យើងទាំងអស់គ្នាសុទ្ធតែដឹងហើយថា ការជក់បារី និងការញ៉ាំអាហារប្រៃៗច្រើនតែធ្វើឲ្យលើសសម្ពាធឈាមបាន។ ប៉ុន្តែតើអ្នកមានដឹងទេថា មានរឿងជាច្រើនផ្សេងទៀតដែលអាចធ្វើឲ្យលើសសម្ពាធឈាមដែរ។ ខាងក្រោមនេះគឺជារឿងគួរឲ្យភ្ញាក់ផ្អើលមួយចំនួន ដែលធ្វើឲ្យសម្ពាធឈាមឡើងខ្ពស់បាន៖
ចូលចិត្តញ៉ាំផ្អែម
ការញ៉ាំរបស់ផ្អែមៗច្រើនមិនត្រឹមតែមិនល្អចំពោះធ្មេញទេ តែក៏ប៉ះពាល់ដល់សម្ពាធឈាមដែរ។ នេះដោយសារតែ ជាតិផ្អែមកៃឆ្នៃនេះអាចជំរុញដល់ការរលាកក្នុងខ្លួន។ អ្នកជំនាញនិយាយថា ការរលាកនេះអាចធ្វើឲ្យមានបញ្ហាសុខភាពធ្ងន់ធ្ងរជាច្រើន ហើយការលើសសម្ពាធឈាមក៏ជាផ្នែគមួយរបស់វាដែរ។
ញ៉ាំគ្រឿងស្រវឹងច្រើនៗ
ខណៈពេលដែលវាជាការពិតមួយថា គ្រឿងស្រវឹងអាចជំរុញដល់សុខភាពនៅពេលញ៉ាំក្នុងកម្រិតមធ្យម តែការញ៉ាំច្រើនពេកអាចបង្កជារឿងផ្ទុយគ្នាវិញ។ រឿងមួយក្នុងចំណោមរឿងជាច្រើនដែលអាចកើតចេញពីការញ៉ាំគ្រឿងស្រវឹងច្រើនៗគឺ លើសសម្ពាធឈាមតែម្តង។
គេងបាត់ដង្ហើម
បើសិនជាអ្នកភ្ញាក់ពីគេងមកមិនមានអារម្មណ៍ស្រស់ស្រាយ ព្រមទាំងស្រមុកលឺៗទៀតនោះ មានន័យថាអ្នកកំពុងតែមានបញ្ហាគេងបាត់ដង្ហើមហើយ ដែលវាអាចនឹងធ្វើឲ្យលើសសម្ពាធឈាមបាន។ បញ្ហានៃការគេងនេះមិនអាចធ្វើឲ្យអ្នកទទួលបានគុណភាពនៃការគេងឡើយទោះបីជាអ្នកគេងលក់ក៏ដោយ។
ស្រ្តេសគ្រប់ពេល
អ្នកជំនាញនិយាយថា ស្រ្តេសរ៉ាំរ៉ៃគឺជារឿងដែលត្រូវការគ្រប់គ្រងឲ្យបាន ព្រោះវាអាចធ្វើឲ្យសម្ពាធឈាមឡើងខ្ពស់ និងបង្កបញ្ហាដល់សុខភាពច្រើនផង។ ចូរព្យាយាមចៀសវាងមូលហេតុនាំឲ្យស្រ្តេសឲ្យបានច្រើនតាមតែអាចធ្វើទៅបាន។
នៅក្នុងបន្ទប់សូណា និងងូតទឹកក្តៅ
និយាយដល់អ្នកស្រ្តេសវិញ មនុស្សភាគច្រើនប្រើប្រាស់ការនៅក្នុងបន្ទប់សូណា និងងូតទឹកក្តៅដើម្បីរំងាប់អារម្មណ៍ស្រ្តេស។ ប៉ុន្តែបើសិនជាអ្នកលើសសម្ពាធឈាម អ្នកគួរតែស្វែងរកវិធីសាស្រ្តបន្ធូរអារម្មណ៍ផ្សេងវិញ ព្រោះថា វិធីទាំងពីរនេះអាចធ្វើឲ្យសម្ពាធឈាមឡើងខ្ពស់បាន។ ដើម្បីសុវត្ថិភាព គួរតែពិគ្រោះជាមួយគ្រូពេទ្យជានិច្ច៕