
ផ្លែឈើជូរៗ
ផ្លែឈើប្រភេទនេះផ្ទុកទៅដោយអង់ទីអុកស៊ីដង់ ដែលវាជាមូលដ្ឋានគ្រឹះមួយសម្រាប់របបអាហារជួយដល់សុខភាព និងបន្ថយការប្រឈមនឹងជំងឺដាច់សរសៃឈាមខួរក្បាល។ ផ្លែឈើជូរៗគឺជាប្រភេទទឹកផ្លែឈើដ៏ពេញនិយមមួយដែលអ្នកគួរតែធ្វើដោយខ្លួនឯងដើម្បីទទួលទានទើបជារឿងល្អ។
ដំឡូងជ្វា
ដំឡូងជ្វាផ្ទុកទៅដោយជាតិសរសៃដែលអាចបន្ថយទាំងកូឡេស្តេរ៉ុលអាក្រក់ និងសម្ពាធឈាម។ លើសពីនេះទៅទៀត ដំឡូងជ្វាអាចជួយផ្គត់ផ្គង់ជាតិប៉ូតាស្យូម ដែលជាសារធាតុជួយបញ្ចុះសម្ពាធឈាមបានយ៉ាងល្អ។ ប៉ូតាស្យូមក៏ធ្វើការកាន់តែល្អដែរតាមរយៈជួយឲ្យសរសៃឈាមធូរ និងរីកធំ។
គ្រាប់ធញ្ញជាតិ
អ្នកជំនាញជាច្រើនបានណែនាំថា មនុស្សយើងគួរតែញ៉ាំគ្រាប់ធញ្ញជាតិមួយក្តាប់ដៃជាទៀងទាត់។ មានហេតុផលពីយ៉ាងដែលវាគឺជារឿងដ៏ឡូយមួយក្នុងការបន្ថយការប្រឈមនឹងជំងឺដាច់សរសៃឈាមខួរក្បាល។ ដំបូងឡើយ វាជាប្រភពនៃជាតិសរសៃដ៏ល្អ។ ទីពីរ វាមានអាស៊ីតខ្លាញ់អូមេហ្គាបីដែលជួយបញ្ចុះកូឡេស្តេរ៉ុលអាក្រក់បាន។
ត្រី
បើយើងនិយាយដល់អាស៊ីតខ្លាញ់អូមេហ្គាបី វាគឺជាគំនិតដ៏អស្ចារ្យមួយក្នុងការញ៉ាំត្រីជាទៀងទាត់ដោយសារតែវាផ្ទុកទោដោយជីវជាតិដ៏មានប្រយោជន៍ជាច្រើន។ ត្រីសម្បូរខ្លាញ់មួយចំនួនគួរតែញ៉ាំឲ្យបានច្រើនដូចជា ត្រីសាលម៉ុង ឬសាឌីន។
ខ្ទឹមស
បើសិនជាអ្នកមិនប្រកាន់ទៅលើម្ហូបទេ យកល្អគួរតែបន្ថែមខ្ទឹមសទៅក្នុងអាហារផងទៅ។ ការសិក្សាជាច្រើនបានអះអាងថា ខ្ទឹមសមានសមត្ថភាពដ៏អស្ចារ្យក្នុងការរំលាយកំណកឈាម និងបង្ការការកើតជាកំណកឈាម ដែលនាំឲ្យកើតជំងឺស្ទះសរសៃឈាមខួរក្បាលបាន។
សូកូឡាខ្មៅ
ការដែលញ៉ាំសូកូឡាខ្មៅជាអាហារសម្រន អាចបន្ថយការប្រឈមនឹងជំងឺដាច់សរសៃឈាមខួរក្បាលបានយ៉ាងគួរឲ្យកត់សម្គាល់។ ប៉ុន្តែអ្នកត្រូវប្រាកដថា ជ្រើសរើសសូកូឡាដែលខ្មៅៗ មានន័យថា វាផ្ទុកទៅដោយសារធាតុកូកូអាយ៉ាងហោចណាស់ ៧០ភាគរយ។ ជាមួយគ្នានេះដែរ ដោយសារតែសូកូឡាខ្មៅត្រូវបានអះអាងថាជួយបង្ការជំងឺដាច់សរសៃឈាមខួរក្បាល មិនមែនមានន័យថា អ្នកត្រូវញ៉ាំវាច្រើនយកតែមែនទែននោះទេ តែគួរញ៉ាំមិនឲ្យច្រើនជាង ១០០ក្រាមក្នុងមួយថ្ងៃទេ៕