ផ្លែប៉េងប៉ោះគឺជាបន្លែមួយប្រភេទដែលប្រជាជនខ្មែរយើងនិយមទទួលទាន និងធ្វើម្ហូបបានយ៉ាងច្រើនមុខ ហើយវាមិនត្រឹមតែមានរសជាតិឆ្ងាញ់ទេ តែក៏ជួយបង្កើនចំណង់អាហារកាន់តែខ្លាំងផងដែរព្រោះតែពណ៌ក្រហមរបស់វាតែម្តង។ ប៉ុន្តែមានហេតុផលមួយផ្សេងទៀតដែលផ្លែប៉េងប៉ោះគួរតែមានក្នុងរបបអាហារអ្នករាល់ថ្ងៃ ព្រោះវាមានប្រយោជន៍ច្រើនដែលកម្រមាននរណាដឹង និងមិននឹងស្មានដល់។
ដើម្បីចង់ដឹងថាប៉េងប៉ោះល្អចំពោះសុខភាពមនុស្សយើង និងមានប្រយោជន៍ខ្លាំងយ៉ាងណានោះ សូមបន្តអានអត្ថបទនេះដូចខាងក្រោម៖
បង្ការជំងឺមហារីកបានច្រើនប្រភេទ
មានការសិក្សាច្រើនណាស់ដែលធ្វើទៅលើផ្លែប៉េងប៉ោះ ហើយក៏បានបង្ហាញថា សារធាតុ Lycopene ដ៏ច្រើនដែលមានក្នុងបន្លែនេះអាចជួយការពាររាងកាយមនុស្សពីជំងឺមហារីកបានច្រើនប្រភេទដូចជា មហារីកពោះវៀនធំនិងចុងពោះវៀនធំ ក្រពេញប្រូស្តាត និងក្រពះ។ សារធាតុ Lycopene គឺជាអង់ទីអុកស៊ីដង់មួយប្រភេទដែលអាចទប់ស្កាត់ការលូតលាស់របស់កោសិកាមហារីកក្នុងរាងកាយបាន។
បង្កើនការរំលាយអាហារ
ការញ៉ាំប៉េងប៉ោះត្រូវបានគេរកឃើញថា មានប្រសិទ្ធភាពក្នុងការបង្កើនមុខងារថ្លើម និងប្រព័ន្ធរំលាយអាហារផ្សេងៗទៀត។ វាអាចបង្ការការទល់លាមកបានយ៉ាងល្អ តាមរយៈការជំរុញឲ្យពោះវៀនធ្វើការបញ្ចេញកាកសំណល់យ៉ាងទៀងទាត់។
ល្អចំពោះបេះដូង
អត្ថប្រយោជន៍មួយផ្សេងទៀតដែលជាប់ទាក់ទងនឹងប៉េងប៉ោះដែរនោះគឺ វាជាមិត្តដ៏ល្អសម្រាប់សុខភាពបេះដូង។ នេះដោយសារតែវាផ្ទុកទៅដោយជាតិប៉ូតាស្យូម និងវីតាមីន B ដែលអាចកាត់បន្ថយកូឡេស្តេរ៉ុលក្នុងឈាមផង និងបញ្ចុះសម្ពាធឈាមផង។ មានន័យថា បើអ្នកញ៉ាំប៉េងប៉ោះជាទៀងទាត់ នោះអ្នកនឹងអាចបង្ការបញ្ហាបេះដូងបានយ៉ាងច្រើន។
អាចបញ្ឈប់ការកើតគ្រួសក្នុងតម្រងនោម និងថង់ទឹកប្រមាត់
ប៉េងប៉ោះគឺជាអាហារដែលអាចសម្លាប់មេរោគបែបធម្មជាតិមួយ មានន័យថា វាអាចការពារអ្នកពីការរាករូស ខណៈពេលដែឡវាអាចបញ្ឈប់ការកើតគ្រួសក្នុងតម្រងនោម និងថង់ទឹកប្រមាត់ផង។ ការញ៉ាំបន្លែនេះក៏ជួយកាត់បន្ថយការប្រឈមនឹងការបង្ករោគនៅផ្លូវទឹកម៉ូតដែរ។
ល្អចំពោះភ្នែក
បើសិនជាអ្នកមិនចង់ឲ្យភ្នែកមានបញ្ហាទេ អ្នកគួរតែដល់ពេលបញ្ចូលប៉េងប៉ោះទៅក្នុងរបបអាហារហើយ ព្រោះវាសម្បូរវីតាមីន A ដែលអាចបង្ការបញ្ហាភ្នែកបានយ៉ាងល្អ។
ពង្រឹងប្រព័ន្ធភាពស៊ាំ
ការញ៉ាំប៉េងប៉ោះរាល់ថ្ងៃជាវិធីសាស្រ្តដ៏ច្បាស់លាស់មួយក្នុងការបង្កើនមុខងារប្រព័ន្ធភាពស៊ាំដើម្បីប្រឆាំងនឹងជំងឺនានាបានដូចជា ផ្តាសាយ ក្អក និងក្តៅខ្លួន។ វីតាមីន C ដែលមានក្នុងបន្លែមួយនេះអាចកាត់បន្ថយស្រ្តេសបានទៀតផង។
ដូចអ្នកទាំងអស់គ្នាបានឃើញស្រាប់ហើយថា ការបន្ថែមប៉េងប៉ោះទៅក្នុងរបបអាហាររាល់ថ្ងៃគឺជារឿងដ៏ល្អបំផុតសម្រាប់សុខភាព ហើយក៏ជារឿងដែលអ្នកអាចធ្វើបានដោយខ្លួនឯងទៀត ដូច្នេះតើចាំអង្គាលទៀតទើបសាកល្បង?