មនុស្សភាគច្រើនសុទ្ធតែបានដឹងអំពីអាហារសុខភាពល្អដែលគួររួមបញ្ចូលក្នុងរបបអាហារប្រចាំថ្ងៃ។ ប៉ុន្តែកំឡុងពេលមានផ្ទៃពោះនោះតម្រូវការនៃរាងកាយនឹងប្រែប្រួលដែលមានន័យថា វាត្រូវការប្រូតេអ៊ីន, វីតាមីន និងជាតិរ៉ែបន្ថែម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ជាការពិតណាស់ក្នុងកំឡុងពេលត្រីមាស
ទី ២ និង ទី ៣ រាងកាយអាចត្រូវការកាឡូរីបន្ថែមត្រឹមពី ៣០០ ទៅ ៥០០ កាឡូរីរាល់ថ្ងៃដើម្បីបំពេញតម្រូវការនៃកាឡូរីចាំបាច់សម្រាប់ស្ត្រីជាម្ដាយ និងគភ៌។ ទោះជាយ៉ាងណា ស្ត្រីជាម្ដាយនឹងត្រូវការកាឡូរីបន្ថែមក្នុងបរិមាណប្រហែលគ្នានេះរាល់ថ្ងៃផងដែរ នៅក្រោយពេលសម្រាល និងកំឡុងពេលប៉ុន្មានខែដំបូងនៃការបំបៅដោះ។ និយាយពីសារធាតុចិញ្ចឹមជាច្រើនដែលត្រូវការកំឡុងពេលមានផ្ទៃពោះ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលស្ត្រីមានផ្ទៃពោះគ្រប់រូបគួរទទួលទានពីមួយសប្តាហ៍ទៅមួយសប្តាហ៍ ៖
១. សប្តាហ៍ដំបូង
កំឡុងពេលសប្តាហ៍ដំបូងនៃការមានផ្ទៃពោះ អ្វីដែលអ្នកទទួលទាននឹងក្លាយជាអាហារូបត្ថម្ភបំរុងសម្រាប់អ្នក និងទារកក្នុងផ្ទៃ។ ដូច្នេះការទទួលទានអាហារត្រឹមត្រូវ គឺសំខាន់ណាស់ដើម្បីបំពេញតម្រូវការចាំបាច់ដើម្បីបំប៉នសុខភាពទាំងម្ដាយ និងកូន។ ហើយអាហារមានផ្ទុកសម្បូរទៅដោយសារធាតុ Folic acid ជាអ្វីដែលអ្នកត្រូវទទួលទាននៅក្នុងដំណាក់កាលដំបូងនៃការមានផ្ទៃពោះ ខណៈដែល Folic acid ជាវីតាមីនដែលសំខាន់បំផុតអំឡុងពេលមានផ្ទៃពោះដោយវាជួយក្នុងការលូតលាស់ និងអភិវឌ្ឍឆ្អឹងខ្នងរបស់ទារកក្នុងផ្ទៃ។ បន្លែពណ៌បៃតង, ប្រូខូលី ឬផ្កាខាត់ណាខៀវ, ស៊ុត និងសណ្ដែកបាយ ជាប្រភពដ៏ល្អបំផុតនៃសារធាតុ Folic acid និងម៉ាញ៉េស្យូមដែលជួយសម្រាលអាការៈចាញ់កូនផងដែរ។
២. សប្តាហ៍ទី ៤ ដល់ សប្តាហ៍ទី ១២
កំឡុងពេលជុំវិញសប្តាហ៍ទី ៦ នៃការមានផ្ទៃពោះ កោសិកាឈាមក្រហមរបស់ទារកចាប់ផ្ដើមលេចជារូបរាង ហើយបេះដូងក៏ចាប់ផ្ដើមលោតច្របាច់ឈាម។ ក្នុងដំណាក់កាលនេះ អ្នកគួរទទួលទានអាហារមានផ្ទុកសម្បូរទៅដោយជាតិដែកដើម្បីជួយដល់ដំណើរការលូតលាស់របស់ទារក។ អាហារផ្សំឡើងពីទឹកដោះគោ, ស៊ុត, សាច់ និងអាហារសមុទ្រជាប្រភពដ៏ប្រសើរនៃជាតិដែក។ អ្នកក៏អាចពន្លឿនដំណើរការនៃការស្រូបយកជាតិដែកតាមរយៈការទទួលទានទឹកផ្លែឈើស្រស់ដូចជា ទឹកក្រូចស្រស់ ដែលមានផ្ទុកសម្បូរទៅដោយវីតាមីន C។
