ការទល់លាមក គឺជារោគសញ្ញាមួយ មិនមែនជាជំងឺឡើយ។ ជាធម្មតា អាការៈទល់លាមកកើតមានឡើងនៅពេលប្រព័ន្ធរំលាយអាហារ ឬក្រពះពោះវៀនជួបភាពពិបាកក្នុងការរំលាយ និងធ្វើចលនាបណ្ដាលអោយមានការស្ដុកកាកសំណល់មិនបញ្ចេញមកក្រៅរហូតដល់ទៅច្រើនជាង ៣ ថ្ងៃ។  (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) បញ្ហាទល់លាមក គឺមិនមែនជារឿងលេងសើចនោះទេ ខណៈដែលរាងកាយត្រូវការបញ្ចេញកាកសំណល់ ដើម្បីជៀសវាងការបង្កទៅជាជាតិពុលផ្ដល់ផលប៉ះពាល់គួរឲ្យព្រួយបារម្ភក្នុងរាងកាយ។ ប្រសិនបើអ្នកកំពុងជួបប្រទះបញ្ហាទល់លាមក ឬចង់បង្ការបញ្ហានេះកុំឲ្យកើតឡើង ចូរបន្តអានដោយយកចិត្តទុកដាក់។ ខាងក្រោមវេបសាយសុខភាព Health.com.kh នឹងបង្ហាញឲ្យដឹងពីគន្លឹះបែបធម្មជាតិដែលជួយទប់ទល់ ក៏ដូចជាព្យាបាលបញ្ហាទល់លាមកបានយ៉ាងឆាប់រហ័ស ៖

១. ទទួលទានទឹក

ការទទួលទានទឹកបានគ្រប់គ្រាន់យ៉ាងហោចណាស់ ៨ កែវក្នុងមួយថ្ងៃជួយធ្វើអោយលាមកមានសភាពទន់ស្រួលបញ្ចេញ។ អ្នកក័អាចទទួលទានទឹកក្រូចឆ្មារក្ដៅឧណ្ហ ១ ពែងនៅពេលព្រឹកផងដែរដើម្បីសម្រួលដល់ដំណើរការនៃការរំលាយអាហារឱ្យកាន់តែប្រសើរ​​​ឡើង និងសកម្មជាងមុន។

២. ទទួលទានអាហារសម្បូរទៅដោយជាតិសសៃ

បង្កើនការទទួលទានអាហារសម្បូរទៅដោយជាតិសសៃ ក៏ព្រោះជាតិសសៃ គឺចាំបាច់ណាស់ក្នុងការសម្រួលចលនាក្រពះពោះវៀន។ បន្លែផ្លែឈើភាគច្រើន រួមបញ្ចូលទាំង ការ៉ុត, ទំពាំងបារាំង, ពន្លកស្ពៃ, ផ្លែព្រូន,  ចេកទុំ, ក្រូចឆ្មារ គឺជាប្រភពដ៏ប្រសើរនៃជាតិសសៃ។ ទោះជាយ៉ាងណា ប្រសិនបើអ្នកមិនធ្លាប់ទទួលទានជាតិសសៃពីមុនមកសោះ ក៏កុំទទួលទានច្រើនពេក ចាប់ផ្ដើមត្រឹមចំនួនសមល្មម​បានហើយ ដើម្បីជៀសផុតពីបញ្ហាហើមរមួលពោះ។

៣. យ៉ាអួរ

មានផ្ទុកសម្បូរទៅដោយបាក់តេរីល្អៗដែលជួយបំបាត់បញ្ហាប្រព័ន្ធរំលាយអាហារបានយ៉ាងប្រសើរ។ ដូច្នេះដើម្បីជៀសផុតពីបញ្ហាទល់លាមកចូរព្យាយាមទទួលទានយ៉ាអួរជាប្រចាំ។

៤. គ្រាប់ល្ង និងគ្រាប់ល្ពៅ

ក៏ជាប្រភពដ៏ប្រសើរនៃជាតិសសៃ ហើយដូចដែលបានរៀបរាប់ខាងលើ ជាតិសសៃដែលជួយបំបាត់ និងទប់ស្កាត់អាការៈទល់លាមកគួរអោយកត់សម្គាល់។

៥. ធ្វើលំហាត់ប្រាណ

សកម្មភាពរាងកាយមួយចំនួនក៏អាចជួយទប់ស្កាត់ព្យាបាលអាការៈទល់លាមកបានយ៉ាងប្រសើរផងដែរ។ អ្នកអាចចាប់ផ្ដើមជាមួយលំហាតប្រាណងាយៗ ដូចជា ដើរយឺតៗសម្រាប់រយៈ ៣០ វិនាទី រហូតដល់មានអារម្មណ៍ធូរស្រាលជាងមុន។ ការធ្វើលំហាត់ប្រាណមួយចំនួនអាចជួយម៉ាស្សាពោះវៀន ដូច្នេះអ្នកនឹងមិនជួបប្រទះបញ្ហាទាក់ទងជាមួយលាមកទៀតឡើយ៕