ការដើរ គឺជាវិធីដ៏ងាយស្រួលបំផុតមួយដើម្បីរក្សាបាននូវសុខភាពល្អរឹងមាំជៀសឆ្ងាយពីជំងឺផ្សេងៗ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) អ្នកមិនចាំបាច់ធ្វើលំហាត់ប្រាណប្រភេទខ្លាំងក្លាអ្វីឡើយ គ្រាន់តែដើរ ១ម៊ឺនជំហានក្នុងមួយថ្ងៃក៏អាចជួយអោយអ្នកស្រកទម្ងន់ ព្រមទាំងទប់ស្កាត់ជំងឺផ្សេងៗ រួមបញ្ចូលទាំងជំងឺលើសឈាម, ទឹកនោមផ្អែម និងជំងឺសសៃឈាមបេះដូង សូម្បីតែជំងឺធ្លាក់ទឹកចិត្ត ក៏ដូចជាបញ្ហាបេះដូងបានយ៉ាងប្រសើរផងដែរ។ ខាងក្រោមវេបសាយ Health.com.kh នឹងបង្ហាញឱ្យដឹងពីអត្ថប្រយោជន៍ដ៏គួរអោយភ្ញាក់ផ្អើលនៃការដើរជាប្រចាំចំពោះសុខភាព ៖
១. បង្កើនសុខភាពប្រព័ន្ធរំលាយអាហារ
ការដើរមិនត្រឹមតែជាលំហាត់ប្រាណល្អបំផុតមួយសម្រាប់រាងកាយឡើយប៉ុន្តែក៏ចំពោះប្រព័ន្ធរំលាយអាហារផងដែរ។ ការដើរបន្ទាប់ពីទទួលទានអាហារពេលល្ងាច គឺជួយកំណត់បរិមាណត្រឹមត្រូវនៃការបញ្ចេញទឹករំលាយអាហារ ឬទឹកក្រពះ និងអង់ស៊ីមបំបែកអាហារ។ ហើយការទទួលទានអាហារសុខភាពល្អ គឺមិនអាចផ្ដល់ប្រយោជន៍អ្វីឡើយ ប្រសិនបើការរំលាយអាហារដំណើរការមិនបានត្រឹមត្រូវនោះ។ ដូច្នេះដើម្បីរក្សាបាននូវស្ថានភាពល្អប្រសើរនៃដំណើរការរំលាយអាហារក្នុងរាងកាយ ចូរឆ្លៀតដើរមួយភ្លែត។
២. កាត់បន្ថយស្ត្រេស
ការដើរជាប្រចាំអាចជួយធ្វើអោយអ្នកមានអារម្មណ៍ប្រសើរឡើងគួរអោយកត់សម្គាល់។ នោះក៏ព្រោះតែការដើរធ្វើអោយបេះដូងច្របាច់ឈាមទៀងទាត់ដែលមានន័យថា រាល់សរីរាង្គនឹងទទួលបានអុកស៊ីសែនគ្រប់គ្រាន់ ហើយដំណើរការមុខងារបានត្រឹមត្រូវ រួមបញ្ចូលទាំងការបញ្ចេញអ័រម៉ូនអារម្មណ៍ល្អ។ ការចំណាយពេលដើរអោយបាន ១ម៊ឺនជំហានក្នុងមួយថ្ងៃជាប្រចាំ គឺត្រូវបានណែនាំជាពិសេសសម្រាប់អ្នកឧស្សាហ៍ប្រឈមមុខនឹងបញ្ហាស្ត្រេស ឬតានតឹងក្នុងអារម្មណ៍។ អ្នកមិនចាំបាច់ទៅម៉ាស្សា ឬមើលកុនដើម្បីកាត់បន្ថយភាពតានតឹងទេ គ្រាន់តែដើរមួយភ្លែតក៏ជួយអោយអ្នកបាត់ស្ត្រេសបានឆាប់រហ័សដោយមិនអស់ប្រាក់។
៣. បង្កើនប្រព័ន្ធភាពស៊ាំរាងកាយ
ការដើរជាប្រចាំអាចជួយពង្រឹងប្រព័ន្ធភាពស៊ាំអោយកាន់តែប្រសើរឡើង។ ដូច្នេះដើម្បីមានប្រព័ន្ធភាពស៊ាំរឹងមាំមិនងាយឆ្លងជំងឺផ្សេងៗ ចូរធ្វើលំហាត់ប្រាណងាយៗ ដោយដើរអោយបានយ៉ាងហោចណាស់ ១ម៊ឺនជំហានក្នុងមួយថ្ងៃ ដើម្បីពង្រឹងដល់កោសិកាដែលប្រយុទ្ធប្រឆាំងនឹងបាក់តេរីអាក្រក់ៗនៅក្នុងរាងកាយ។
៤. បំបាត់ភាពរឹងក្នុងសន្លាក់
ផលវិជ្ជមានដ៏ល្អមួយទៀតនៃការដើរ ១ម៊ឺនជំហានក្នុងមួយថ្ងៃ គឺវាជួយការពារកុំឱ្យរឹងសន្លាក់។ ហើយជាធម្មតាអាការៈនេះច្រើនកើតឡើងចំពោះអ្នកដែលអង្គុយពេញមួយថ្ងៃ។ ការធ្វើចលនាជាប់ជានិច្ចនឹងធ្វើអោយសន្លាក់អាចរក្សាបាននូវជាតិរំអិលគ្រប់គ្រាន់ដែលជួយទប់ស្កាត់អាការៈឈឺចាប់ និងការឡើងរឹងនៃសន្លាក់។
៥. ពង្រឹងសុខភាពបេះដូង
ការដើរ គឺជាលំហាត់ប្រាណដ៏ល្អបំផុតមួយដែលអាចជួយកាត់បន្ថយកម្រិតនៃកូឡេស្តេរ៉ូលមិនល្អ ដោយបង្កើនកូឡេស្តេរ៉ូលល្អក្នុងឈាមជំនួសវិញ។ ដូចដែលភាគច្រើននៃពួកយើងធ្លាប់បានដឹងរួចមកហើយថា ការឡើងខ្ពស់នៃកម្រិតកូឡេស្តេរ៉ូលមិនល្អអាចបង្កបញ្ហាសុខភាពគួរអោយព្រួយបារម្ភជាច្រើន រួមបញ្ចូលទាំងហានិភ័យនៃជំងឺសសៃឈាមបេះដូង និងជំងឺដាច់សសៃឈាមខួរក្បាល។
៦. ស្រកទម្ងន់
អត្ថប្រយោជន៍ដ៏ច្បាស់លាស់មួយនៃការដើរជាប្រចាំ គឺវានឹងជួយធ្វើឲ្យអ្នកស្រកទម្ងន់។ នោះក៏ព្រោះតែកាឡូរីនឹងត្រូវបានបំលែងដើម្បីប្រើប្រាស់ភ្លាមៗជាថាមពលសម្រាប់រាងកាយ៕