ទទួលទាន “តែបៃតង” រាល់ថ្ងៃ ហើយអ្នកនឹងទទួលបានអត្ថប្រយោជន៍អស្ចារ្យ  ទាំងនេះ

តែបៃតង ជាភេសជ្ជៈដ៏ល្អបំផុតមួយសម្រាប់សុខភាព ដោយវាមានផ្ទុកសម្បូរទៅដោយសារធាតុចិញ្ចឹម, សារធាតុប្រឆាំងអុកស៊ីតកម្ម, ជាតិរ៉ែសំខាន់ៗ រួមទាំងសារធាតុ polyphenols, Epigallocatechin Gallate (EGCG) និង catechins ដែលជួយព្យាបាលការរលាក, កម្ចាត់រ៉ាឌីកាល់សេរី, ទប់ស្កាត់ជំងឺមហារីក។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ភាគច្រើននៃពួកយើងសុទ្ធតែស្គាល់តែបៃតងរួចមកហើយ ប៉ុន្តែបើទោះជាចូលចិត្ត ឬឧស្សាហ៍ទទួលទានយ៉ាងណាក៏ដោយ ក៏ប្រហែលមិនធ្លាប់ចាប់អារម្មណ៍ដឹងអំពីអត្ថប្រយោជន៍ដ៏ល្អប្រសើរនៃតែបៃតងចំពោះសុខភាពឡើយ។ ថ្ងៃនេះវេបសាយសុខភាព Health.com.khនឹងបង្ហាញឱ្យដឹងពីឥទ្ធិពលវិជ្ជមានគួរអោយភ្ញាក់ផ្អើលនៃការទទួលទានតែបៃតងរាល់ថ្ងៃ ៖

១. ធ្វើអោយមុខងារខួរក្បាលកាន់តែប្រសើរឡើង

ជាតិកាហ្វេអ៊ីននៅក្នុងតែបៃតងអាចជួយលើកកម្ពស់អារម្មណ៍ល្អប្រសើរ ជម្រុញការចងចាំ និងបង្កើនមុខងារខួរក្បាល។ លើសពីនេះទៅទៀត តែបៃតង ក៏ជាប្រភពនៃអាស៊ីតអាមីណូ L-theanine ដែលមានប្រសិទ្ធិភាពរារាំងបញ្ហាថប់អារម្មណ៍មិនអោយកើតមាន។ ការសិក្សាបានបង្ហាញថា ជាតិកាហ្វេអ៊ីន និងសារធាតុ L-theanine អាចមានឥទ្ធិពលបញ្ចូលគ្នា ក្នុងការពង្រឹងដល់មុខងាររបស់ខួរក្បាល។ ហើយដោយសារតែបរិមាណនៃសារធាតុ L-theanine និងជាតិកាហ្វេអ៊ីនមានកម្រិយសមល្មមទើបធ្វើអោយតែបៃតងអាចផ្តល់នូវឥទ្ធិពលល្អជាង និងខុសគ្នាពីកាហ្វេ។

២. កាត់បន្ថយហានិភ័យនៃជំងឺទឹកនោមផ្អែម

តែបៃតងមានផ្ទុកសម្បូរទៅដោយសារធាតុ catechins,  polysaccharides និង epigallocatechin gallete ដែលជួយបញ្ចុះ ក៏ដូចជាគ្រប់គ្រងការស្រូបយកនូវជាតិស្ករក្នុងឈាមបានយ៉ាងប្រសើរ។ ដូច្នេះហើយទើបការទទួលទានតែបៃតងជាប្រចាំអាចកាត់បន្ថយហានិភ័យនៃជំងឺទឹកនោមផ្អែមប្រភេទទី ២ បានដល់ទៅ ៤២ភាគរយ។

៣. កាត់បន្ថយហានិភ័យនៃជំងឺបេះដូង

សារធាតុ polyphenolic ក្នុងតែបៃតងជួយកម្ចាត់កូឡេស្តេរ៉ូលមិនល្អ រួមទាំងកម្រិតនៃជាតិខ្លាញ់មិនល្អទ្រីគ្លីសេរីដទប់ស្កាត់បញ្ហាស្ទះសសៃឈាមដែលកាត់បន្ថយហានិភ័យនៃជំងឺដាច់សសៃឈាមខួរក្បាល និងជំងឺបេះដូង។

៤. បង្កើនសុខភាពថ្លើម

សារធាតុ catechins នៃតែបៃតងជួយធ្វើអោយមុខងារថ្លើមកាន់តែប្រសើរឡើង ហើយការពារថ្លើមពីផលប៉ះពាល់នៃសារធាតុពុលផ្សេងៗ រួមមាន ស្រា ជាដើម។

៥. សម្រាលរោគសញ្ញានៃជំងឺរលាកសន្លាក់

តែបៃតងមានផ្ទុកសម្បូរទៅដោយសារធាតុ epigallocatechin-3-gallate និង polyphenols ជួយកាត់បន្ថយការហើម ហើយប្រយុទ្ធប្រឆាំងការរលាកដែលជារោគសញ្ញានៃជំងឺរលាកសន្លាក់។

៦. ជួយអោយស្រកទម្ងន់

ជាប្រភពដ៏ប្រសើរនៃវីតាមីន A, B, B5, D, C, E, H និង K ព្រមទាំងម៉ង់កាណែស និងជាតិរ៉ែដទៃទៀត រួមបញ្ចូលទាំង chromium, ជាតិស័ង្កសី និងសេលេញ៉ូម ព្រមជាមួយសារធាតុប្រឆាំងអុកស៊ីតកម្មដែលជួយដុតបំផ្លាញជាតិខ្លាញ់ និងកាឡូរីបានឆាប់។ ការទទួលទានតែបៃតង ៥ ពែងក្នុងមួយថ្ងៃអាចជួយអោយអ្នកស្រកទម្ងន់បានច្រើនជាងធម្មតាទ្វេដង។

ចំណាំ ៖ អ្នកអាចទទួលទានតែបៃតងពី ៣ ទៅ ៥ ពែងក្នុងមួយថ្ងៃ ដើម្បីទទួលបានអត្ថប្រយោជន៍ដ៏អស្ចារ្យ គួរអោយភ្ញាក់ផ្អើលចំពោះសុខភាព៕