ពលរដ្ឋ និងអ្នកប្រើប្រាស់ទូទៅច្រើនរអ៊ូរទាំពីសេវាអ៊ីនធឺណិតតាមខេត្ត និងជនបទឆ្ងាយៗដើរយឺត។ តាមការលើកឡើងរបស់រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ បានបញ្ជាក់ថា អ៊ីនធឹណិតល្បឿនលឿន មិនទាន់អាចគ្រប់ដណ្តប់ប្រើប្រាស់បានទូលំទូលាយទេ ជាពិសេសតាមបណ្តាខេត្តនិងជនបទដាច់ស្រយាល។
ក្នុងពិធីប្រកាសតែងតាំងប្រធានមន្ទីរប្រៃសណីយ៍ និងទូរគមនាគមន៍ខេត្តសៀមរាប កាលពីថ្ងៃទី១២ ខែមិថុនា ឆ្នាំ២០១៨ រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ លោក ត្រាំ អ៊ីវតឹក បានឲ្យដឹងថា សេវាអ៊ីនធឺណិតល្បឿនលឿន 4G នៅតាមជនបទគ្របដណ្តប់បានប្រហែល ១៦% និងទីក្រុងនិងទីប្រជុំជនបានប្រហែល ៥៧%។ ចំពោះប្រព័ន្ធសេវាអ៊ីនធើណេត 3G វិញ នៅតាមទីក្រុង ខណ្ឌ នៅទូទាំងប្រទេស មាន ៦០%។
តាមរដ្ឋមន្រ្តី រដ្ឋាភិបាលនឹងដាក់សន្ទស្សន៍នៅឆ្នាំ២០២០ ប្រព័ន្ធអ៊ីនធើណេតល្បឿនលឿននៅតាមទីក្រុង នឹងមានដល់ ១០០% និងនៅតាមជនបទមាន ៨០%។
កម្ពុជា នឹងមានប្រព័ន្ធសេវាទូរសព្ទអត់ខ្សែ១០០% និងអ៊ីនធើណេត ៨០% នៅឆ្នាំ២០២០។ នៅឆ្នាំ២០២០ ប្រព័ន្ធសេវាទូរសព្ទអត់ខ្សែ នឹងមានសេវាគ្របដណ្ដប់ដល់ទីប្រជុំជនគ្រប់ទីកន្លែង១០០% និងប្រព័ន្ធអ៊ីនធើណេតល្បឿនលឿនអាចគ្របដណ្តប់នៅទូទាំងប្រទេស ៨០%៕
ប្រភព៖ sabay.com.kh