តារារ៉េបដ៏ល្បី Cardi B បានបរិច្ចាគថវិកាចំនួន ៨០០០ ដុល្លារ ជាការរំលែកទុក្ខដល់ក្រុមគ្រួសារនៃក្មេងប្រុសម្នាក់ដែលត្រូវបានឃាតកជាច្រើននាក់កាប់ និងចាក់សម្លាប់យ៉ាងឃោរឃៅ ក្រោយជនទាំងនោះយល់ច្រឡំក្មេងប្រុសរូបនោះទៅនឹងបុរសម្នាក់ទៀតនៅក្នុងវីដេអូសិចតាមអនឡាញ។
ក្រោយរឿងរ៉ាវ និងវីដេអូនៃការចាក់សម្លាប់យ៉ាងឃោរឃៅរបស់ក្មេងប្រុសវ័យ ១៥ឆ្នាំរូបនោះ ត្រូវបានចែកចាយពាសពេញបណ្ដាញសង្គមនោះ តារារ៉េប Cardi B បានបរិច្ចាគថវិការបស់នាងចំនួន ៨០០០ ដុល្លារភ្លាមទៅកាន់គណនីរបស់ក្មេងប្រុសនោះក្នុងវិបសាយសប្បុរសធម៌ GoFundMe។
ជាមួយនឹងការបរិច្ចាគនេះដែរ តារាចម្រៀងស្រីរូបនេះបានចែកចាយវីដេអូរបស់ម្ដាយជនរងគ្រោះ ដែលមានថ្លែងអំណរគុណជាភាសាអេស្ប៉ាញទៅកាន់គ្រប់គ្នា រួមនឹងនាងផ្ទាល់ផងដែរ។ ជាការឆ្លើយតបនឹងការថ្លែងអំណរគុណនេះ តារារ៉េប Cardi B បានសរសេរថា៖
“លោកស្រី ខ្ញុំដឹងថាអ្នកកំពុងតែទទួលការឈឺចាប់ និងទុក្ខក្រៀមក្រំជាខ្លាំង។ ប្រហែលអ្នកកំពុងយំ និងភ្ញាក់ឡើងដោយគិតថាវាគ្រាន់តែជាសុបិនអាក្រក់តែប៉ុណ្ណោះ។ ឆាប់ៗខាងមុខនេះ អ្នកនឹងមានអារម្មណ៍ថាខ្លួននឹងមានអ្នកតាមថែរក្សាការពារជាងមុន ព្រោះថាកូនដែលបានស្លាប់ទៅនោះនឹងនៅក្បែរអ្នក និងមានអារម្មណ៍ដូចពួក IS កំពុងនៅជាមួយអ្នកដែរ។ សូមឲ្យគ្រួសាររបស់លោកស្រីទទួលបានសុខសន្តិភាពនៅថ្ងៃមុខឆាប់ៗ និងសូមឲ្យព្រះជួយនាំកូនរបស់អ្នកឲ្យទៅដល់ទីស្ងប់សុខ”។
គួររម្លឹកដែរថា ឃាតកម្មដ៏សាហាវឃោរឃៅនោះបានកើតឡើង កាលពីថ្ងៃពុធ វេលាម៉ោង ១១ និង ៤០នាទី ខណៈក្មេងប្រុសដែលជាជនរងគ្រោះត្រូវបានក្រុមក្មេងទំនើងមួយក្រុមចាប់អូសទាញចេញពីហាងទំនិញមួយកន្លែង និងធ្វើសកម្មភាពចាក់ និងកាប់ជាច្រើនកាំបិតបណ្ដាលឲ្យរងរបួសធ្ងន់។ ទីបំផុតគេក៏ស្លាប់បាត់បង់ជីវិតក្រោយពេលបញ្ជូនទៅដល់មន្ទីរពេទ្យ។ ក្រោយមក មេក្រុមក្មេងទំនើងមួយក្រុមនោះ បានចេញមុខសុំទោសលើកម្មវិធី Snapchat ដោយនិយាយថា ពួកគេបានច្រឡំមនុស្ស និងបានចូលរួមរំលែកទុក្ខដល់ក្រុមគ្រួសារសពថែមទៀតផង៕
ប្រភព៖ sabay.com.kh