ឪឡឹកជាផ្លែឈើមួយប្រភេទដែលសម្បូរទៅដោយជាតិទឹកជួយអោយអ្នកឆ្អែតបានយូរ និងបំបាត់ភាពស្រេកទឹកបានឆាប់រហ័ស។ ផ្លែឈើនេះក៏ជាប្រភពដ៏ប្រសើរនៃសារធាតុ carotenoid phytonutrient ឬ lycopene ដែលជួយរក្សាសុខភាពសសៃឈាមបេះដូង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ភាគច្រើននៃពួកយើងសុទ្ធតែដឹងហើយថាឪឡឹកមានច្រើនពណ៌ ប៉ុន្តែពណ៌ក្រហម គឺទទួលបានការពេញនិយមជាងគេ។ ទោះជាយ៉ាងណា ឪឡឹកពណ៌លឿងក៏អាចផ្ដល់អត្ថប្រយោជន៍ល្អៗចំពោះសុខភាពផងដែរ។ ដូច្នេះថាតើឪឡឹកពណ៌មួយណាទៅដែលអ្នកគួរជ្រើសរើសទទួលទាន? ខាងក្រោមវេបសាយសុខភាព Health.com.kh នឹងបង្ហាញអោយដឹងពីអត្ថប្រយោជន៍នៃឪឡឹកទាំង ២ ពណ៌ ៖
- ឪឡឹកពណ៌ក្រហម
មនុស្សភាគច្រើនតែងជ្រើសយកឪឡឹកពណ៌ក្រហមមកទទួលទាន ដោយសារវាមានទឹកច្រើន និងរសជាតិផ្អែម។ ក្រៅពីជាតិទឹក និងរសជាតិផ្អែម ឪឡឹកក្រហមក៏មានផ្ទុកសម្បូរទៅដោយវីតាមីនសំខាន់ៗ រួមបញ្ចូលទាំងវីតាមីន A, B6, វីតាមីន C ហើយជាពិសេសនោះ គឺសារធាតុ lycopene ដែលជួយរក្សាសុខភាពបេះដូងល្អប្រសើរ ក៏ដូចជាទប់ស្កាត់ជំងឺមហារីកក្រពេញប្រូស្តាត រួមទាំងបញ្ហាឆ្អឹងផ្សេងៗផងដែរ។ ឪឡឹកពណ៌ក្រហមក៏ជាប្រភពដ៏ល្អបំផុតមួយនៃសារធាតុ citrulline ដែលជួយសម្រួលដល់លំហូរឈាមទប់ស្កាត់បញ្ហាបេះដូង និងចរន្តឈាម។
- ឪឡឹកពណ៌លឿង
ផ្ទុយពីឪឡឹកពណ៌ក្រហម ដោយឪឡឹកពណ៌លឿនមិនសូវទទួលបានការពេញនិយមប៉ុន្មានទេ។ ទោះជាយ៉ាងណា ឪឡឹកពណ៌លឿងក៏មានរសជាតិឆ្ងាញ់មិនចាញ់ឪឡឹកពណ៌ក្រហមដែរ។ ហើយបើទោះបីគ្មានផ្ទុកសារធាតុ lycopene ប៉ុន្តែឪឡឹកពណ៌លឿងនៅតែមានផ្ទុកសម្បូរទៅដោយវីតាមីនសំខាន់ៗ រួមបញ្ចូលទាំងវីតាមីន A, វីតាមីន C, វីតាមីន B, ម៉ាញ៉េស្យូម, ជាតិដែក, ប៉ូតាស្យូម, ផូស្វ័រ និងកាល់ស្យូម ដែលជួយពង្រឹងប្រព័ន្ធភាពស៊ាំរាងកាយបានយ៉ាងប្រសើរ។
សរុបមក ឪឡឹកទាំងពណ៌ក្រហម និងពណ៌លឿង គឺសុទ្ធតែមានផ្ទុកសម្បូរទៅដោយជាតិទឹក រួមជាមួយសារធាតុចិញ្ចឹមសំខាន់ៗ គ្រាន់តែឪឡឹកពណ៌ក្រហមមានផ្ទុកសារធាតុ lycopene ដែលជួយទប់ស្កាត់ជំងឺមហារីក។ ទោះជាយ៉ាងណា ឪឡឹកទាំងពីរពណ៌ គឺជាជម្រើសនៃផ្លែឈើល្អបំផុតដូចគ្នាសម្រាប់អ្នកចង់រក្សាបាននូវជាតិទឹកគ្រប់គ្រាន់ក្នុងរាងកាយ ជាពិសេសអ្នកដែលរស់នៅតំបន់ដែលមានអាកាសធាតុក្ដៅ៕