ភាគច្រើននៃពួកយើងនៅពេលឃើញរបស់មួយចំនួន ដូចជា ចិញ្ចៀនដ៏ស្រស់ស្អាត  កាបូបលុយដែលពោរពេញទៅដោយប្រាក់ ឬឧបករណ៍ស្តាប់តន្រ្តីឥតខ្សែ ។ល។ ជ្រុះនៅលើដីហើយនោះ ពិតណាស់ គឺច្បាស់ជាមានអារម្មណ៍ចង់រើសវាឡើង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែទោះជាយ៉ាងនេះក្តី យើងមិនគួររើស ឫប៉ះពាល់របស់អស់ទាំងនេះឡើយ ក៏ព្រោះនៅពេលខ្លះវាអាចនឹងផ្តល់ផលអាក្រក់មកវិញយ៉ាងនឹកស្មានមិនដល់ ទាំងចំពោះសុខភាព និងការរស់នៅ។ ថ្ងៃនេះវេបសាយសុខភាព Health.com.kh នឹងបង្ហាញអោយដឹងពីវត្ថុ ឬរបស់ប្រចាំថ្ងៃមួយចំនួនដែលអ្នកមិនគួររើសពីដី ៖

១. កាបូបលុយ និងស្រោមសំបុត្រ (ដាក់លុយ)

អ្នកត្រូវប្រុងប្រយ័ត្នបំផុតចំពោះសកម្មភាព និងអំពើរបស់អ្នក ទោះបីជាអំពើដែលធ្វើឡើងនោះ គឺក្នុងគោលបំណងល្អក៏ដោយ។ ឧទាហរណ៍ អ្នកឃើញរបស់មួយជ្រុះលើដីហើយចង់យកវាទៅប្រគល់ឱ្យសមត្ថកិច្ច ចំពោះករណីខ្លះវាអាចជាល្បិចកលទុច្ចរិតរបស់នរណាម្នាក់ដែលមានបំណងចង់ធ្វើបាបឱ្យយើងធ្លាក់ក្នុងអន្ទាក់របស់គេ ដោយនៅពេលអ្នករើសកាបូបនោះឡើង គឺអាចមានជនណាម្នាក់លេចមុខមកធ្វើជាសាក្សី ហើយទាមទារចំណែកពាក់កណ្តាលពីលុយដែលអ្នករើសបាន ហើយបន្ទាប់មកទៀត គឺអាចនឹងមានមនុស្សម្នាក់ទៀតចេញមកអះអាងថាគេជាម្ចាស់កាបូប ឬស្រោមសំបុត្រដែលមានសុទ្ធតែលុយនោះ ហើយចោទអ្នកថាជាចោរលួចរបស់គេក៏ថាបាន។ ដូច្នេះនៅពេលអ្នកទៅណាមក
ណា ហើយមានអារម្មណ៍ថាមានជនដែលគួរឱ្យសង្ស័យកំពុងឃ្លាំមើល ឫដើរតាម សូមកុំរើសរបស់អ្វីដែលអ្នកឃើញជ្រុះឱ្យសោះ។

២. គ្រឿងអលង្ការដែលមើលទៅមានតម្លៃ

នេះក៏ជាល្បិចចាស់កំរិលមួយផងដែរ ពិតណាស់នៅតាមដងផ្លូវអ្នកអាចនឹងជួបបុគ្គលណាម្នាក់ស្លៀកពាក់ស្អាតបាតបែបហ៊ឺហារហៅឱ្យអ្នកមើលចិញ្ចៀនស្រស់ស្អាតមានតម្លៃមួយវង់ដែលជ្រុះនៅលើដី បន្ទាប់មកជននោះនឹងសម្តែងហាក់ដូចមិនចង់បានចិញ្ចៀន ប៉ុន្តែគេបែរជាទាមទារ​នៅការតបស្នងខ្លះៗពីអ្នកវិញ​ សម្រាប់ការដែលគេបានប្រាប់អ្នកអំពីចិញ្ចៀនដែលជ្រុះ។ ជាលទ្ធផល​ គឺអ្នកបានត្រឹមខាតបង់ឥតប្រយោជន៍ដោយយកប្រាក់របស់ខ្លួនទៅប្រគល់ឱ្យជនបោកប្រាស់នោះ ដើម្បីដោះដូរជាមួយចិញ្ចៀនពេជ្រក្លែងក្លាយទៅវិញ។

