ជនជាតិដើមភាគតិចនៅកម្ពុជា មានចំនួន ប្រមាណ២៤ក្រុម ហើយពួកគេសុទ្ធតែមានទំនៀមទម្លាប់ និងជំនឿនានា ក្នុងហេតុផលស្រដៀងគ្នា ដើម្បីរក្សាក្រមសីលធម៌ ឬគោលការណ៍ច្បាប់ប្រពៃណី គ្រប់គ្រងសន្តិសុខ សណ្ដាប់ធ្នាប់ និងការដោះស្រាយជម្លោះផ្សេងៗ រួមទាំងផែនការអភិវឌ្ឍសហគមន៍។
ដើម្បីចែករំលែកដល់បងប្អូនប្រជាពលរដ្ឋកម្ពុជា បានយល់ដឹងបន្ថែមពីជនជាតិដើមភាគតិច ប្រធានសមាគមយុវជន ជនជាតិដើមភាគតិច លោក ង៉ាច សាមីន បានប្រាប់ Sabay ថា នេះជាមធ្យោបាយល្អចំណាយពេលតិច ងាយយល់ អាចទាក់ទងគ្នា និងជាការគោរពទៅមក មុនចូលទៅដល់ភូមិ ឬសហគមន៍របស់ជនជាតិដើមភាគតិច។
១. ធ្វើការទំនាក់ទំនង ឬជូនដំណឹងជាមុន
ជាដំបូងបំផុតយើងអាចស្វែងរក និងទាក់ទងតាមវិធីដែលអាចធ្វើបាន ទៅកាន់បុគ្គលសំខាន់ មាន ចាស់ទុំភូមិ ឬមេកន្ទ្រាញ និងសមាជិកសហគមន៍ដទៃទៀតក៏បាន។
២. ការគោរពចាស់ទុំ
ដូចពាក្យថា ចូលស្ទឹងតាមបត់ ឬសំដី សជាតិ មារយាទ សួរពូជ។ ប្រាកដណាស់ យើងត្រូវដឹងពីរឿងនេះ មុនចូលទៅលេង ឬចង់ទំនាក់ទំនងជាមួយមនុស្សនៅតំបន់ថ្មី ជាពិសេសជួបបងប្អូនជនជាតិដើមភាគតិចណា១។ តាមតំបន់នីមួយៗ ជនជាតិដើមមានជំនឿខ្លាំងលើការគោរពដូនតា និងព្រលឹងដូនតា។
៣. ត្រណមមិនឲ្យនិយាយ ឬធ្វើអ្វីផ្ដេសផ្ដាស
ដាច់ខាត ពេលទៅដល់ទឹកដីជនជាតិដើមភាគតិច មិនត្រូវនិយាយផ្ដេសផ្ដាសនៅក្នុងតំបន់ព្រៃ ព្រោះជាតំណមខ្លាំង ដែលអាចប៉ះពាល់ដល់ម្ចាស់ស្រុក សេចក្ដីថ្លៃថ្នូរ ប្រពៃណី ទំនៀមទម្លាប់ល្អ និងសណ្ដាប់ធ្នាប់សង្គមជនជាតិដើម។ តំបន់សំខាន់ ដែលមានជំនឿស័ក្ដិសិទ្ធិបំផុត មានដូចជានៅតាមភ្នំ កន្លែងមានថ្មធំៗ បឹង ត្រពាំង អូរ ទឹកជ្រោះ និងកន្លែងមានផ្នូរដូនតា។
៤. ពេលមានសមាជិកណាម្នាក់ស្លាប់
ជំនឿរបស់ជនជាតិដើមភាគតិច គឺគេត្រូវយកសម្ភារៈ ដូចជាសំលៀកបំពាក់ និង គ្រឿងប្រដាប់ដែលសពធ្លាប់បានប្រើកាលនៅរស់ យកទៅកប់ចោលជាមួយសព។
ជាពិសេសអ្នកស្លាប់តៃហោង គឺសមាជិកសហគមន៍ណា១ ដែលបានចូលរួមក្នុងកម្មវិធីរំលែកទុក្ខរបស់គ្រួសារនៃសពនោះ ដាច់ខាតគ្រួសារនៃម្ចាស់សពនៅត្រូវធ្វើពិធីលីសលាង ឬហៅថាសែន (ច្បាប់ប្រពៃណីត្រូវអនុវត្តតាមក្រុមជនជាតិដើមភាគតិច នៃក្រុមនីមួយៗ) ដើម្បីជម្រះព្រលឹង ឬវិញ្ញាណអាក្រក់ចេញពីខ្លួនកុំឲ្យតាមយាយី។
ប្រភព៖ sabay.com.kh