ផ្កាខាត់ណា ជាបន្លែមួយប្រភេទដែលមានរសជាតិឆ្ងាញ់អាចយកមកធ្វើម្ហូបបានច្រើនមុខហើយសម្បូរណាស់ក្នុងប្រទេសកម្ពុជា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះបីជាភាគច្រើននៃពួកយើងសុទ្ធតែស្គាល់និងឧស្សាហ៍ទទួលទានបន្លែនេះ ប៉ុន្តែប្រហែលមិនធ្លាប់ចាប់អារម្មណ៍អំពីអត្ថប្រយោជន៍របស់វាចំពោះសុខភាពឡើយ! ថាតើការទទួលទានផ្កាខាត់ណាអាចផ្ដលផលល្អៗយ៉ាងណាខ្លះទៅ? ថ្ងៃនេះវេបសាយសុខភាព Health.com.kh នឹងបង្ហាញឲ្យដឹងពីឥទ្ធិពលវិជ្ជមានគួរឱ្យភ្ញាក់ផ្អើលនៃការទទួលទានផ្កាខាត់ណាចំពោះសុខភាពទប់ស្កាត់ជំងឺផ្សេងៗ ៖
១. បង្កើនសុខភាពប្រព័ន្ធរំលាយអាហារ
នោះក៏ព្រោះតែផ្កាខាត់ណាមានផ្ទុកសម្បូរទៅដោយជាតិសសៃដែលគាំទ្រដល់មុខងារប្រព័ន្ធរំលាយអាហារបានយ៉ាងប្រសើរ។ លើសពីនេះទៅទៀត ផ្កាខាត់ណាក៏ជាប្រភពដ៏ល្អបំផុតមួយនៃសារធាតុ
glucoraphanin ដែលមានប្រសិទ្ធិភាពជួយការពារស្រទាប់ក្រពះពីបញ្ហាផ្សេងៗ រួមបញ្ចូលទាំងការរលាកនិងដំបៅក្រពះផងដែរ។
២. បញ្ចុះសម្ពាធឈាម
លក្ខណៈសម្បត្តិប្រឆាំងអុកស៊ីតកម្មនិងប្រឆាំងការរលាកនៃសារធាតុ glucoraphanin និង
sulforaphane នៅក្នុងផ្កាខាត់ណាជួយកាត់បន្ថយភាពតានតឹងដោយសារអុកស៊ីតកម្ម ព្រមទាំងកម្រិតនៃកូឡេស្តេរ៉ូលមិនល្អ។ វាក៏ជួយបង្កើនកម្រិតនៃកូឡេស្តេរ៉ូលល្អនិងបញ្ចុះសម្ពាធឈាមផងដែរ។លើសពីនេះទៅទៀត ជាតិសសៃនិងអាស៊ីតខ្លាញ់អូមេហ្គា ៣ ក្នុងផ្កាខាត់ណាក៏អាចទប់ស្កាត់បញ្ហាឡើងរឹងនៃសសៃឈាមគួរអោយកត់សម្គាល់។
៣. ទប់ស្កាត់ជំងឺមហារីក
ផ្កាខាត់ណាមានផ្ទុកសម្បូរទៅដោយសារធាតុ sulforaphane ដែលជួយប្រយុទ្ធប្រឆាំងកោសិកាមហារីក ព្រមទាំងពន្យឺតនិងរារាំងការរីកលូតលាស់ដុំសាច់។ លើសពីនេះទៅទៀត ផ្កាខាត់ណាក៏ជាប្រភពនៃសារធាតុដែលជួយកាត់បន្ថយអ័រម៉ូន estrogens ហើយជាធម្មតាអ័រម៉ូននេះនឹងបង្កជាជំងឺមហារីកក្នុងរាងកាយនៅពេលកើនច្រើនលើស។ យោងតាមការសិក្សាស្រាវជ្រាវជាច្រើនបានបង្ហាញ
ថា ផ្កាខាត់ណា គឺជាជម្រើសនៃអាហារដ៏សាកសមបំផុតសម្រាប់ទប់ស្កាត់ជំងឺមហារីកសុដន់ មហារីកក្រពេញប្រូស្តាត និងមហារីកស្បូន។
៤. សុខភាពឆ្អឹង
ផ្កាខាត់ណាមានផ្ទុកវីតាមីន C ដែលដើរតួយ៉ាងសំខាន់ក្នុងការផលិតកូឡាជែនជួយការពារសន្លាក់និងឆ្អឹងពីការរលាក។ លើសពីនេះទៅទៀត វាក៏ជាប្រភពនៃវិតាមីន K ដែលដើរតួនាទីជួយក្នុងការទប់ស្កាត់បញ្ហាបាត់បង់ម៉ាសនៃឆ្អឹងចំពោះទាំងបុរសនិងស្ត្រី។
