ស្រ្តីវ័យចំណាស់ដែលមានហ្សែនធ្វើឲ្យពួកគេងាយនឹងធាត់ជ្រុលប្រហែលជាទទួលបានផាសុកភាពឡើងវិញចំពោះការរកឃើញដ៏ថ្មីៗដែលប្រាប់ថា ការហាត់ប្រាណអាចទប់ស្កាត់ការប្រឈមមុខនេះបាន។ សម្រាប់ការសិក្សានេះ អ្នកស្រាវជ្រាវជាច្រើនបានវិភាគទៅលើទិន្នន័យមកពីស្រ្តីច្រើនជាង ៨២០០នាក់ អាយុពី ៧០ ទៅ៧៩ឆ្នាំ ដែលរស់នៅក្នុងប្រទេសអឺរ៉ុប។ 

អ្នកស្រាវជ្រាវបានរកឃើញថា ហ្សែនមានឥទ្ធិពលទៅលើសន្ទស្សន៍ទម្ងន់ធៀបនឹងកម្ពស់ BMI របស់មនុស្សយើង ហើយវាកាន់តែមានឥទ្ធិពលខ្លាំងបំផុតចំពោះស្រ្តីដែលរស់នៅអសកម្ម ប៉ុន្តែវានឹងមានឥទ្ធិពលខ្សោយបំផុតវិញចំពោះស្រ្តីដែលមានសកម្មភាពផ្លូវកាយច្រើន។ 

ប្រធានដឹកនាំការសិក្សា Healther Ochs-Balcom បាននិយាយថា សារនេះគឺចង់និយាយថា កត្តាហ្សែនដែលធ្វើឲ្យប្រឈមនឹងការធាត់ជ្រុលរបស់អ្នកគឺមិនមែនជាកំណត់ជោគវាសនារបស់អ្នកទៀតឡើយ។ ប្រធានដឹកនាំនេះ គឺជាសាស្រ្តាចារ្យរងខាងផ្នែក Epidemiology and Environmental Health នៅឯសាកលវិទ្យាល័យ Buffalo ក្នុងទីក្រុងញ៉ូយក។ គាត់បានធ្វើសេចក្តីប្រកាសព័ត៌មានថា ជម្រើសដែលយើងបង្កើតសម្រាប់ជីវិតរស់នៅសព្វថ្ងៃ ដើរតួនាទីធំណាស់សម្រាប់សុខភាពរបស់យើង។ កាលណាអ្នកអាយុកាន់តែច្រើន អ្នកក៏អាចយកឈ្នះជោគវាសនានៃការធាត់ជ្រុលបាន តាមរយៈការហាត់ប្រាណ។ 

សម្រាប់មនុស្សចាស់ ការហាត់ប្រាណគឺជារឿងសំខាន់មួយសម្រាប់បង្ការការស្វិតសាច់ដុំដែលអាចជួយបន្ថយការប្រឈមនឹងការដួលបាន។ ជាមួយគ្នានេះដែរ វាក៏មានប្រយោជន៍ផ្សេងៗជាច្រើនទៀតផងដែរសម្រាប់មនុស្សចាស់ៗហាត់ប្រាណ។ ការសិក្សានេះត្រូវបានចុះផ្សាយផ្សាយក្នុងសារព័ត៌មាន Menopause៕