ក្រុមអ្នកវិទ្យាសាស្ត្របានបង្កើតសត្វជ្រូកដែលមានភាពស៊ាំទៅនឹងជំងឺបសុសត្វមួយដែលបង្កការខាតបង់ខ្លាំងបំផុតមួយរបស់ពិភពលោក។ នេះបើតាមប៊ីប៊ីស៊ីចេញផ្សាយថ្ងៃព្រហស្បតិ៍ទី២១មិថុនានេះ។
ក្រុមអ្នកវិទ្យាសាស្ត្របានកែសម្រួល DNA របស់សត្វជ្រូកដើម្បីឱ្យពួកវាទប់ទល់នឹងជំងឺផ្លូវដង្ហើម ឈ្មោះថា PRRS ដែលជាវិធានការមួយអាចទប់ស្កាត់ការខាតបង់រាប់ពាន់លានដុល្លារក្នុងមួយឆ្នាំៗ។
ទោះយ៉ាងណា អតិថិជនជាទូទៅមានភាពស្ទាក់ស្ទើរក្នុងការទទួលទានសត្វនិងដំណាំដែលបានកែប្រែហ្សែន។
នេះជាឧបសគ្គដ៏សំខាន់មួយចំពោះកសិករដែលមានជ្រូកកែហ្សែន។
ហើយដោយសារតែការកែហ្សែន ឬ GE ជាបច្ចេកទេសថ្មី ដូច្នេះអវត្តមានបទបញ្ញត្តិផ្សេងៗនាពេលបច្ចុប្បន្នបានរារាំងការលក់របស់ពួកគេ។
GE គឺខុសគ្នាស្រឡះពីបច្ចេកវិជ្ជាផ្លាស់ប្តូរហ្សែនទូទៅ។ GE គឺជាប់ពាក់ព័ន្ធនឹងការផ្លាស់ប្តូរយ៉ាងច្បាស់លាស់នៃ DNA របស់សារពាង្គកាយមួយ ហើយបច្ចេកវិជ្ជាផ្លាស់ប្តូរហ្សែនទូទៅត្រូវបានកំណត់ឡើងដោយការបញ្ចូលហ្សែនខាងក្រៅទៅក្នុងជីវិតមួយទៀត៕
ប្រភព៖ rasmeinews.com
