មានអាហារច្រើនណាស់ដែលអាចជួយព្យាបាលការកង្វះគ្រាប់ឈាម។ ប៉ុន្តែវាក៏មានអាហារច្រើនទៀតដែលអ្នកកង្វះគ្រាប់ឈាមគួរតែចៀសវាងដែរបើសិនជាមិនចង់ឲ្យជំងឺនេះកាន់តែធ្ងន់ធ្ងរ។ មនុស្សគ្រប់គ្នាដឹងរួចមកហើយថា ដើម្បីទប់ស្កាត់ការកង្វះគ្រាប់ឈាម យកល្អគួរតែបញ្ចូលអាហារណាដែលសម្បូរទៅដោយជាតិដែក ព្រោះវាជាជាតិរ៉ែដ៏សំខាន់ក្នុងការបង្កើតគ្រាប់ឈាមក្រហម។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)យ៉ាងណាមិញ អ្នកក៏គួរតែបញ្ចូលអាហារមួយចំនួនក្នុងរបបអាហារដែលវាមានមុខងារជំរុញដល់រាងកាយបឺតស្រូបជាតិដែកពីក្នុងអាហារ ជាពិសេសវីតាមីន C តែម្តង។ ប៉ុន្តែបើសិនជាអ្នកកំពុងតែមានបញ្ហាកង្វះគ្រាប់ឈាមស្រាប់ យកល្អគួរតែចៀសវាងអាហារខាងក្រោមនេះ ព្រោះវាត្រូវបានគេរកឃើញថា អាចរំខានដល់ការបឺតស្រូបជាតិដែករបស់ពោះវៀនបាន៖
តែបៃតង
យើងទាំងអស់គ្នាដឹងរួចហើយថា តែបៃតងគឺជាភេសជ្ជៈផ្តល់សុខភាពល្អបំផុត ប៉ុន្តែដោយសារតែសារធាតុ Tannins ក្នុងតែបៃតង គឺជាហេតុផលដែលអ្នកកង្វះគ្រាប់ឈាមគួរតែចៀសវាងវិញ។ អ្វីដែលអ្នកគួរតែធ្វើគឺ ត្រូវតមការញ៉ាំតៃបៃតងយ៉ាងហោចណាស់មួយម៉ោងមុន និងក្រោយពេលបាយរួច ដើម្បីប្រាកដថា សារធាតុ Tannins មិនរំខានដល់ការបឺតស្រូបជាតិដែកក្នុងក្រពះពោះវៀនឡើយ។ អាហារផ្សេងទៀតដែលអ្នកគួរតែតមដែរនោះគឺ ទំពាំងបាយជូរ ផ្លែទទឹម ផ្លែប៉ោម និងសណ្តែកដី ដោយសារតែវាមានសារធាតុ Tannins ដូចតែបៃតងដែរ។
សណ្តែក
វាត្រូវបានគេស្គាល់យ៉ាងច្បាស់ថា ជាប្រភពអាហារដ៏ល្អបំផុតក្នុងការផ្តល់ប្រូតេអ៊ីនដើម្បីបង្កើតសាច់ដុំលើអ្នកញ៉ាំអាហារបួស។ ក្រៅពីនេះ វាក៏ផ្តល់ជាតិសរសៃជាច្រើនដើម្បីទប់ស្កាត់ការទល់លាមក ការឡើងទម្ងន់ និងជំងឺបេះដូងផងដែរ។ តែអ្វីដែលគួរឲ្យស្តាយនោះគឺថា អាហារនេះត្រូវបានហាមឃាតចំពោះអ្នកកង្វះគ្រាប់ឈាមញ៉ាំ។ នេះដោយសារតែសណ្តែកផ្ទុកទៅដោយសារធាតុ Phytates ដែលវាទៅតោងជាតិដែកជាប់ ដូច្នេះវានឹងមិនអាចបឺតស្រូបចូលទៅក្នុងចរន្តឈាមបានឡើយ។
ផលិតផលធ្វើពីទឹកដោះគោ
វាមិនខុសគ្នានឹងសណ្តែកត្រង់ថា ទឹកដោះគោ និងផលិតផលធ្វើពីទឹកដោះគោផ្ទុកទៅដោយជាតិប្រូតេអ៊ីន។ ប៉ុន្តែវាជាប្រភពដ៏អស្ចារ្យនៃជាតិកាលស្យូម ក្នុងការជួយឲ្យឆ្អឹងរឹងមាំ។ ម៉្យាងវិញទៀត កាលស្យូមក៏ដើរតួនាទីសំខាន់ក្នុងការបង្ការជំងឺពុកឆ្អឹងដែរ។ អ្វីដែលគួរឲ្យស្តាយនោះគឺថា ជាតិកាលស្យូមមានឥទ្ធិពលក្នុងការរំខានការបឺតស្រូបរបស់ជាតិដែកក្នុងពោះវៀនដែរ។ (អាន:ថ្នាំងងុយគេង ពេលអ្នកគួរប្រើ)អ្វីដែលអ្នកគួរតែធ្វើដើម្បីឲ្យឆាប់ជាពីជំងឺកង្វះគ្រាប់ឈាមកាន់តែលឿន និងបន្ថយការកើតជំងឺពុកឆ្អឹង ចូរប្រាកដថា អ្នកមិនបានញ៉ាំអាហារសម្បូរជាតិដែក និងកាលស្យូមក្នុងពេលតែមួយឡើយ៕