ប្រយ័ត្ន! “កង្វះពន្លឺព្រះអាទិត្យ” នឹងបង្កបញ្ហាសុខភាពគួរឱ្យបារម្ភទាំងនេះ

ភាគច្រើននៃពួកយើងសុទ្ធតែដឹងថា ការស្ថិតក្រោម ឬត្រូវកម្ដៅថ្ងៃលើសលុបពេកអាចបង្កហានិភ័យនៃជំងឺមហារីកស្បែក រួមទាំងបញ្ហានៃភាពចាស់ជាងវ័យ ស្នាមជ្រីវជ្រួញ ជាំ និងស្នាមអាចម៍រុយជាដើម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) វាជាការពិត! ប៉ុន្តែអ្នកក៏ប្រឈមមុខនឹងបញ្ហាសុខភាពគួរឱ្យព្រួយបារម្ភផងដែរ ប្រសិនបើមិនត្រូវកម្ដៅថ្ងៃសោះ។ ហើយវីតាមីន D ជាមូលហេតុចម្បងបំផុតមួយដែលធ្វើឱ្យពន្លឺព្រះអាទិត្យមានតួនាទីចាំបាច់សម្រាប់សុខភាពល្អប្រសើរ។ ថាតើរាងកាយនឹងជួបប្រទះបញ្ហាអ្វីខ្លះទៅនៅពេលទទួលបានពន្លឺព្រះអាទិត្យមិនគ្រប់គ្រាន់? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីបញ្ហាសុខភាពមួយចំនួនដែលអាចកើតឡើងដោយសារកង្វះពន្លឺព្រះអាទិត្យ ៖ 

១. ជំងឺមហារីក

ដូចបានលើកឡើងខាងលើដែរ ការត្រូវកំដៅថ្ងៃច្រើនហួសពេកពេក គឹអាចធ្វើឱ្យអ្នកប្រឈមមុខខ្ពស់នឹងហានិភ័យនៃជំងឺមហារីកស្បែក។ ប៉ុន្តែតើអ្នកធ្លាប់ដឹងទេថាការមិនត្រូវពន្លឺថ្ងៃសោះក៏អាចជាមូលហេតុចម្បងបំផុតមួយនៃការកើតជំងឺមហារីកដែរ? យោងតាមការសិក្សាស្រាវជ្រាវបែបវិទ្យាសាស្ត្រជាច្រើនបានឱ្យដឹងថា វីតាមីន D នៃកំដៅថ្ងៃជាសារធាតុចិញ្ចឹមដ៏ចាំបាច់ដែលមានតួនាទីជួយការពារអ្នកពីបញ្ហានៃជម្ងឺមហារីកមួយចំនួនបាន។

២. ជម្ងឺលើសសម្ពាធឈាម

ជាធម្មតារាងកាយផលិតនូវ​ហ្គាសមួយប្រភេទហៅថា អុកស៊ីតនីទ្រិក (nitric oxide) មានឥទ្ធិពលធ្វើឱ្យសសៃឈាមរីកដែលសំខាន់ណាស់សម្រាប់ការររក្សាបាននូវសម្ពាធឈាមប្រក្រតី។ ហើយកម្ដៅព្រះអាទិត្យ គឺជួយផ្ដល់នូវអុកស៊ីតនីទ្រិកបន្ថែមដល់រាងកាយ។ ដូច្នេះហើយទើបការទទួលបានពន្លឺថ្ងៃគ្រប់គ្រាន់អាចជួយទប់ស្កាត់ហានិភ័យនៃជំងឺលើសសម្ពាធឈាមនិងជំងឺបេះដូង។

៣. កើនទម្ងន់

អុកស៊ីតនីទ្រិកដែលយើងទទួលបានពីពន្លឺព្រះអាទិត្យ គឺមិនត្រឹមតែជួយរាងកាយទប់ស្កាត់ហានិភ័យនៃជំងឺលើសឈាមប៉ុណ្ណោះទេ ប៉ុន្តែក៏ជួយកម្ចាត់សម្រកទម្ងន់ដែលលើសបានយ៉ាងប្រសើរផងដែរ។ សារធាតុហ្គាសនេះបង្កើននិងរក្សាដំណើរការនៃការដុតរំលាយអាហារក្នុងរាងកាយ។

៤. ជម្ងឺបាក់ទឹកចិត្ត (Depression)

អ្នកជំនាញផ្នែកសុខភាពខួរក្បាលបានឱ្យដឹងថា អាការៈនៃជំងឺធ្លាក់ទឹកចិត្តអាចបណ្ដាលមកពីការត្រូវពន្លឺថ្ងៃមិនបានគ្រប់គ្រាន់។ នោះក៏ព្រោះតែវីតាមីន D ដែលផ្ដល់ឱ្យដោយពន្លឺព្រះអាទិត្យ គឺចាំបាច់ណាស់សម្រាប់ការផលិតអ័រម៉ូនរីករាងក្នុងខួរក្បាល។

៥. ងាយឆ្លងជំងឺផ្សេងៗ

ភាគច្រើននៃពួកយើងសុទ្ធតែដឹងថា វីតាមីន c គឺមានសារៈសំខាន់ណាស់សម្រាប់ពង្រឹងប្រព័ន្ធភាពស៊ាំនៃរាងកាយ។ ប៉ុន្តែប្រហែលជាមិនធ្លាប់ចាប់អារម្មណ៍ទេថា ប្រព័ន្ធភាពស៊ាំនៃរាងកាយក៏ត្រូវការវីតាមីន 
D ដើម្បីរក្សាបាននូវភាពរឹងមាំទប់ទល់នឹងការឆ្លងជំងឺផ្សេងៗផងដែរ។ អ្នកនឹងសម្គាល់ឃើញថាខ្លួនឯងងាយនឹងឆ្លងជំងឺផ្សេងៗញឹកញាប់ជាងធម្មតា ប្រសិនបើមិនចេញទៅក្រៅសោះ។

៦. ជំងឺពុកឆ្អឹង

ក្នុងបរិមាណ ឬកម្ដៅល្មម ពន្លឺព្រះអាទិត្យ គឺពិតជាមានអត្ថប្រយោជន៍ណាស់ចំពោះសុខភាពរាងកាយ
ទាំងមូល រួមទាំងឆ្អឹងល្អប្រសើរ។ រាងកាយអាចទទួលបាននូវវីតាមីន D តាមរយៈការស្ថិតក្រោម ឬប៉ះ
ពាល់នឹងពន្លឺព្រះអាទិត្យ។ វីតាមីន D ជាវីតាមីនដែលជួយបង្កើនលើកកម្ពស់ឆ្អឹងក្នុងការស្រូបយកនូវជាតិកាល់ស្យូម។ បរិមាណនៃជាតិកាល់ស្យូមគ្រប់គ្រាន់ គឺជួយអោយឆ្អឹងរក្សាបាននូវសុខភាពល្អរឹងមាំ ជៀសឆ្ងាយពីជំងឺពុកឆ្អឹង។

សម្គាល់ ៖ ដើម្បីអាចជៀសផុតពីបញ្ហាសុខភាពផ្សេងៗអ្នកគួរអនុញ្ញាតឱ្យរាងកាយត្រូវពន្លឺព្រះអាទិត្យសម្រាប់រយៈពេលពី ១០ ទៅ ១៥ នាទីក្នុងមួយថ្ងៃ។ ហើយចន្លោះម៉ោង ១០ ព្រឹក និង ម៉ោង ៤ ល្ងាច 
គឺជាពេលវេលាដ៏ប្រសើរបំផុត៕