តម្រងនោមដើរតួនាទីយ៉ាងសំខាន់នៅក្នុងការរក្សាសុខភាពរាងកាយល្អប្រសើរ។ វាជួយផលិតកោសិកាគ្រាប់ឈាមក្រហម, គ្រប់គ្រងកម្រិតនៃសម្ពាធឈាម, បន្សាបជាតិពុលសរីរាង្គខាងក្នុង, បញ្ចេញជាតិទឹក ឬសារធាតុរាវដែលលើស, បញ្ចេញកាកសំណល់តាមរយៈទឹកនោម, ច្រោះឈាម, ផលិតអ័រម៉ូន និងគ្រប់គ្រងកម្រិតនៃជាតិរ៉ែចាំបាច់ទាំងអស់ក្នុងឈាម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ជំងឺតម្រងនោមភាគច្រើនអាចកើតឡើងដោយគ្មានបង្ហាញរោគសញ្ញាណាមួយឡើយដែលធ្វើអោយទម្រាំតែដឹង គឺហួសពេល
ឈានដល់ដំណាក់កាលនៃជំងឺរ៉ាំរ៉ៃបាត់ទៅហើយ។ ដូច្នេះហើយទើបការចាប់អារម្មណ៍ ឬចេះកត់
សម្គាល់នូវរោគសញ្ញានៃជំងឺក្នុងតំណាក់កាលដំបូងមានភាពសំខាន់ណាស់។ ថ្ងៃនេះវេបសាយសុខភាព
Health.com.kh នឹងបង្ហាញអោយដឹងពីរោគសញ្ញាមួយចំនួនដែលអាចកើតឡើងនៅពេលតម្រង
នោមមានបញ្ហា ៖

១. ការរមាស់, ឡើងរោលកន្ទួលក្រហម និងភាពស្ងួតនៃស្បែក

តម្រងនោមធ្វើការជាប់ជាប្រចាំដើម្បីកម្ចាត់សារធាតុគ្រោះថ្នាក់ផ្សេងៗ ហើយក៏ចូលរួមក្នុងការផលិត
ឈាម និងរក្សាតុល្យភាពនៃជាតិរ៉ែរបស់រាងកាយផងដែរ។ ភាពស្ងួត, ភាពរមាស់នៃស្បែក និងការឡើងរោលកន្ទួលក្រហម រួមជាមួយបញ្ហាស្បែកមិនប្រក្រតីផ្សេងទៀតដែលកើតឡើងដោយគ្មានមូលហេតុច្បាស់លាស់អាចចង្អុលបង្ហាញពីដំណើរខុសធម្មតានៃតម្រងនោម។ រោគសញ្ញាទាំងនេះអាចនឹង
លេចឡើងដោយសារតែបរិមាណការកើនឡើងនូវជាតិផូស្វ័រច្រើនហួសក្នុងរាងកាយ ខណៈដែលតម្រងនោមមិនអាចដំណើរមុខងារប្រក្រតី។

២. មានអារម្មណ៍ត្រជាក់មិនថាស្ថិតក្នុងសីតុណ្ហភាពបែបណា

អារម្មណ៍ព្រឺត្រជាក់, អស់កម្លាំង, ពិបាកដកដង្ហើម, គេងមិនលក់ និងខ្សោយកម្លាំង សុទ្ធតែជារោគសញ្ញានៃជំងឺខ្វះគ្រាប់ឈាមក្រហម។ បញ្ហាតម្រងនោមអាចពន្យឺតការផលិតអ័រម៉ូន erythropoietin ដែលមាននាទីរំញោចការផលិតកោសិកាគ្រាប់ឈាមក្រហមក្នុងខួរឆ្អឹង។ ហើយកង្វះគ្រាប់ឈាមក្រហមរ៉ាំរ៉ៃអាចជារោគសញ្ញាមួយនៃបញ្ហាតម្រងនោមដំណើរការមិនប្រក្រតី។ ក្នុងករណីមួយចំនួនជំងឺខ្វះគ្រាប់ឈាមក្រហម គឺបណ្ដាលមកពីបញ្ហាតម្រងនោម និងកង្វះអ័រម៉ូន erythropoietin។

