ចូលចិត្ត “ត្រយូងចេក” ឬអត់? បន្លែនេះប្រសើរណាស់ចំពោះសុខភាព ផ្ដល់អត្ថប្រយោជន៍អស្ចារ្យ  ជាច្រើន

ភាគច្រើននៃពួកយើងសុទ្ធតែបានដឹងរួចទៅហើយ អំពីអត្ថប្រយោជន៍ដ៏ប្រសើរនៃផ្លែចេកចំពោះសុខភាព។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណាអ្នកដែលដឹងថា មិនត្រឹមតែផ្លែចេកប៉ុណ្ណោះទេ ប៉ុន្តែត្រយូងចេកក៏អាចផ្ដល់ឥទ្ធិពលវិជ្ជមានយ៉ាងច្រើនមិនគួរឲ្យជឿចំពោះសុខភាពរាងកាយដែរនោះ គឺមានតិចណាស់។ ជាធម្មតាត្រយូងចេកត្រូវបានយកទៅធ្វើជាបន្លែ ឬអន្លក់។ ខាងក្រោម Health.com.kh នឹងបង្ហាញឱ្យដឹងពីផលល្អៗគួរឲ្យភ្ញាក់ផ្អើលនៃទទួលទានត្រយូងចេក ៖

១. ទប់ស្កាត់ការឆ្លងបាក់តេរី និងប៉ារ៉ាស៊ីត

ត្រយូងចេក អាចជួយទប់ស្កាត់ការកើនឡើងនូវពពួកមេរោគបាក់តេរីបានយ៉ាងប្រសើរតាមរយៈសារធាតុអេតាណុល (ethanol) ដែលវាមានផ្ទុក។ វាក៏មានសមត្ថភាពគួរអោយកត់សម្គាល់ក្នុងការសម្លាប់ប៉ារ៉ាស៊ីតមួយចំនួនផងដែរ។

២. បញ្ចុះជាតិស្ករក្នុងឈាម

នោះក៏ព្រោះតែ ត្រយូងចេកមានផ្ទុកសម្បូរទៅដោយជាតិសសៃជួយរាងកាយក្នុងការបំបែកអាហារកាន់តែយឺតទប់ស្កាត់ការឡើងខ្ពស់នៃជាតិស្ករក្នុងឈាម។

៣. ទប់ស្កាត់ជំងឺមហារីក និងជំងឺបេះដូង

ត្រយូងចេក គឺជាប្រភពដ៏ល្អបំផុតមួយនៃអាស៊ីតល្អៗ, សារធាតុ tannins, សារធាតុ flavonoids និងសារធាតុប្រឆាំងអុកស៊ីតកម្មជាច្រើនទៀតដែលជួយប្រយុទ្ធប្រឆាំងរ៉ាឌីកាល់សេរី ព្រមទាំងកម្ចាត់អុកស៊ីដង់ខូចខាតដែលអាចនាំឲ្យកើតជំងឺមហារីក ក៏ដូចជាជំងឺបេះដូង។

៤. ទប់ស្កាត់ជំងឺខ្វះគ្រាប់ឈាមក្រហមដោយកង្វះជាតិដែក

ត្រយូងចេក ក៏ជាប្រភពដ៏ប្រសើរនៃជាតិដែកដែលនឹងជួយទប់ស្កាត់កាត់បន្ថយហានិភ័យនៃជំងឺខ្វះគ្រាប់ឈាមក្រហមដោយវាបង្កើនការផលិតកោសិកាគ្រាប់ឈាមក្រហម។

៥. បង្កើនសុខភាពប្រព័ន្ធរំលាយអាហារ

ត្រយូងចេក គឺមានផ្ទុកសម្បូរទៅដោយជាតិសសៃរលាយ និងមិនរលាយ។ ជាតិសសៃរលាយអនុញ្ញាតអោយអាហារឆ្លងកាត់បំពង់អាហារបានយ៉ាងងាយស្រួល ហើយរលាយនៅក្នុងទឹក។ រីឯជាតិសសៃមិនរលាយទទួលបន្ទុកចំពោះអាហារដែលមិនរំលាយ ដោយវាមិនរលាយនៅក្នុងទឹក។ ជាតិសសៃទាំងពីរប្រភេទនេះ ជម្រុញបង្កើនការរំលាយអាហារ និងការស្រូបយកអាហារអោយកាន់តែមានសភាពប្រសើរឡើង។

៦. កាត់បន្ថយបញ្ហាថប់​បារម្ភ

ត្រយូងចេក មានផ្ទុកសម្បូរទៅដោយជាតិម៉ាញ៉េស្យូមដែលអាចជួយទប់ស្កាត់ ក៏ដូចជាកាត់បន្ថយបញ្ហាថប់បារម្ភ ហើយបង្កើនអារម្មណ៍ល្អប្រសើរគួរអោយកត់សម្គាល់៕