ផុតភាគខាងត្បូងនៃទីក្រុងម៉ិកស៊ីកូតែបន្តិច គឺស្ថិតនៅចន្លោះព្រែកសូជីមីកូ (Xochimico) អ្នកអាចឃើញកោះតូចមួយ ដែលមានប្រវត្តិដ៏សោកសៅ និងមិនដែលនឹកស្មានថានឹងក្លាយជាទិសដៅទេសចរណ៍នោះទេ។ កោះនេះត្រូវបានគេស្គាល់ថា Isla de las Munecas (កោះតុក្កតា) ។
កោះនេះត្រូវបានឧទ្ទិសដល់ព្រលឹងក្មេងស្រីដ៏កម្សត់ម្នាក់ ដែលស្លាប់ទាំងវ័យក្មេងក្នុងស្ថានភាពដ៏ចម្លែក។
តំបន់នេះមានមនុស្សរស់នៅរាប់ពាន់នាក់ ប៉ុន្តែកោះតូចនេះគឺជាលំនៅដ្ឋានរបស់តុក្កតាគួរឱ្យខ្លាចរាប់រយ។ អវយវៈដាច់ដោច ក្បាលតុក្កតា និង ភ្នែកលៀនៗរបស់តុក្កតាទាំងអស់នេះត្រូវបានលម្អលើដើមឈើ។
តុក្កតាទាំងអស់នេះមើលទៅគួរឱ្យខ្លាចណាស់ សូម្បីនៅកណ្តាលថ្ងៃចែសក៏ខ្លាចដែរ ក៏ប៉ុន្តែនៅពេលមេឃងងឹតវិញ គឺមិនបាច់ថ្លែងនោះឡើយ។
គេបាននិយាយថាក្មេងស្រីនោះត្រូវគេប្រទះឃើញលង់ទឹកស្លាប់ក្នុងស្ថានភាពអាថ៌កំបាំងជាច្រើនឆ្នាំមកហើយ នៅលើកោះនេះ ហើយថាតុក្កតាទាំងនោះត្រូវបានវិញ្ញាណក្មេងស្រីនេះសណ្ឋិត។
រឿងព្រេងក្នុងស្រុកនិយាយថា កូនក្រមុំតុក្កតាចេះងាកក្បាលនិងកម្រើកដៃរបស់ពួកគេ ហើយថែមទាំងចេះបើកភ្នែកទៀតផង។
សាក្សីខ្លះអះអាងថាពួកគេបានឮសំឡេងតុក្កតាខ្សឹបគ្នា ខណៈអ្នកខ្លះទៀតដែលជិះលើទូកក្បែរកោះនេះ បាននិយាយថា តុក្កតាទាំងនោះបានអន្ទងចិត្តពួកគេឱ្យចុះទៅកោះនេះ។
ជាការពិតណាស់ សាក្សីទាំងនេះគឺនិយាយបំផ្លើសសុទ្ធសាធ ហើយកោះនេះគ្មានព្រលឹងខ្មោចសណ្ឋិតអីនោះទេ ប៉ុន្តែការពិតគឺថាកោះ Isla de las Munecas គឺជាកន្លែងដែលគួរឱ្យខ្លាច ដូច្នេះហើយទើបក្លាយជាកន្លែងទាក់ទាញទេសចរណ៍នៅម៉ិកស៊ិក៕
ប្រភព៖ rasmeinews.com