យោងតាមលទ្ធផលនៃការស្រាវជ្រាវមួយនៅសិង្ហបុរីចេញផ្សាយកាលពីខែមីនាកន្លងទៅ បានឲ្យដឹងថាតាក់ស៊ីពណ៌លឿង មានអត្រាជួបគ្រោះថ្នាក់ចរាចរណ៍តិចជាងតាក់ស៊ីដែលមានពណ៌ខៀវ។
ការស្រាវជ្រាវធ្វើឡើងដោយក្រុមអ្នកស្រាវជ្រាវនៃសាកលវិទ្យាល័យជាតិសិង្ហបុរី (National University of Singapore)។ លទ្ធផលនៃការស្រាវជ្រាវរបស់ពួកគេ គឺផ្អែកទៅលើការវិភាគអស់រយៈពេល ៣ ឆ្នាំនូវទិន្នន័យអំពីតាក់ស៊ី (ពណ៌លឿងជាង ៤០០០ គ្រឿង និងពណ៌ខៀវជាង ១២,៥០០ គ្រឿង) អ្នកបើកបរ និងគ្រោះថ្នាក់ចរាចរណ៍នៃយានជំនិះប្រភេទនេះនៅប្រទេសសិង្ហបុរី។
ក្រោយវិភាគទិន្នន័យ អ្នកស្រាវជ្រាវបានរកឃើញថា ជារៀងរាល់ខែ ក្នុងចំណោមតាក់ស៊ី ១ ពាន់គ្រឿង តាក់ស៊ីពណ៌លឿងបានជួបប្រទះគ្រោះថ្នាក់ចរាចរណ៍ ៦ ដងតិចជាងតាក់ស៊ីពណ៌ខៀវ។ លទ្ធផលនៃការស្រាវជ្រាវបានគូសបញ្ជាក់ទៀតថា អ្នកដែលប្រើប្រាស់តាក់ស៊ីពណ៌លឿង មានអត្រាជួបគ្រោះថ្នាក់ចរាចរណ៍ ៩ ភាគរយតិចជាង អ្នកដែលប្រើប្រាស់តាក់ស៊ីពណ៌ខៀវ។
យោងតាមការសិក្សាមួយនេះ បើតាក់ស៊ីពណ៌ខៀវនៅសិង្ហបុរីអាចប្ដូរទៅជាពណ៌លឿងទាំងអស់ វាអាចជួយកាត់បន្ថយគ្រោះថ្នាក់ចរាចរណ៍ប្រមាណ ៩១៧ ករណី ដែលនេះអាចជួយសន្សំប្រាក់ឲ្យប្រទេសមួយនេះដល់ទៅប្រមាណ ១,៤ លានដុល្លារសហរដ្ឋអាមេរិកក្នុងមួយឆ្នាំៗ។
បើតាមសាស្ត្រាចារ្យ Ho Teck Hua អនុប្រធានសាកលវិទ្យាល័យជាតិសិង្ហបុរីទទួលបន្ទុកផ្នែកស្រាវជ្រាវ និងបច្ចេកវិទ្យា ហើយក៏ជាជនបង្គោលក្នុងការសិក្សាស្រាវជ្រាវខាងលើ បានលើកឡើងថា តាក់ស៊ីមានពណ៌លឿង ងាយស្រួលក្នុងការមើលឃើញជាងពណ៌ខៀវ តាំងពេលថ្ងៃ និងពេលយប់ ដែលអាចជាហេតុដែលនាំឲ្យជួបអត្រាគ្រោះថ្នាក់ចរាចរណ៍ទាបជាង៕
ប្រភព៖ sabay.com.kh