ភ្នំពេញៈ មន្ត្រីកិច្ចការវប្បធម៌ នៃ ស្ថានទូតអាមេរិកប្រចាំកម្ពុជា លោកស្រី ម៉ូនីកា ដេវីស បានមានប្រសាសន៍ថា ការបែងចែកថ្មឋានព្រះចន្ទ ទៅដល់បណ្តាប្រទេសនានា ដោយរួមទាំងប្រទេសកម្ពុជាផង ហើយការធ្វើពិព័រណ៍នេះថ្ងៃនេះ ក្នុងគោលបំណងដើម្បីបង្កើតក្តីសង្ឃឹម និង ភាពជឿជាក់ចំពោះសន្តិភាពដល់មនុស្សជាតិនៅទូទាំងពិភពលោកផង ក៏ ដើម្បី ជំរុញនូវចំណេះដឹង វិស័យវិទ្យាសាស្ត្រ បច្ចេកវិទ្យា វិស្វកម្ម និង គណិតវិទ្យា(ស្តេម,STEM) ដល់យុវជនកម្ពុជា ផងដែរ ។
លោកស្រី ម៉ូនីកា ដេវីស ថ្លែងយ៉ាងដូច្នេះនៅក្នុងពិធីពិព័រណ៍ ថ្មឋានព្រះចន្ទ នៅសារមន្ទីរជាតិកម្ពុជា កាលពីព្រឹកថ្ងៃទី ១៨ ខែ មិថុនា ឆ្នាំ ២០១៨ ដែលជាកិច្ចសហការរៀបចំរវាងស្ថានទូតអាមេរិកប្រចាំកម្ពុជា និង សារមន្ទីរជាតិ នៃ ប្រទេសកម្ពុជា ។
ថ្មឋានព្រះចន្ទ ឬ ថ្មសុឆន្ទៈឋានព្រះចន្ទ ដែលអាមេរិក បាននាំយកមកពីឋានព្រះចន្ទ គឺជាដុំថ្ម ១ ដុំ ហើយត្រូវបានជ្រៀកជា ១៣៥ ដុំ តូចៗ ចែកដល់ប្រទេសនានារួមទាំងកម្ពុជាផង ។ ថ្មឋានព្រះចន្ទដែលត្រូវបានប្រគល់មកឱ្យមកប្រទេសកម្ពុជា គឺតាមរយៈលោក កែវ សង់គីម រដ្ឋមន្ត្រីក្រសួងអប់រំជាតិកម្ពុជា កាលពីថ្ងៃទី ១៩ ខែ កក្កដា ឆ្នាំ ១៩៧៣ ភ្ជាប់មកជាមួយយនូវលិខិតមួយច្បាប់ ហើយប្រយោគមួយ នៃ លិខិតនោះបានសរសេរថា ប្រសិនបើមនុស្ស នៃ ប្រជាជាតិនានាធ្វើរួមគ្នា ដើម្បី សម្រេចក្តីសុបិនរបស់មនុស្សជាតិនៅក្នុងអវកាសបាន ពិតណាស់ យើងអាចធ្វើរួមគ្នា ដើម្បី សម្រេចក្តីសុបិនរបស់មនុស្សជាតិដែលចង់បានសន្តិភាពនៅលើភពផែនដីនេះ ៕
ប្រភព៖ rasmeinews.com
