ភាគច្រើននៃពួកយើងប្រហែលជាមិនធ្លាប់ដឹងទេថា ស្លឹកខ្ទឹម ក្រៅពីជាគ្រឿងផ្សំបន្ថែមរសជាតិក្នុងអាហារ វាក៏ជាបន្លែដែលអាចផ្ដល់អត្ថប្រយោជន៍ស្មានមិនដល់ចំពោះសុខភាពតាមរយៈសារធាតុចិញ្ចឹមសំខាន់ៗ ជាពិសេស គឺសារធាតុអាល់លីស៊ីន (allicin)ដែលមានផ្ទុក។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថ្ងៃនេះ
វេបសាយសុខភាព Health.com.kh នឹងបង្ហាញឲ្យដឹងពីឥទ្ធិពលវិជ្ជមានដ៏ប្រសើរនៃការទទួលទាន
ស្លឹកខ្ទឹម ៖
១. សុខភាពឆ្អឹងរឹងមាំ
ស្លឹកខ្ទឹមមានផ្ទុកសម្បូរទៅដោយវីតាមីន K ដែលជួយក្នុងការពង្រឹងសុខភាពឆ្អឹង។ វីតាមីន K ជួយធ្វើឲ្យសុខភាពឆ្អឹងរឹងមាំ ដោយបង្កើនការផលិតប្រូតេអ៊ីនដែលត្រូវការចាំបាច់ដើម្បីរក្សាជាតិកាល់ស្យូម និងបង្កើនដង់ស៊ីតេនៃឆ្អឹង។ វីតាមីន K ដែលមានវត្តមានក្នុងស្លឹកខ្ទឹមអាចធ្វើការរួមគ្នាជាមួយវីតាមីន D និងកាល់ស្យូមដើម្បីរក្សាបាននូវសុខភាពឆ្អឹងល្អរឹងមាំគួរឲ្យកត់សម្គាល់ ដូច្នេះក្រៅពីទទួលទានស្លឹកខ្ទឹមហើយ អ្នកក៏គួរស្ថិតក្រោមពន្លឺព្រះអាទិត្យខ្លះដើម្បីទទួលបានវីតាមីន D គ្រប់គ្រាន់ និងកុំភ្លេចព្យាយាមទទួលទានអាហារដែលមានផ្ទុកសម្បូរទៅដោយជាតិកាល់ស្យូមផង។
២. ទប់ស្កាត់ជំងឺមហារីក
បន្លែប្រភេទ allium មានលក្ខណៈសម្បត្តិប្រឆាំងការរលាក សារធាតុប្រឆាំងមហារីក និង allicin។ដូច្នេះការទទួលទានបន្លែប្រភេទ allium ដូចជាខ្ទឹមស ខ្ទឹមបារាំង ខ្ទឹមក្រហម រួមទាំងស្លឹកខ្ទឹមនេះក៏មានអត្ថប្រយោជន៍កាត់បន្ថយហានិភ័យនៃជំងឺមហារីកបានប៉ុន្មានប្រភេទផងដែរ ជាពិសេសជំងឺមហារីកពោះវៀនធំនិងជំងឺមហារីកក្រពេញប្រូស្តាត។
៣. ជួយឱ្យស្រកទម្ងន់
ស្លឹកខ្ទឹមមានផ្ទុកជាតិកាឡូរីទាប ប៉ុន្តែសារធាតុចិញ្ចឹមសំខាន់ៗសម្រាប់សុខភាពខ្ពស់ រួមបញ្ចូលទាំងជាតិសសៃដែលនឹងជួយអោយអ្នកស្រកទម្ងន់បានឆាប់រហ័ស។ ជាតិសសៃអាចធ្វើអោយអ្នកមានអារម្មណ៍ឆ្អែតបានយូរនិងកាត់បន្ថយការឃ្លាន។
៤. បង្កើនសុខភាពបេះដូង
ស្លឹកខ្ទឹមក៏ជាប្រភពដ៏ប្រសើរនៃវីតាមីន K ព្រមទាំងជាតិសសៃមានប្រសិទ្ធិភាពកាត់បន្ថយកម្រិតនៃ
កូឡេស្តេរ៉ូលមិនល្អនិងជាតិខ្លាញ់ទ្រីគ្លីសេរីដជួយរក្សាសុខភាពបេះដូងជៀសផុតពីហានិភ័យនៃជំងឺផ្សេងៗ។ ដើម្បីទប់ស្កាត់ជំងឺបេះដូង រួមទាំងបញ្ហាសុខភាពផ្សេងៗទៀត ក្រៅពីការមានរបបអាហារត្រឹមត្រូវហើយនោះ អ្នកក៏គួរធ្វើលំហាត់ប្រាណអោយបានទៀងទាត់ផងដែរ។
៥. បង្កើនសុខភាពភ្នែក
ស្លឹកខ្ទឹម គឺជាប្រភេទនៃបន្លែមានផ្ទុកបរិមាណនៃវីតាមីន A ខ្ពស់ ដែលល្អសម្រាប់សុខភាពភ្នែកជួយឱ្យមើលឃើញកាន់តែច្បាស់ និងទប់ស្កាត់ប្រឆាំងជំងឺភ្នែកមួយចំនួនផងដែរ។ ប្រសិនបើអ្នកទទួលទានស្លឹកខ្ទឹមជាប្រចាំ នោះអ្នកនឹងទទួលបានបរិមាណវីតាមីន A គ្រប់គ្រាន់តាមតម្រូវការរបស់រាងកាយ។
៦. កាត់បន្ថយជាតិស្ករក្នុងឈាម
ស្លឹកខ្ទឹម ក៏ជាប្រភពដ៏ប្រសើរនៃសារធាតុ allyl propyl disulfide ដែលជួយក្នុងការកាត់បន្ថយកម្រិតនៃជាតិស្ករក្នុងឈាម។ លើសពីនេះទៅទៀត ស្លឹកខ្ទឹម មានផ្ទុកនូវជាតិរ៉ែមួយប្រភេទហៅថា chromium ដែលជាជាតិរ៉ែចាំបាច់សម្រាប់គ្រង់គ្រងកម្រិតអាំងស៊ុយលីនក្នុងឈាម និងជួយកាត់បន្ថយកម្រិតជាតិគ្លុយកូសដែលលើស រួមទាំងកម្រិតនៃកូឡេស្តេរ៉ូលមិនល្អផងដែរ។
៧. សុខភាពស្បែក
ស្លឹកខ្ទឹមជួយធ្វើឱ្យសុខភាពស្បែកកាន់តែប្រសើរឡើងតាមរយៈសារធាតុ allicin ដែលវាមានផ្ទុក។allicin មានប្រសិទ្ធិភាពការពារស្បែកពីភាពជ្រីវជ្រួញនិងចាស់មុនអាយុ។ លើសពីនេះទៅទៀត
allicin ក៏ជួយធ្វើឱ្យស្បែករលោងស្អាតតឹងណែនផងដែរ។ ចំណែកឯវីតាមីន C ដែលមានផ្ទុកក្នុងស្លឹកខ្ទឹមវិញ គឺចាំបាច់ណាស់សម្រាប់រក្សាសុខភាពស្បែកល្អប្រសើរនិងមានពន្លឺតាមបែបធម្មជាតិ។ វីតាមីន C ក៏នឹងជួយប្រយុទ្ធប្រឆាំងការបំផ្លាញពីសំណាក់រ៉ាឌីកាល់សេរីចំពោះស្បែកគួរឱ្យកត់សម្គាល់៕