៥. ពង្រឹងសុខភាពបេះដូង
លក្ខណៈសម្បត្តិប្រឆាំងការរលាកនៃសារធាតុ sulforaphane ក្នុងផ្កាខាត់ណាអាចជួយទប់ស្កាត់ការខូចខាតនៃសសៃឈាមដែលបង្កមកពីការរលាកដោយសារតែបញ្ហាជាតិស្ករក្នុងឈាមរ៉ាំរ៉ៃ។ ផ្កាខាត់ណា គឺប្រសើរបំផុតសម្រាប់សុខភាពបេះដូងរឹងមាំជៀសផុតពីបញ្ហាផ្សេងៗ រួមទាំងជំងឹសសៃ
ឈាមបេះដូង ខណៈដែលវាមានផ្ទុកសម្បូរទៅដោយជាតិសសៃអាស៊ីតខ្លាញ់ល្អនិងវីតាមីនជួយគ្រប់គ្រងសម្ពាធឈាមក្នុងរាងកាយ ព្រមទាំងកាត់បន្ថយកម្រិតកូឡេស្តេរ៉ូលមិនល្អ។
៦. បន្សាបជាតិពុលក្នុងរាងកាយ
ផ្កាខាត់ណា ជាប្រភពដ៏សម្បូរបែបនៃជាតិសសៃដែលជួយកម្ចាត់ជាតិពុលចេញពីរាងកាយតាមរយៈបំពង់រំលាយអាហារ។ ផ្កាខាត់ណាក៏មានផ្ទុកសម្បូរទៅដោយសារធាតុប្រឆាំងអុកស៊ីតកម្ម ជាពិសេស phytonutrients ដែលជួយក្នុងដំណើរការបន្សាបជាតិពុលនៃរាងកាយឲ្យកាន់តែមានលក្ខណៈសកម្មប្រសើរឡើងគួរអោយកត់សម្គាល់។ លើសពីនេះទៅទៀត សារធាតុ thiocyanates និង glucosinolates នៃផ្កាខាត់ណាក៏ជួយបង្កើនសមត្ថភាពមុខងាររបស់ថ្លើមក្នុងការបន្សាបសារធាតុពុលផ្សេងៗដែលបង្កជំងឺមហារីកចេញពីរាងកាយផងដែរ។
៧. កាត់បន្ថយប្រតិកម្មអាឡែកស៊ី និងការរលាកក្នុងរាងកាយ
ផ្កាខាត់ណា មានផ្ទុកសម្បូរទៅដោយអាស៊ីតខ្លាញ់អូមេហ្គា ៣ ជួយប្រយុទ្ធប្រឆាំងនឹងការរលាកផ្សេងៗក្នុងរាងកាយ។ បន្លែនេះជាជម្រើសនៃអាហារដ៏ប្រសើរសម្រាប់អ្នកជំងឺរលាកសន្លាក់ ក៏ព្រោះវាមានផ្ទុកសារធាតុ sulforaphane ជួយទប់ស្កាត់អង់ស៊ីមដែលបង្កការរលាកដល់សន្លាក់។ ក្រៅជំងឺរលាកសន្លាក់ហើយនោះ លក្ខណៈសម្បត្តិប្រឆាំងការរលាកនៃផ្កាខាត់ណាក៏ទប់ស្កាត់កាត់បន្ថយហានិភ័យនៃជំងឺផ្សេងៗដែលបង្កឡើងដោយសារការរលាកក្នុងរាងកាយ ដូចជាជំងឺធាត់ជ្រុល និងជំងឺទឹកនោមផ្អែមផងដែរ។ លើសពីនេះទៅទៀត ផ្កាខាត់ណាក៏ជាប្រភពនៃសារធាតុ kaempferol ដែលជួយកាត់បន្ថយផលប៉ះពាល់បណ្ដាលមកពីប្រតិកម្មអាឡែកស៊ីគួរអោយកត់សម្គាល់។
៨. សុខភាពខួរក្បាល
ផ្កាខាត់ណា ជាប្រភពដ៏ប្រសើរនៃសារធាតុ choline ដែលដើរតួនាទីយ៉ាងសំខាន់បំផុតមួយក្នុងការអភិវឌ្ឍខួរក្បាល និងរក្សាការចងចាំ។ ការទទួលទានផ្កាខាត់ណាអាចសូម្បីតែទប់ស្កាត់បញ្ហាថយចុះការចងចាំទាក់ទងនឹងអាយុទៀតផង៕