៣. ឧបករណ៍ស្តាប់តន្រ្តី ឫកាសទូរស័ព្ទ

វាសឹងតែមិនចាំបាច់និយាយឡើយ ក៏ព្រោះអ្នកនឹងមិនងាយឃើញរបស់ដូចជា ច្រាសដុសធ្មេញ ឫ
កន្សែងពោះគោ ជ្រុះផ្តេសផ្តាសនៅតាមផ្លូវនោះទេ ប៉ុន្តែអ្នកអាចនឹងឃើញរបស់ម្យ៉ាងដែលគេប្រើប្រាស់វាញឹកញាប់ក្នុងជីវភាពប្រចាំថ្ងៃ គឺឧបករណ៍ស្តាប់តន្រ្តី​ ឬកាសទូរស័ព្ទ។ អ្វីដែលយើងចង់អោយអ្នកដឹង គឺមានមេរោគបាក់តេរីជាច្រើនដែលអ្នកមើលមិនឃើញប្រមូលផ្តុំគ្នា ឬជាប់លើឧបករណ៍ស្តាប់តន្រ្តីដែលអ្នករើសបាននោះ។ ដូច្នេះអ្នកគួរចេះប្រុងប្រយ័ត្ន ទោះបីជាវត្ថុដែលអ្នករើសបាននោះមើល
ទៅហាក់ដូចជាថ្មីយ៉ាងណាក៏ដោយ ប៉ុន្តែវាអាចនឹងបង្កផលអាក្រក់ផ្សេងៗ ឫជំងឺឆ្លងដល់ត្រចៀក។

៤. កាំបិត ឫវត្ថុផ្សេងៗដែលអាចប្រើជាអាវុធបាន

បើសិនជាអ្នកមិនចង់មានរឿងជាមួយប៉ូលីស ឬនាំទុក្ខបញ្ហាដាក់ខ្លួននោះទេ ចូរជៀសវាងការរើសកាំបិត ឬវត្ថុផ្សេងៗដែលអាចប្រើជាអាវុធបាននៅពេលឃើញជ្រុះតាមដងផ្លូវ។ វត្ថុទាំងនេះអាចជាអន្ទាក់របស់ជនទុច្ចរិតណាមួយ ហើយម្យ៉ាងទៀតវាក៏អាចជារបស់ដែលត្រូវបានគេយកទៅប្រព្រឹត្តបទល្មើសអ្វីមួយ ឧទាហរណ៍ដូចជា  កាំភ្លើង វាមិនអាចជារបស់ដែលងាយនឹងឃើញជ្រុះតាមដងផ្លូវឡើយ ប៉ុន្តែកាំបិតវិញ គឺអាចនឹងឧស្សាហ៍ឃើញបន្តិច។ ហើយអ្វីដែលគួរប្រយ័ត្នបំផុតនោះ គឺនៅពេលចាប់កាន់ ឬរើសវត្ថុទាំងអស់នេះ ស្នាមម្រាមដៃរបស់អ្នកងាយនឹងជាប់ដិតលើវាណាស់។

៥. ម្ជុល

មិនថាស្ថិតក្នុងកាលៈទេសៈណាក៏ដោយ ចូរកុំរើសម្ជុល ឬសឺរាុំងដែលគេបោះចោលនៅតាមផ្លូវដើរ ឫទីណាជិតកន្លែងស្នាក់នៅរបស់អ្នកអោយសោះ។ ចំពោះវត្ថុដែលមុតស្រួចផ្សេងទៀតក៏ដូចគ្នា ក៏ព្រោះអ្នកអាចនឹងងាយទទួលរងនូវហានិភ័យគ្រោះថា្នក់ ឬការឆ្លងមេរោគផ្សេងៗពីវត្ថុទាំងនោះដោយមិនងដឹងខ្លួន។

៦. ស៊ីមកាតទូរស័ព្ទ

អ្នកមិនគួររើសស៊ីមទូរស័ព្ទដែលជ្រុះតាមផ្លូវ ឬកន្លែងណាមួយមកដាក់ប្រើឡើយ ក៏ព្រោះវាអាចជាស៊ីមដែលត្រូវបានចោរលួចទូរស័ព្ទបោះចោលក៏អាចថាបាន ហើយក្នុងករណីនេះអ្នកអាចនឹងត្រូវបានម្ចាស់គេសួរនាំ ឫទទួលការស៊ើបសួរពីប៉ូលីសជាក់ជាមិនខាន៕