៣. ក្លិនខ្យល់ដង្ហើមមិនល្អ

ការពិតទៅបញ្ហាក្លិនខ្យល់ដង្ហើមមិនល្អអាចបណ្ដាលមកពីជំងឺផ្សេងៗជាច្រើន ប៉ុន្តែមួយក្នុងចំណោមនោះ គឺរលាកតម្រងនោម។ នៅពេលមនុស្សម្នាក់មានបញ្ហាតម្រងនោម កាកសំណល់មេតាប៉ូលីកមិនអាចចាកចេញពីរាងកាយបានលឿនដូចធម្មតាឡើយ ដូច្នេះវានឹងត្រូវហូរចូលទៅដល់បំពង់ក្រពះពោះ
វៀន ហើយបណ្ដាលអោយក្នុងមាត់មានរសជាតិដូចលោហៈ និងធុំក្លិនដូចអាម៉ូញ៉ាក់។

៤. ការហើម

ការហើម គឺបណ្ដាលមកពីបរិមាណជាតិទឹកច្រើនហួសក្នុងចន្លោះរវាងកោសិកាពីមួយទៅមួយ នៅពេលតម្រងនោមដំណើរការមុខងារខុសធម្មតាមិនអាចបញ្ចេញជាតិទឺក ឬសារធាតុរាវដែលលើសចេញពីរាងកាយបាន។ ដំបូងរោគសញ្ញានេះលេចឡើងត្រង់ប្រអប់ជើង, មុខ និងត្របកភ្នែក ប៉ុន្តែក្រោយមកក៏រាលដាលពេញរាងកាយតែម្ដង។ ការហើមអាចវិវត្តន៍លឿនណាស់ ហើយជាញឹកញយអាចអមមកជាមួយនូវអាការៈ មុខស្លេកស្លាំង និងស្បែកស្ងួតទោះបីសីតុណ្ហភាពស្បែកមិនប្រែប្រួលក៏ដោយ។ ហើយប្រសិនបើអ្នកសង្កត់ត្រងកន្លែងហើម អ្នកនឹងឃើញស្នាមមួយដែលនឹងបាត់ទៅវិញក្នុងរយៈពេលត្រឹមតែប៉ុន្មានវិនាទីប៉ុណ្ណោះ។ រោគសញ្ញាផ្សេងទៀតអាចជា ការងងុយគេងមិនឈប់, ឈឺក្បាលប្រកាំង, ការឈឺចាប់ក្នុងឆ្អឹង និងសាច់ដុំ។

៥. ក្ដៅខ្លួនខ្លាំង និងឈឺខ្នង

ការឈឺខ្នងខ្លាំងអមជាមួយអាការៈក្ដៅខ្លួនខ្លាំង, ឈឺនោមញឹក និងជួនកាលក្អួតផងនោះ គឺជារោគសញ្ញាធ្ងន់ធ្ងរដែលអាចចង្អុលបង្ហាញពីបញ្ហាតម្រងនោមណាមួយកំពុងកើតឡើងហើយ។ ប្រសិនបើអ្នកជួបប្រទះនូវរោគសញ្ញាទាំងអស់នេះ អ្នកគួរប្រញាប់ទៅជួបពិនិត្យជាមួយគ្រូពេទ្យជំនាញភ្លាម។

៦. ការឈឺចាប់រមួលសាច់ដុំរ៉ាំរ៉ៃ

ការឈឺចាប់រមួលសាច់ដុំរ៉ាំរ៉ៃអាចចង្អុលបង្ហាញពីអតុល្យភាពនៃអេឡិចត្រូលីត្រក្នុងរាងកាយ។ ជាតិម៉ាញ៉េស្យូម និងប៉ូតាស្យូម សុទ្ធតែជាអេឡិចត្រូលីត្រដែលដើរតួនាទីយ៉ាងសំខាន់ក្នុងមុខងារនៃសាច់ដុំ រួមទាំងការប្រែប្រួលផ្សេងៗដែលអាចបណ្ដាលអោយកើតមានបញ្ហារមួលសាច់ដុំ។ ទោះជាយ៉ាងណាក៏ដោយ មិនមែនតែបញ្ហានៃកង្វះជាតិម៉ាញ៉េស្យូម និងប៉ូតាស្យូមប៉ុណ្ណោះទេដែលបង្កបញ្ហារមួលសាច់ដុំ ប៉ុន្តែក៏បណ្ដាលមកពីបញ្ហាសារធាតុរាវច្រើនលើសផងដែរ។ ហើយការរលាកនៃតម្រងនោមដែលសង្កត់លើចុងសសៃប្រសាទនៃសាច់ដុំជុំវិញនឹងអាចនាំអោយមានអារម្មណ៍ឈឺចាប់៕