មនុស្សយើងសុទ្ធតែត្រូវការការសម្រាកដ៏ពេញលេញជារៀងរាល់យប់ ប៉ុន្តែនៅពេលអ្នកយល់ថាខ្លួនឯង ឬដៃគូរដំណេងជាមួយគ្នាគេងស្រមុកខ្លាំង ឬអ្នកគេងមិនលក់តែម្តង មានន័យថាការគេងរបស់អ្នកនឹងរងការប៉ះពាល់ជាប់រហូតបាន។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ហើយបើសិនជាអ្នកខកខានមិនបានគេងរយៈពេលមួយថ្ងៃពីរ នោះឥទ្ធិពលរបស់វានឹងបង្ហាញយ៉ាងច្បាស់ដោយការចេញស្នាមខ្មៅៗក្រោមភ្នែក ត្រូវការញ៉ាំអាហារជាប់នៅពេលភ្ញាក់ឡើង ឃ្លានតែអាហារមិនផ្តល់សុខភាព ព្រមទាំងមិនសូវមានផលិតផលភាពការងារដូចមុនទៀត។ យ៉ាងណាមិញ ខាងក្រោមនេះ ខ្ញុំមានវិធីសាស្រ្តព្យាបាលការគេងមិនលក់ដោយខ្លួនឯងមួយចំនួន ដែលអ្នកអាចពង្រឹងដល់ទម្លាប់នៃការគេងរបស់អ្នកឡើងវិញបាន៖
ការហាត់ប្រាណ
ការហាត់ប្រាណមិនគ្រាន់តែជួយសម្រកទម្ងន់ ឬបន្ថែមប្រយោជន៍ដល់សាច់ដុំទេ តែវាក៏ជួយឲ្យអ្នកគេងលក់កាន់តែស្រួលនៅពេលយប់ដែរ។ សព្វថ្ងៃនេះ មនុស្សយើងភាគច្រើនរស់នៅបែបស៊ីដេកៗ ប៉ុន្តែអ្នកដែលហាត់ប្រាណជាប្រចាំ ការគេងរបស់ពួកគេនឹងល្អជាងមុន ហើយការធ្វើការកាន់តែល្អជាងមុនផងដែរ។ ទោះបីជាហាត់ប្រាណត្រឹម ១៥នាទីក៏ល្អជាងមិនបានធ្វើអីសោះដែរ។
ទឹកដោះគោក្តៅឧណ្ហៗ
មធ្យោបាយមួយផ្សេងទៀតក្នុងការពង្រឹងដល់ការគេងគឺរកអីញ៉ាំមុនពេលគេង ប៉ុន្តែត្រូវប្រាកដថា វាមិនមែនជាគ្រឿងស្រវឹងឡើយ។ អ្នកអាចរៀបចំទឹកដោះគោក្តៅឧណ្ហៗមួយកែវដើម្បីញ៉ាំ ព្រោះវាអាចជួយឲ្យអ្នកងងុយគេងបាន។
ត្រាំទឹកក្តៅឧណ្ហៗ
ការត្រាំខ្លួនក្នុងទឹកក្តៅឧណ្ហៗមុនពេលគេង គឺជាមធ្យោបាយដ៏ល្អមួយក្នុងការបមបាត់អារម្មណ៍គេងមិនលក់នៅពេលយប់ ព្រោះវានឹងជួយឲ្យសាច់ដុំធូរ។
ធ្វើឲ្យបន្ទប់គេងត្រជាក់
ការដែលគេងក្នុងបន្ទប់ដែលត្រជាក់ នឹងជំរុញដល់អារម្មណ៍ងងុយគេងបាន។ ប៉ុន្តែការដែលគេងក្នុងបន្ទប់ដែលក្តៅពេញ ឬត្រជាក់ពេក អាចរំខានដល់ការគេងវិញបាន ដូច្នេះយកល្អគួរតែរក្សាសីតុណ្ហភាពនៅចន្លោះពី ១៨ ទៅ ២៣អង្សារ។ (អាន:ថ្នាំងងុយគេង ពេលអ្នកគួរប្រើ)សម្រាប់ស្រ្តីដែលរាំងរដូវ គួរតែរក្សាកន្លែងគេងឲ្យបានត្រជាក់តាមតែអាចធ្វើទៅបានដើម្បីបន្ថយឥទ្ធិពលនៃការក្តៅពេញខ្លួនក្នុងពេលរាំងរដូវ៕