យុវតី​ម្នាក់​ដែល​រស់នៅ​ជាមួយ​សរីរាង្គ​ដ៏​សំខាន់​របស់​នាង​លៀន​ចេញមកក្រៅ​អស់​រយៈពេល ១៩ ឆ្នាំ ត្រូវបាន​សង្គ្រោះ​ដោយ​ក្រុម​វេជ្ជបណ្ឌិត​។​

​នាង ស៊ូ​ដា ស៊ូ​ឡី​ម៉ាន់ អា​ម៉ួ អាយុ ១៩ ឆ្នាំ​បានកើត​មកជា​មួយ​ពោះ​ប្រហោង​ខុស​ប្រក្រតី ដូច្នេះ​ថ្លើម​របស់​នាង​និង​ផ្នែក​មួយចំនួន​នៃ​ពោះវៀន​លៀន​ចេញពី​ក្បាលពោះ​របស់​នាង ដោយ​គ្របដណ្តប់​ជិត​ដោយ​ស្បែក​ស្តើង​ប៉ុណ្ណោះ​។​

​ជារឿយៗ​ជនរងគ្រោះ​របៀបនេះ គឺ​ត្រូវ​ទទួល​ការវះកាត់​ព្យាបាល​ភ្លាមៗ​ក្នុង​រយៈពេល​ប៉ុន្មាន​ម៉ោង​នៃ​ការ​សម្រាល ប៉ុន្តែ​ស៊ូ​ដា​វះកាត់​បរាជ័យ​២​ដង​មកហើយ នៅពេល​នាង​មាន​អាយុ ៥ ឆ្នាំ​។​

​នាង​បាន​បោះបង់ចោល​ការសិក្សា ៤ ឆ្នាំ​មកហើយ ដោយសារតែ​ការបញ្ចេញមតិ​ឃោរឃៅ​ពី​អ្នកដទៃ​ដែល​និយាយថា​នាង​មើលទៅ​មាន​ផ្ទៃពោះ ហើយ​នាង​តែងតែ​ព្រួយបារម្ភ​ខ្លាច​គេ​មក​វាយ​ចំ​សរីរាង្គ​លៀន​ចេញ​ក្រៅ​របស់​នាង​។​

​ក្រុមគ្រូពេទ្យ​វះកាត់​ត្រូវតែ​សន្ធឹង​ស្បែក​ពោះ​របស់​នាង ដោយ​ប្រើ​ខ្យល់​រយៈពេល​២​សប្ដាហ៍ ហើយ​ប្រើ​ថ្នាំ Botox ដើម្បី​សម្រួល​សាច់ដុំ មុនពេល​ពួក​គ្រូពេទ្យ​អាចដាក់​សរីរាង្គ​របស់​នាង​ចូលទៅ​ខាងក្នុង​វិញ​។​

​ស៊ូ​ដា មកពី​ប្រទេស​តង់​ហ្សា​នី បាន​ទៅ​មន្ទីរពេទ្យ​វិទ្យាស្ថាន​វិទ្យាសាស្ត្រ​សុខាភិបាល SRM ក្នុង​ទីក្រុង​ឆិ​ន​ណៃ របស់​ឥណ្ឌា ដើម្បី​ធ្វើការ​វះកាត់ ហើយ​ឥឡូវ​កំពុង​សម្រាក​ផ្សះ​មុខរបួស​នៅ​ស្រុកកំណើត​របស់​នាង​៕

ប្រភព៖ rasmeinews.com