នៅចុងត្រីមាសដំបូង ខួរក្បាលរបស់ទារកចាប់ផ្ដើមលូតលាស់អភិវឌ្ឍកាន់តែលឿនជាងផ្នែកដទៃទៀតនៃរាងកាយ។ ដូច្នេះការទទួលទានអាហារមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ និង DHA
គឺសំខាន់ណាស់ដើម្បីផ្ដល់សារធាតុចិញ្ចឹមចាំបាច់បន្ថែមជួយក្នុងដំណើរការនេះ។ ហើយត្រីសម្បូរខ្លាញ់ជាប្រភពដ៏ប្រសើរនៃជាតិខ្លាញ់អូមេហ្គា ៣ និងDHA។
៣. សប្តាហ៍ទី ១៣ ដល់ សប្តាហ៍ទី ២៨
នេះ គឺជាដំណាក់ដ៏សំខាន់បំផុតមួយ ខណៈដែលទារកកំពុងលូតលាស់លឿន។ អ្នកត្រូវការសារធាតុចិញ្ចឹមចាំបាច់យ៉ាងច្រើននៅកំឡុងពេលនេះ។ អាហារមានផ្ទុកសារធាតុ Beta-carotene និងDHA ដូចជា ការ៉ុត, ដំឡូងផ្អែម និងត្រីសម្បូរខ្លាញ់ គឺល្អសម្រាប់ភ្នែកទារក។ អាហារមានផ្ទុកជាតិកាល់ស្យូមដូចជា ទឹកដោះគោស្រស់, យ៉ាអួរ, តៅហ៊ូ, ឈីស និងត្រីសាឌីន គឺល្អសម្រាប់ការលូតលាស់ឆ្អឹងរឹងមាំ។ ហើយអាហារមានផ្ទុកវីតាមីន D ជួយរាងកាយក្នុងការស្រូបយកជាតិកាល់ស្យូម។ អាហារមានផ្ទុកជាតិស័ង្កសីដូចជា សាច់ក្រហម, សណ្ដែក, គ្រាប់ធញ្ញជាតិ, ធញ្ញជាតិគ្រាប់ពេញ និងផលិតផលអាហារផ្សំឡើងពីទឹកដោះគោ គឺចាំបាច់សម្រាប់ការផលិត, ជួសជុលឡើងវិញ និងមុខងារនៃ DNA។
៤. សប្តាហ៍ទី ២៩ ដល់ សប្តាហ៍ទី ៤០
ទន្ទឹមនឹងអ្នកចាប់ផ្ដើមខិតជិតដល់សប្តាហ៍ចុងក្រោយនៃការមានផ្ទៃពោះ នោះអ្វីដែលអ្នកត្រូវការបន្ថែមក្នុងរបបអាហារប្រចាំថ្ងៃ គឺមានច្រើនណាស់។ អាហារមានផ្ទុកវីតាមីន K ដូចជា បន្លែបៃតង, ផ្កាខាត់ណាខៀវ, ស្ពៃក្ដោប ជួយដល់ការកកឈាម។ ទឹកដោះគោស្រស់, ឈីស, សណ្ដែកបាយ, ផ្លែបឺរ ជាប្រភពដ៏ល្អនៃជាតិកាល់ស្យូម និងម៉ាញ៉េស្យូមជួយដល់ឆ្អឹង។ គ្រាប់ធញ្ញជាតិ, ស៊ុត និងបាយអង្ករសម្រូប មានផ្ទុកសម្បូរទៅដោយជាតិសេលេញ៉ូមល្អសម្រាប់មុខងារសួត។
៥. ក្រោយសម្រាល
ការថែរក្សាសុខភាពអោយបានត្រឹមត្រូវដិតដល់ក្រោយពេលសម្រាល គឺសំខាន់ណាស់។ អ្វីដែលអ្នកនឹងទទួលទានពេលនេះអាចជះឥទ្ធិពលដល់ទារកតាមរយៈទឹកដោះ។ លើសពីនេះទៅទៀត អ្នកចាំបាច់ត្រូវរក្សាសុខភាពអោយបានល្អប្រសើរផងដែរ។ គ្រាប់ល្ង, គ្រាប់អាល់ម៉ុន និងគ្រាប់ស្វាយចន្ទី ជាអ្វីដែលអ្នកគួររួមបញ្ចូលក្នុងរបបអាហារប្រចាំថ្ងៃដើម្បីកាត់បន្ថយការរលាក។ អាហារមានផ្ទុកសម្បូរទៅដោយសារធាតុ Beta-carotene រួមមានការ៉ុត និងដំឡូងផ្អែមជាដើមជួយបង្កើនសុខភាពភ្នែកទារក។ អាហារមានផ្ទុកកាឡូរីខ្ពស់ក៏សំខាន់គួរអោយកត់សម្គាល់! ស្ត្រីត្រូវការកាឡូរីបន្ថែមប្រមាណ
៣០០ កាឡូរីជាប្រចាំរាល់ថ្ងៃកំឡុងពេលប៉ុន្មានសប្តាហ៍ដំបូងនៃការបំបៅដោះកូន ដូច្នេះកុំព្យាយាមបង្អត់អាហារខ្លួនឯង៕