ការមាន ឬក្រគឺឋិតលើខ្លួនអ្នក ឋិតលើសកម្មភាពរបស់អ្នក ព្រោះមានតែខ្លួនឯងទេដែលអាចសម្រេចបានជោគវាសនារបស់ខ្លួន គ្មាននរណាអាចសម្រេចបានឡើយ ដូចនេះតើមានទង្វើអ្វីខ្លះដែលអាចធ្វើឱ្យអ្នកក្លាយជាអ្នកបម្រើរបស់គេ?
1. ការមិនព្រមសាកល្បងអ្វីដែលថ្មី ហើយតែងតែគិតថាការងារទាំងអស់សុទ្ធតែលំបាក សុទ្ធតែស្មុគស្មាញ ដូចនេះតែងតែពន្យារដល់ស្អែកហើយស្អែកទៀត មិនព្រមបំពេញឡើយ។
2. ការមិនមានគោលជំហររបស់ខ្លួន តែងតែស្តាប់តាមពាក្យសម្តីរបស់អ្នកដទៃ មិនជឿជាក់ខ្លួនឯង មិនហ៊ានសម្រេចចិត្តដោយខ្លួនឯងទេ មានរឿងអ្វីតែងតែសួរយោបល់អ្នកដទៃ។
3. ការរៀនដើម្បីប្រលងជាប់ តែមិនមែនដើម្បីមកអនុវត្តជាក់ស្តែង មានន័យថាមិនព្រមចេញពីបន្ទប់រៀនដើម្បីស្វែងរកបទពិសោធន៍ទេ តែបែរជានៅតែមួយកន្លែង ព្រោះខ្លាចពិភពខាងក្រៅ។
4. ការមិនព្រមអានអ្វីដែលថ្មី សុខចិត្តយកពេលវេលាទៅធ្វើរឿងដែលឥតប្រយោជន៍ នោះនៅពេលដែលចូលចំណោមអ្នកដទៃគឺចូលមិនចុះឡើយ ព្រោះគ្មានរឿងនិយាយជាមួយគេ ដោយសារតែចំណេះតិចពេក ការយល់ដឹងពីពិភពខាងក្រៅតិចពេក។
5. ការមិនចេះងឿឆ្ងល់នៅពេលដែលរៀន ឬពេលដែលអានសៀវភៅ គ្មានគំនិតច្នៃប្រឌិត ធ្វើការងារងាប់ក្រឡា។
6. ការមិនចេះចោតសំនួរសួរខ្លួនឯងថាតើខ្លួនឯងចង់បានអ្វី ចង់ធ្វើអ្វី គ្មានគោលដៅច្បាស់លាស់ ចេះតែដើរ។
7. ការមិនចេះទទួលស្គាល់ការពិត មិនចេះទទួលស្គាល់កំហុសរបស់ខ្លួន មិនចេះរៀនពីកំហុសរបស់ខ្លួន ចេះតែគេចវេសពីបញ្ហាដែលកើតឡើង ដោយមិនរៀនដោះស្រាយ៕