បញ្ហាប្រហែលជាកើតមានក្នុងរបបអាហារអ្នកបើសិនជាអ្នកយល់ថាខួរក្បាលដូចជាមិនសូវធ្វើការល្អ។ វាអាចដោយសារតែអ្នកមិនទទួលបានវីតាមីនគ្រប់គ្រាន់សម្រាប់បំប៉នខួរក្បាល និងជីវជាតិគ្រប់គ្រាន់ពីរបបអាហារាល់ថ្ងៃ។ អ្នកអាចផ្លាស់ប្តូរ របបអាហារ និងញ៉ាំវីតាមីនឱ្យបានច្រើនវិញ ជាពិសេសវីតាមីនណាដែលមានប្រយោជន៍ចំពោះខួរក្បាលតែម្តង។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ខាងក្រោមនេះគឺជាវីតាមីនបួនប្រភេទដែលអាចជួយបង្កើនភាពវ័យឆ្លាតទូទៅ ការចងចាំរយៈពេលខ្លី និងពង្រឹងដល់ថាមពលខួរក្បាល។
វីតាមីន E
នេះគឺជាអង់ទីអុកស៊ីដង់មួយដែលអាចការពារកោសិការសរសៃប្រសាទពីការខូចខាតធ្ងន់ធ្ងរ និងការពារខួរក្បាលដែរ។ របបអាហារដែលផ្គត់ផ្គង់វីតាមីន E នឹងជួយពន្យាពេលការកើតជំងឺភ្លេចភ្លាំងពេលចាស់ជរា (Alzheimer’s Disease)។ ការប្រើប្រាស់អង់ទីអុកស៊ីដង់មួយដើម្បីការពារខួរក្បាលអាចបង្ការកុំឱ្យមានជំងឺផ្សេងៗទៀតជ្រៀតជ្រែកខួរក្បាលថែមទៀតផង។ (អាន:ថ្នាំងងុយគេង ពេលអ្នកគួរប្រើ)ដំឡូងផ្អែម គ្រាប់ធញ្ញជាតិ សណ្តែកដី និងបន្លែពណ៌បៃតងសុទ្ធតែសម្បូរវីតាមីន E ទាំងអស់។
វីតាមីន C
រ៉ាឌីកាលសេរីគឺជាអាតូម និងម៉ូលេគុលដែលអាចបំផ្លាញកោសិការខួរក្បាលបាន។ ជាញឹកញាប់នោះគឺថា វាគឺជាផលិតផលនៃប្រតិកម្មគីមីក្នុងរាងកាយដែលមានអុកស៊ីសែន។ បញ្ហានេះអាចដោះស្រាយបាននៅពេលមានចំនួនអង់ទីអុកស៊ីដង់គ្រប់គ្រាន់។ ការទទួលបានវីតាមីន C គ្រប់គ្រាន់ក្នុងរបបអាហារ វានឹងជួយពង្រឹងដល់សមត្ថភាពខួរក្បាលពីការបំពេញមុខងារផ្សេងៗ។ បន្លែនិងផ្លែឈើជាច្រើនដូចជា ក្រូច និងសណ្តែកសុទ្ធតែសម្បូរវីតាមីន C ទាំងអស់។
វីតាមីន B12
វីតាមីនប្រភេទនេះជាអ្នកថែរក្សាសុខភាពកោសិកាសរសៃប្រសាទ បង្កើនការស្មារតីប្រុងប្រយ័ត្ន ពង្រឹងដល់ការមានអារម្មណ៍ល្អ បង្ការការភ្លេចភ្លាំង ជំរុញដល់ថាមពលខួរក្បាល និងបង្កើនសម្បកការពារសរសៃប្រសាទ។ បញ្ហាផ្លូវចិត្តជាច្រើនបានកើតឡើងដោយសារការកង្វះនៃសម្បកការពារសរសៃប្រសាទនេះឯង។ សាច់គោ សាច់ជ្រូក ត្រី សាច់បក្សី និងសាច់សត្វសុទ្ធតែសម្បូរវីតាមីន B12 ទាំងអស់។
អាស៊ីតហ្វូលិក
ចំនួនសារធាតុ Homocysteine ក្នុងឈាមត្រូវបានគ្រប់គ្រងដោយអាស៊ីតហ្វូលិក។ មនុស្សយើងគួរតែទទួលទានអាស៊ីតហ្វូលិកឱ្យបានច្រើន ព្រោះសារធាតុ Homocysteine ត្រូវបានគេរកឃើញថា នឹងទៅបំផ្លាញកោសិការបស់ខួរក្បាលនៅពេលវាមានចំនួនច្រើន។ ទោះបីជាយ៉ាងណាក៏ដោយ រឿងនេះកើតឡើងពេលដែលកង្វះថាមពលក្នុងខួរក្បាលប៉ុណ្ណោះ។ ម៉្យាងវិញទៀត អាស៊ីតហ្វូលិកនឹងជួយពង្រឹងដល់ការតាំងស្មារតី និងការភ្លេចភ្លាំងរយៈពេលខ្លី៕