មន្រ្តីព្រៃឈើឥណ្ឌាម្នាក់ដឹងថាខ្លួនឯងត្រូវពស់វាយប្រហារក្រោយថ្លាន់ធំមួយក្បាលបានព្យាយាមរឹតគាត់ក្នុងពេលបុរសក្លាហានខុសទំនងនេះចាប់ពស់មកលីលើស្មានៅចំពោះមុខមនុស្សឈរមើលកុះករ។

លោក សាន់ឆាយ ឌុតតា ត្រូវបានពួកអ្នកភូមិនៅរដ្ឋបឹងហ្កាល់ខាងលិចហៅមកជួក្រោយពស់ទម្ងន់៤០គីឡូក្រាមមួយកំពុងលេបសត្វពពែមួយទាំងរស់។លោកសាន់ឆៃ ដ៏មានអំនួតមិនបានចាប់ពស់នេះដាក់ក្នុងបាវដូចតាមទម្លាប់ទេ តែបែរជាលើកវាដាក់ជុំវិញកហើយថតសែលហ្វីជាមួយអ្នកភូមិ។

ការភិតភ័យក៏កើតមាននៅពេលពស់ដ៏ធំនេះរើបម្រះនិងរុំជុំវិញកលោកសាន់ឆៃ ឌុតតា បង្ខំអោយលោកខិតខំទាញពស់និងរើខ្លួនពីការរឹតរបស់ពស់។កុំតែមានអ្នកជិតជួយទាញ កុំអីមន្រ្តីព្រៃឈើរូបនេះត្រូវពស់រឹតងាប់បាត់។

ពស់ថ្លាន់ជាពស់គ្មានពិស តែវាអាចសម្លាប់សត្វជាចំណីយ៉ាងរហ័សដោយសារតែរឹបលំហូរឈាមដោយការរឹតដ៏ខ្លាំងរបស់វា។វាអាចធំប្រវែង១០ម៉ែត្រ។

នាយកដ្ឋានព្រៃឈើបឹងហ្កាល់ខាងលិចបាននិយាយថាខ្លួននឹងស៊ើបអង្កេតទង្វើរបស់សាន់ឆៃ តែលោកបាននិយាយថាលោកគ្រាន់តែចង់សង្គ្រោះជីវិតសត្វនេះខណៈដែលប្រជាជនមូលដ្ឋានប្រុងតែវាយសម្លាប់៕

ប្រភព៖ rasmeinews.com