ថ្វីបើការស្រាវជ្រាវរកឃើញថា មនុស្សស្រីត្រូវការសិចច្រើនដូចបុរសដែរក៏ដោយ ប៉ុន្តែតើមានអ្វីកើតឡើងទៅបើសិនជានាងបាត់បង់ចំណង់ផ្លូវភេទ? ការកង្វះទំនាក់ទំនង ឬការទាក់ទាញក៏ជាដើមហេតុមួយដែរ។ យ៉ាងណាមិញ សម្រាប់ស្រ្តីមួយចំនួន វាអាចទាក់ទងនឹងជំងឺច្រើនជាងដែលជាហេតុនាំឲ្យពួកគេលែងមានអារម្មណ៍ផ្លូវភេទទៀត។ 

មុខងារផ្លូវភេទស្រ្តីរងការប៉ះពាល់

ការខូចមុខងារផ្លូវភេទនេះកើតឡើងលើស្រ្តីប្រមាណពី ១៩ ទៅ ៥០ភាគរយ ហើយវាក៏ជារឿងដែលត្រូវយកចិត្តទុកដាក់ដែរ។ រឿងនេះត្រូវបានចែកចេញជាពីរប្រភេទគឺ ទាក់ទងនឹងចិត្តសាស្រ្ត និងផ្លូវកាយ។ ចិត្តសាស្រ្តមានដូចជា ការខ្លាញឃើញលទ្ធផលមិនធម្មតាក្រោយពីធ្វើ Pap Smears ឬការស៊ូកបញ្ចូលលិង្គ។ រាងកាយទាក់ទងនឹងការឈឺចាប់ក្នុងពេលរួមភេទ។ ជំងឺ Vaginismus ធ្វើឲ្យសាច់ដុំទ្វារមាសកន្ត្រាក់ជាប់ ដែលធ្វើឲ្យពិបាកដល់ការរួមភេទ។ រយៈពេលយូរៗទៅ ស្រ្តេសនឹងគ្របដណ្តប់លើការចាប់អារម្មណ៍លើផ្លូវភេទដាច់មិនខាន។ 

ខូចសរសៃប្រសាទដោយសារជំងឺទឹកនោមផ្អែម

ការខូចសរសៃប្រសាទត្រូវបានគេស្គាល់យ៉ាងច្បាស់ថាជាផលវិបាករបស់ជំងឺទឹកនោមផ្អែម។ សម្រាប់ស្រ្តី រឿងនេះអាចជាដើមហេតុនាំឲ្យស្រ្តីមិនឆ្លើយតបខាងផ្លូវភេទ និងថយចុះទឹករំអិលក្នុងទ្វារមាស ដែលជាហេតុនាំឲ្យលែងចាប់អារម្មណ៍ខាងផ្លូវភេទទៀត។ 

ឈឺសន្លាក់

ស្រ្តីដែលមានជំងឺរលាកសន្លាក់ប្រហែលជាមានអារម្មណ៍មិនមានផាសុកភាព ឬអាមាសលើការរួមភេទ ដូច្នេះគឺងាយនឹងលែងចាប់អារម្មណ៍លើរឿងនេះណាស់។ តាមពិតទៅ អ្នកជំងឺរលាកសន្លាក់ពី ៣១ ទៅ ៧៦ភាគរយដែលរលាកសន្លាក់ប្រាប់ថា ពួកគេមានបញ្ហាខាងផ្លូវភេទ។ រឿងនេះអាចដោយសារតែការអស់កម្លាំង និងឈឺចាប់តែម្តង។ 

បញ្ហាលើផ្លូវទឹកម៉ូត្រ

វាមិនមានអ្វីដែលត្រូវភ្ញាក់ផ្អើលទេថា បញ្ហានៅផ្លូវទឹកម៉ូត្រមានទំនាក់ទំនងយ៉ាងខ្លាំងនឹងការខូចមុខងារផ្លូវភេទ។ រឿងនេះមានដូចជា ការលេចនោមដោយមិនដឹងខ្លួន ការបង្ករោគ ឬការឈឺចាប់។ ការលេចនោមដោយមិនដឹងខ្លួនអាចធ្វើឲ្យថយចុះទឹករំអិល និងចំណង់ផ្លូវភេទបាន។ 

មានជំងឺបេះដូង

វាមិនទាន់មានការស្រាវជ្រាវច្រើនទៅលើទំនាក់ទំនងរវាងបញ្ហាផ្លូវភេទរបស់ស្រ្តី និងជំងឺបេះដូងឡើយ។ ជំងឺបេះដូងអាចនាំឲ្យមានបញ្ហាផ្លូវភេទកាន់តែខ្លាំង ដោយសារតែការខូចខាតសរសៃប្រសាទ រហូតដល់បន្ថយលំហូរឈាមទៅប្រដាប់ភេទ។ រឿងនេះក៏កើតឡើងលើបុរសដូចគ្នាដែរ។ 

រ៉ាំងរដូវ

ការរ៉ាំងរដូវគឺជាមូលហេតុញឹកញាប់មួយផ្សេងទៀតដែលធ្វើឲ្យស្រ្តីមិនចូលចិត្តការរួមភេទ។ ជាមធ្យមការរ៉ាំងរដូវកើតឡើងនៅអាយុ ៥១ឆ្នាំ ប៉ុន្តែវាក៏អាចកើតឡើងចាប់ពីអាយុ ៤០ ទៅ ៥៥ឆ្នាំដែរ។ ក្នុងពេលនេះដែរ អ័រម៉ូនអេស្រ្តូជែននឹងថយចុះ ហើយវាក៏ជាដើមហេតុនាំឲ្យស្រ្តីមានអារម្មណ៍មិនល្អ និងបាក់ទឹកចិត្ត រហូតដល់ចុះខ្សោយខ្លាំងទាក់ទងនឹងរឿងផ្លូវភេទ។ 

ទាក់ទងនឹងការប្រើថ្នាំធ្វើឲ្យខ្សោយផ្លូវភេទ

ថ្នាំប្រហែលជាធ្វើឲ្យផ្លូវភេទចុះខ្សោយ ឬទ្វារមាសស្ងួត។ ថ្នាំព្យាបាលជំងឺផ្លូវចិត្តដូចជា Selective Serotonin Reuptake Inhibitors (SSRIs) និង Tricyclic Antidepressants មានទំនាក់ទំនងធ្វើឲ្យចុះខ្សោយខាងចំណង់ផ្លូវភេទដែរ។ ថ្នាំពន្យាកំណើត និងបញ្ចុះសម្ពាធឈាមក៏ប្រហែលជាមានផលរំខានស្រដៀងគ្នាដែរ៕